Oblystaǵy týrızm ındýstrııasyn negizinen osy úsh baǵytta damytýdyń qolǵa alynǵany da osy oıdy qýattaı túsedi.
Bir qýanarlyǵy sol, búgingi kúnde týrızmniń talpynǵan jandy tabyssyz qaldyrmasyn uqqan Qaraǵandynyń bıznes ókilderi bul salany damytýǵa bilek sybana kirisken. Zady, Qarqaralyny «Qazaqstannyń Shveısarııasy» dep tegin aıtpaıdy. Munda óńirdiń óńin kirgizip, shyraıyn keltirip jáne týrısterdi magnıtshe tartyp turatyn memlekettik ulttyq tabıǵı park bar. Jeri taý-tasty, ný ormandy bolyp keletin parktiń aýmaǵy 112,1 myń gektardy quraıdy. Onyń 29,1 myń gektaryn týrıstik-rekreasııalyq damýǵa arnalǵan jerler alyp jatyr. Al bul degenińiz, osy aýmaqta týrızmdi damytýǵa mol múmkindik beretin asa qolaıly jaǵdaı bar degen sóz.
Qazirdiń ózinde Qarqaraly ulttyq tabıǵı parkiniń aýmaǵynda osy maqsatta jalpy kólemi 143,1 gektar jalǵa alýǵa bolatyn jer ýchaskeleri belgilengen. Onyń ishinde 19 jer ýchaskesi qysqa merzimge jáne 11 jer ýchaskesi uzaq merzimge beriletin bolady. Qazirgi ýaqyttyń ózinde qysqa merzimge beriletin 11 jer ýchaskesinde 17 kelisimshart jasalǵan jáne bes jer ýchaskesi uzaq merzimge jalǵa tapsyrylyp, jańa nysandar ashý jumystary júrgizilýde.
Jalpy ulttyq tabıǵı parkte týrısterdi tartý maqsatynda qolǵa alynǵan sharýalar az emes. Mysaly munda tabıǵat murajaıy men jabaıy ańdar turatyn voler saıahatshylarǵa qyzmet kórsetedi. Ulttyq tabıǵı baqtyń aýmaǵynda 11 týrıstik marshrýt resmı tirkelip, jumys istep turǵanyn da eske sala ketken jón.
Qarqaraly Ulttyq tabıǵı parkiniń dırektory Aıdar Darbaevtyń aıtýynsha, mekemede ormanshy, qoryqshy, kúzetshi, ekolog, týrıstik mamandardyń bárin qosyp eseptegende, 120-dan astam adam jumys isteıdi eken. Osyndaǵy elik, buǵy, qaban jáne bızon syndy ańdardy kórýge yntyqqan jurttyń qarasy tipti de qalyń bolatyn kórinedi. Mysaly 2019 jyldyń ózinde 35 myńnan astam adam bul jerge arnaıy kelipti. Bızon demekshi, parkte tabıǵatta sırek kezdesetin bul janýardyń úsh analyǵy men bir buqasy bar eken.
Ulttyq parktiń aýmaǵyna kirý úshin ár adam 0,1 AEK kóleminde aqy tóleıdi. Qazir ol shamamen 278 teńgeni quraıdy. Byltyr, mysaly, qyzmettiń osy túrinen 42,8 mln teńge paıda túsipti. Týrızmniń qudireti de osynda: istiń qııýyn tapsań, aspannan aqshany qarsha jaýdyrady!
Qarqaralynyń jaqsy atyn jalǵyz ulttyq tabıǵı park qana shyǵaryp turǵan joq. Kórem degenge nıet bildirgen qaýymǵa odan tys jerlerde de kóptegen kózaıym nysandar bar. Mysaly Qunanbaı qajy meshiti, Abaı túsken úıi, Mádı Bápıulynyń eskertkishi men beıiti, tarıhı-ólketaný murajaıy, 78 kommýnardyń eskertkishi, basqa da kóptegen tarıhı-mádenı oryndardyń jetkilikti ekenin aıta ketken jón.
Búgingi kúnde aýdanǵa at arytyp keletin qonaqtarǵa arnalǵan 31 demalys orny men qonaq úı jumys istep tur. Bulardyń jalpy alǵanda 2,7 myńnan astam adamdy qabyldap, qyzmet kórsetýge áleýeti jetedi. Eń bastysy, bul salada 300-den astam adam jumys istep, nápaqasyn taýyp júr.
Aýdan ákimi Eldar Dúısetaev Qarqaraly qalasy úshin asa qolaıly týrızm salasyn damytý qajet dep sanaıdy. «Aldaǵy ýaqytta Qarqaraly qalasynyń tarıhı ortalyǵyn jańǵyrtý oıda bar. Týrızmdi damytý jobasy aıasynda ınfraqurylymdy jetildirýdi, taý-shańǵy, saýyqtyrý keshenderin salýdy, qonaq úı, meıramhanalardyń jáne bógette qalalyq jaǵajaıdyń qurylys jumystaryn júrgizýdi josparlap otyrmyz», – deıdi aýdan basshysy.
