Bastapqyda 15 top bolsa, búginde olardyń qatary 45-ke jetti. Byltyr monıtorıngtik top 4 163 nysandy tekserip, karantın talaptaryn buzǵan 919 derekti anyqtady. Onyń jartysyna jýyǵy halyqqa qyzmet kórsetý nysandaryna qatysty, talapqa baǵynbaı úı jaǵdaıynda kópshilik qatysqan is-sharalar uıymdastyrǵandar da az emes. Anyqtalǵan 919 derek boıynsha QR ÁQBtK-tiń 425-babynyń 1-bóligimen jalpy somasy 44 405 330 teńge ákimshilik aıyppul salyndy
Al osy jyldyń basynan beri top 1 904 nysanǵa reıdtik tekseriske shyqqan. Osy ýaqyt aralyǵynda karantın talaptaryn saqtamaǵan 137 derek anyqtalyp, QR ÁQBtK-tiń 425-babynyń 1-bóligimen jalpy somasy 11 576 735 teńgeniń ákimshilik aıyppuly salyndy. Talapqa baǵynbaıtyndardyń sany jaǵynan 45 derekpen Qyzylorda qalasy «kósh bastap» tur. Oblys ortalyǵynan keıin 28 faktimen Qarmaqshy aýdany tur. Aral aýdanynda da monıtorıngtik top músheleriniń nazaryna ilingender az emes.
– Kóp fakti qoǵamdyq tamaqtaný oryndarynda tirkelýde. Búginde osy baǵyttaǵy kásipkerlik nysandarynyń 74 márte karantın talaptaryn buzǵany anyqtaldy. Kelýshilerge jeke qorǵanysh quraldarynsyz qyzmet kórsetkender, ǵımarattyń tolymdylyǵy 30%-dan aspaýy qajet degen shekteýdi saqtamaǵandar bar. Tipti tyıymǵa qaramastan keıbir kompıýterlik klýbtardyń jasyryn jumys istep turǵany belgili boldy, – deıdi oblystyq arnaıy monıtorıngtik toptyń jetekshisi Lázzat Baqtybaeva.
Aımaqta karantın talaptary kezeń-kezeńimen jeńildetilgenimen birqatar shekteýler áli de saqtalyp otyr. Soǵan qaramastan toıdy toqtatpaı otyrǵandar bar. Top músheleri jyl basynan beri úı jaǵdaıynda uıymdastyrylǵan 28 otbasylyq toı-jıyndy anyqtady. Shekteýli sannan asyrǵan meıramhanalarǵa da ákimshilik aıyppuldar salyndy.
Shekteý sharalary eńbek ujymdarynyń barlyǵynda birdeı saqtala bermeıdi. Naýryz merekelerine oraı ótkizilgen ujymdyq is-sharalar kezinde karantın talaptaryn saqtamaǵan birqatar uıymdar men memlekettik qyzmetshilerge Ákimshilik quqyq buzýshylyq kodeksine sáıkes aıyppuldar salyndy. Aýyldyq okrýgterdiń biriniń ákimine 8 naýryz merekesine oraı uıymdastyrylǵan jıyn kezinde betperde kımegeni úshin 230 AEK ákimshilik aıyppul salyndy.
– IV toqsannan bastap bilim berý dástúrli jáne aralas formatqa aýysty. Osyǵan oraı mektepterdegi karantın talaptarynyń saqtalýyn baqylaýdy kúsheıttik. Synypta oqýshylardy belgilengen shekti sannan asyrý, betperdelik rejimniń saqtalmaýy, 80 adamdy jınap, ustazdar jınalysyn ótkizý syndy derekter tirkeldi. Sondaı-aq, synyptardaǵy ylǵaldy tazalaý jumystarynyń sapasyz ótkizilgeni belgili bolyp, jaýaptylarǵa ákimshilik aıyppuldar salyndy, – deıdi top jetekshisi.
Qyzylorda oblysy
