Sáýirdiń basynda ınspektorlar qurylǵan fototuzaqty teksere otyryp, aıý, kúdir, ular, tıin, qoıan, qasqyr, sileýsin, taý eshkiler túskenin kórgen. Al qar barysy Sarymsaqty jotasynda buryn-sońdy fotoǵa túspegen.
Fotonyń anyqtamasyna zer salsańyz, qar barysy 2020 jyldyń 29 qazanynda túnde tuzaqtyń aldynan júrip ótken. Apparat kıeli ańdy 3 ret túsirip úlgergen. Sarymsaqty jotasyna fototuzaqty Katonqaraǵaı MUTP janýarlardy qorǵaý jáne óńdirý bólimi bastyǵy Erik Qasymov pen ınspektor Dáýren Taýdanbekov 2017 jyldan beri quryp keledi.
Qurylǵyny barys, taý teke meken etetindeı Altaıdyń basyna qurý ońaı emes. Taǵylardyń soqpaǵyn tabý úshin 2000-3000 bıik shapshyma shyńdarda júrýge týra keledi.
«Tabıǵatty qorǵaý mamandarynyń eńbegi mınıstrlik tarapynan Katonqaraǵaı memlekettik Ulttyq tabıǵı parkiniń 20 jyldyǵy qarsańynda tıisti baǵalansa dep oılaımyz. Qar barysyn Altaı taýlarynda alǵash ret 2014 jyly túsirgenbiz. 2015-2016 jyldary birneshe márte túsken. Qar barysyn anyqtaý jumystaryna park dırektory Janbolat Tynybekov únemi qoldaý kórsetip keledi»,deıdi park qyzmetkeri Erik Qasymov.