Resmı statıstıkaǵa sensek, 2020 jyldyń 9 aıynyń qorytyndysy boıynsha demalýǵa kelgenderge kórsetilgen qyzmet kólemi 197,9 mln teńgeni qurapty. Kelýshilerdiń sany 11680 adamǵa jetken. Álbette, demalýshylardyń sany karantındik shekteýlerge baılanysty sál-pál tómendegen eken. Alaıda mamandar munyń ýaqytsha kórsetkish ekenin aıtady.
Qarqaralyda demalýshylardyń qyzyǵyp keletin jeriniń biri – Samalkóldiń jaǵasyna oryn tepken «Shahter» demalys úıi. «ArselorMıttal Temirtaý» kompanııasyna qarasty bul bazanyń janynda taý shańǵysy kesheni bar. Qystyń qyzyǵyn osynda kelip kórgender onyń ataqty Shymbulaqtan bir de bir kem emesin aıtar edi. Mysaly, munda da 500 metr bıiktikkke shyǵaratyn aspaly arqanjol bar. Mejeli bıikke kóterilgennen keıin shańǵymen nemese shanamen quldılaımyn deseńiz, erik ózińizde.
«Shahter» demalys úıinde kelýshilerge arnalǵan servıstik qyzmet durys jolǵa qoıylǵan. Bul jerdegi qonatyn bólmelerdiń jaılylyǵy, tamaǵynyń dámdiligi týrasynda jyly lebiz bildiretin demalýshylardyń qatary ýaqyt ótken saıyn artyp keledi. Baǵasy da qoljetimdi. Mysaly, munda adam basyna táýligine 12 myń teńgeden alynady. Bul somanyń ishine jatyn oryn jáne tórt mezgil tamaq kiredi. Al qalǵan qyzmet túrleriniń, mysaly, saýnaǵa túsý, bılıard oınaý, qysta shańǵy tebý, jazda qaıyqpen júzýdiń aqysyn tipti de sý tegin deýge bolady.
«Berloga» dep atalatyn demalys úıiniń de «Shahterden» kem túser jeri joq. Munda kóbine demalystyń otbasylyq túrin tańdaǵandar at basyn tireıdi eken. Demalýshylar shańǵy, shana, tıýbıng tebýden sharshasa, atpen serýendeýine de jaǵdaı jasalǵan. Tipti haskı ıtteri jegilgen shanaǵa minip, qyzyqqa batýǵa da mol múmkindik bar. Salamatty ómir saltyn ustanýǵa baǵyttalǵan osy demalystardan keıin karaoke zalyna baryp, qalaǵanyńyzsha án aıtyp, kóńil kóterý de qonaqjaı mekenniń súısintetin qyzmetiniń birine aınalǵan. Aıtpaqshy, dál osy «Berloga» demalys úıiniń túbinen 1200 metr bıiktikte jatqan ataqty Shaıtankólge tikeleı kóterilýge bolady.
Qarqaraly aýdandyq kásipkerlikti damytý jáne ónerkásip bóliminiń basshysy Serik Tóleýbektiń ólkede týrızm salasyn damytýdy maqsat etken josparlar týraly aıtqany kóńilge qýanysh uıalatady. Mysaly, aldaǵy ýaqytta qalanyń óz basynda quny 15 mln teńgeni quraıtyn qonaq úıdiń qurylysy bastalady eken. Taǵy bir kásipker eski qazandyq ǵımaratyn qalpyna keltirip, qomaqty qarjy salyp, qonaq úıdiń qurylysyn júrgizbekshi.
Al «Buǵyly» shatqalynda qolǵa alynbaqshy joba aýqymdylyǵymen nazar aýdarady. Sátin salsa, munda ınjenerlik ınfraqurylym durys jolǵa qoıylǵannan keıin, taý-shańǵy jáne shıpajaı-saýyqtyrý keshenderiniń, stadıonnyń, qonaqúıler, demalys úıleri, meıramhanalardyń qurylysy bastalady. Kól jaǵasynda qalalyq jaǵajaı jasalmaqshy. Budan bólek etno, jaıaý júrý, taýǵa shyǵý, shańǵy tebý, at sporty, velosıped jáne motosıkl týrızmin damytý da josparǵa túzilgen. Sonymen qatar Qarqaralydaǵy barlyq saýyqtyrý, kóńil kóterý, demalý, qyzmet kórsetý oryndaryna qyzyǵýshylyq tanytqan adamdarǵa arnalǵan Visit.Karkaraly veb-saıtyn ázirleý boıynsha jumystar qolǵa alynbaqshy. Al bolashaqta shaǵyn ushaqtarǵa arnalǵan áýejaı ashý ıdeıasy qarqaralylyqtardyń týrızm syndy ıgilikti jáne yrzyqty salaǵa erekshe mán berip otyrǵanyn kórsetse kerek.
