Keshende ıilgen 21 qanat Túrkistanda jerlengen 21 handy bildiredi. Esim hannan Álıken hanǵa deıingi babalarymyzdyń esimderi men basqarǵan jyldary da jazylǵan. Sondaı-aq osynda Elbasy «Uly dala birligi» atty kapsýlany saldy. Onyń ishinde elimizdiń túkpir-túkpirindegi qasıetti jerlerdiń topyraǵy jınalǵan. Jobalaý quny 1,9 mlrd teńge bolatyn memorıaldyq keshenniń jalpy aýdany 0,85 gektardy quraıdy. Jańa nysannyń baralefinde qazaq bıleriniń, qazaq danalarynyń kórkemsózderi qashalǵan. Sheńber tárizdes salynǵan pılondardaǵy granıttik taqtaıshalarǵa qazaq dalasyn basqarǵan 21 hannyń esimderimen qatar olardyń bılik júrgizgen jyldary da jazylǵan. Kóne ǵasyr men jańa dáýirdi sabaqtastyra túsken shaharda úılesimdi úlgimen salynǵan jańa ǵımarattar paıdalanylýǵa berildi.
Sondaı-aq Elbasy Nursultan Nazarbaev «Etno-aýyl» kesheniniń ashylýyna qatysty. «Etno-Aýyl» kesheni qazaq dalasynyń XVIII-XIX ǵasyrdaǵy ómirin beıneleıtin joba sanalady. «Áziret Sultan» mádenı qoryǵynyń býferlik aımaǵy men Ahmet Iаsaýı kesenesiniń bekinis qabyrǵasy, etnografııalyq murajaıdyń ortasynda oryn tepken. Interaktıvti etnoaýyldyń aýdany 16 myń sharshy metrdi quraıdy. Kesenege kelýshiler qazaq halqynyń baı mádenıetimen tanysyp, tipti kóne zattardy qoldarymen ustaı alady. Kóshpendiler órkenıetinen kórinis beretin etno-aýyldyń aımaǵynda qazaq dalasyndaǵy tutas bir dáýir beınelengen.
Túrkistan oblysy
