Sýretti túsirgen Erlan OMAR, «EQ»
Medısına qyzmetkerleri men barlyq deńgeıdegi ákimder jergilikti jerde indet taralmaýyna oraı qaýipsizdik sharalaryn júrgizýde. Bul másele oblystyq ákimdiktiń Jedel shtab otyrysynda apta saıyn talqylanýda.
– Jalpy, «Sary aımaqta» bolǵanymyzben, epıdemııalyq jaǵdaı bir táýlik ishinde ózgerýi múmkin, – dedi oblys ákimi Ábilqaıyr Sqaqov jedel shtab otyrysynda. – Osy máselege oraı barlyq júktemeni densaýlyq saqtaý salasynyń ǵana mindeti dep qaraýǵa bolmaıdy. Jergilikti ákimdikter indetti jappaı juqtyrýdyń, taralmaýyn baqylaýǵa alýlary tıis.
Sondyqtan Sanıtarlyq-epıdemıologııalyq baqylaý departamenti keıbir shekteý sharalaryn qaıta engizýge arnalǵan jańa qujat daıyndady. Oblys aýmaǵynda shekteýli karantındik sharalar týraly ózgerister men tolyqtyrýlar engizilgen №9 jańa qaýlynyń tolyq nusqasy jarııalandy. Departament basshysy Batyrbek Álıevtiń málimdeýinshe, aldaǵy kúnderi óńirde karantındik sharalar qaıtadan kúsheıtilýi múmkin.
– О́ıtkeni, 9-15 sáýir aralyǵynda 313 jaǵdaı tirkelse, al 2-8 sáýir aralyǵyndaǵy kórsetkish – 248-ge jetti. Aýyrǵandardyń táýliktik ósimi – 0,21 paıyz, aptalyq 1,29 paıyzdy qurady, – deıdi bas sanıtar dáriger.
16 sáýirde indet juqtyrýdyń 43 jaǵdaıy rastalsa, 28-inde ınfeksııa belgileri anyqtalǵan. Qazir kásipkerlik nysandarynda da epıdemııalyq rejimniń saqtalýyn qadaǵalaıtyn monıtorıngtik toptar tártip buzýshylyqtardy anyqtaýda. Top ókilderi belgilengen tártip erejesin buzylýyn, nysandardaǵy adamdar sanynyń shekten asýy, áleýmettik qashyqtyqty saqtamaıtyn jaılardy tirkedi.
– Mysaly, 12 nysan ıelerine ákimshilik aıyppul salyndy,– deıdi bas sanıtar dáriger. – Al buzýshylyqtar júıeli túrde anyqtalatyn nysandar boıynsha materıaldar sotqa jiberilýde. Keıbir oryndarǵa qatysty jumysyn 15 kúnge toqtata turý týraly sheshim de qabyldanǵan. Sonymen birge 5 adam shekara arqyly oblysqa PTR-anyqtamasyz ótpek bolǵan, al 7 adam karantındik stasıonarlarǵa jiberilipti. Sońǵy táýlikte shekara arqyly oblysqa 414 adam – 261 jaıaý júrginshi jáne 153 júk kóliginiń júrgizýshisi ótken.
Jalpy, shekteýler engizilgen ýaqyttan bastap oblysqa 87 939 adam keldi, 54 358 júrgizýshi halyqaralyq tasymaldardy júzege asyrýshy jáne 33 581 jolaýshy. Al PTR-tekserý úshin karantındik stasıonarlarǵa 2 701 jolaýshy ornalastyryldy. Barlyǵy 25 034 PTR-test ótkizildi, – delingen departament málimetinde. Al oblystyq densaýlyq saqótaý basqarmasynyń málimetinshe, 13 sáýirde oblysqa Spýtnık V vaksınasynyń birinshi komponentiniń 21 750 jáne ekinshi komponentiniń 10 750 mólsheri jetkizilgen.
Qazirgi kezde óńirdegi 74 egý pýnktinde indetke qarsy ekpe alýǵa bolady. Osy kúnge deıin 19 myńǵa jýyq turǵyn «Gam-KOVID-Vak» (Spýtnık V) vaksınasynyń I komponentin, taǵy 4 myńnan astamy – preparattyń II komponentin aldy.
– Al jetkiziletin vaksına kólemi kóbeıgen kezde bizdiń resýrstarymyz daıyn bolýy tıis, – dedi otyrys barysynda oblys ákimi. – Oryn jetpegen jaǵdaıda emhanalar basqa nysandardy jalǵa alý shartyn jasaı alady.
Sondyqtan turǵyndar arasynda dúrbeleń týyndamas úshin, olar ekpeni qaıdan alatyny týraly aqparattan habardar bolýy tıis. Qalalar men aýdandardyń ákimderine barlyq egý pýnktterin aralap, olardyń jumysyn úzdiksiz baqylaıtyn turaqty toptar qurý tapsyryldy.
Pavlodar oblysy
