Aldardyń maqsaty – sarań baıdy, paıdakúnem saýdagerdi, ozbyr handy ájýa etý. Mysaly, ol asqan sarańdyǵy úshin halyq Shyqbermes Shyǵaıbaı ataǵan baıdyń asyn iship, atyn minip ketedi. Alypsatar saýdagerdiń aldynan ógizderin aıdap ketedi. Biraq oqıǵa munymen bitpeıdi. Ol qý, zulym saıtandarǵa tap bolady. Aldar kóse olardan aılasyn asyryp, dostaryn zulymdyqtan qutqara ala ma? Qoıylymǵa jınalǵan Aldardyń jaqtastary mine, osy suraqqa jaýap izdeıdi.
Qoıylymnyń avtory jáne rejısseri – Aıjan Salaeva, horeografy – Iýlııa Amırova, qoıýshy sýretshisi – Erbolat Súleımenov, kompozıtory – Andreı Korotchenko. Bas keıipker Aldar kóse rólin Abý-Samat Túsipbaev pen Ilııas Bazarbaev somdasa, ákesi men baıdy Darhan Músilimov, Erjigit Abıtaev, han beınesin Nurjan Ahmetov, Dosymhan Beısenbaev alyp shyqty. Al ertegidegi negizgi keıipkerler qyzyl saıtandy Aıjan Sadyqova, Aıda Berikbaı, kók saıtandy Albına Baırova, Jańagúl Shámshi nanymdy oınap shyqty.
– Aldar kóse qoıylymyn sahnalaýǵa búkil teatr bolyp jumyldyq. Aldar kóseni zulymdyqpen kúreske janqııarlyqpen atsalysqan keıipker retinde bilemiz. Ol adamdarǵa meıirim tanytyp, únemi kómektesip júredi. Kez kelgen dúnıege jaýapkershilikpen qaraý, kerek kezde qol sozý, aınalamyzda ne bolyp jatqanyna nemquraıdy bolmaý degen sııaqty ustanymdardy balalarǵa túsindirgimiz keldi. Ar, adamdyq, uıat degen dúnıelerdi aqshaǵa satyp alýǵa bolmaıtyndyǵyn bilse deımiz. Qazaq ertegilerine ınssenırovka jasap, sıýjetin óz qalaýymyzsha zamanaýı túrde jasap shyqtyq. Ulttyq salt-dástúr, tanym turǵysynan alystamaýdy da oıladyq, – deıdi rejısser Aıjan Salaeva.
Asqan aılakerligimen jaqsylyqtyń jaqtaýshysy, jamandyqtyń dattaýshysy bolǵan Aldar beınesi bul joly da utymdy shyqty. О́ıtkeni kishkentaı kórermen peıilinen aıyptaýdy emes, qaıta quptap, qoshemettep otyrǵanyna kýá boldyq. Al sahna aldyna jaıǵasqan shynshyl hám talǵampaz kórermendi aldaýsyratý áste múmkin emes.
– Aldar kóse obrazyn alyp shyǵý qıynǵa tústi. Bas keıipkerdiń qýaqy bet-beınesi tabıǵatyma kele bermeıtindikten, úlken daıyndyqty talap etti. Bul jolda teatrdaǵy joǵary býyn ártisterdiń kóp kómegi tıdi, – deıdi Aldar rólin somdaǵan Ilııas Bazarbaev.
Tárbıelik máni zor halyq danalyǵyn búgingi zaman bıiginen túrlendirip usynǵan óner ordasynyń usynar taǵylymdy dúnıesi munymen tolastamaq emes. Búgingi tańda elordalyq qýyrshaq teatrynyń repertýarynda «Qańbaq shal», «Er Tóstik», «Máńgilik bala beıne», «Atameken», «Arystan patsha», «Ormanda bolǵan oqıǵa», «Meniń salǵan sýretim» «O, toba», «Ana qudireti», «Aǵaıyndy gnomdar», «Jalqaýdyń aılasy» syndy otyzǵa tarta qoıylym bar. Munyń barlyǵy kórkemdik keńesten ótken aıtary mol ertegiler. Biri dostyqty dáriptese, endi biri adamgershilikke, adaldyqqa, anaǵa, jerge, elge degen súıispenshilikke úndeıdi.
