«Kúlshe qyz» mýzykalyq ertegisi orys dramatýrgy Evgenıı Shvars pen kompozıtor Antonıo Spadavekkıanyń «Zolýshka» atty ertegisiniń jelisinen alynǵan. Shyǵarmany qazaq tiline aýdarǵan – Esim Segizbaev. Atalǵan erteginiń qoıýshy rejısseri «Sahnager-2019» Ulttyq teatr syılyǵynyń ıegeri, Mýzykalyq jas kórermen teatrynyń akteri ári rejısseri Rasýl Ýsmanov. Mýzykamen árlegen halyqaralyq konkýrstardyń laýreaty Rýslan Baımýrzın, qoıýshy horeograf Ýálıtbek Sııazbekov jáne qoıýshy sýretshi Ánýar Sápıev.
«Búgingi premera álemge tanymal «Kúlshe qyz» ertegisi. Bizdiń ertegimiz jaı ǵana ertegi emes – mýzykalyq ertegi. Al sizder sabaqtaryńyzdy oıdaǵydaı aıaqtap, kanıkýlǵa, jaqsy demalysqa shyǵatyn kúnge jeteıik. Kanıkýlda biz sizderge taǵy da keremet ertegilerdi daıyndaıtyn bolamyz!» degen teatr dırektory, Qazaqstannyń eńbek sińirgen qaıratkeri Ashat Maemırov kishkentaı kórermenderdi jańa premeranyń ashylýymen quttyqtady.
Mýzykalyq jas kórermen teatry «Kúlshe qyz» mýzykalyq ertegisi arqyly óner jolyna qyzyǵýshylyqpen qaraıtyn daryndy jasóspirimder men balalardyń qııalyn qozǵap, olardy ónerge qyzyqtyryp, qanattandyrdy.
«Teatr repertýarynda alǵash ret balalarǵa arnalǵan orys tilindegi qoıylym sahnalanyp otyr. Biz osy ertegide basqa teatrlardan ózgesheleý etip jasadyq. Qoıylymda paralleldi eshkimge kedergisin tıgizbeıtin eki – Ertegishiler degen keıipkerlerdi qostyq. Olar spektakldiń basynan sońyna deıin júrip, avtor retinde úlken róldi júrgizedi. Sonymen qatar sahnadaǵy ártister kórermen balalardy ertegi álemine alyp ketý úshin balalarmen qarym-qatynas jasap otyrady. Sondyqtan da meniń oıymsha ınteraktıvti týyndy dep oılaımyn. Aldaǵy ýaqytta aǵylshyn tilinde sahnalaý josparymyzda bar. Biz qoıylymǵa eki aı ýaqyt daıyndaldyq. Ártister keremet oınap shyqty. Rejısser retinde ártisterdiń oıynyna, sahnanyń bezendirilýine rızamyn!», dedi qoıylymnyń rejısseri Rasýl Ýsmanov.
«Kúlshe qyz» ertegisi – teatrsúıer kópshilikke burynnan tanys áıgili ertegi. Ondaǵy aıtylatyn oı men ótetin oqıǵa jas kórermenniń kóńilin elitip, qııalyna qanat bitiretini sózsiz. Anasynan erte aıyrylǵan Kúlshe qyzdyń ómiri birde aıanyshty bolsa, endi birde ǵajaıyp oqıǵalarmen almasyp otyrady. Onyń ógeı sheshesi men odan týǵan eki ápkesi ártúrli qısynsyz áreketterimen Kúlshe qyzdy tek úı jumystaryna salyp qoıǵysy keledi. Alaıda baq ta, baqyt ta mańdaıyńa jazylǵan bolsa, oǵan kedergi bolatyn kúsh-qaırat joq. «Kúlshe qyz» ertegisi osyndaı oılardyń, aq pen qaranyń, shyndyq pen qııanattyń arasyndaǵy qaqtyǵystardy sýrettep, kórermendi taǵdyrdyń tylsym joldarynda ótetin tańǵajaıyp oqıǵalarǵa qaraı jeteleıdi. Erteginiń tárbıelik máni – kez kelgen adam aldynan kezdesken qıyndyqtarǵa shydap, moıymasa, aqyry bir jaqsylyqqa kez bolady.
