Onyń aıtýynsha, epıdemııalyq jaǵdaıdy qalypqa keltirý jáne memlekettik qoldaýdyń aýqymdy sharalary aıasynda aǵymdaǵy jyldyń qańtar-sáýir aılarynyń qorytyndysy boıynsha ekonomıka ósimi ótken jyldyń naýryz aıynan bastap alǵash ret oń aımaqqa shyǵyp, 0,7%-dy qurady. Daǵdarysqa qarsy sharalardyń 3 paketi qabyldanyp, iske asyryldy. Bul halyq pen bıznesti qoldaý jónindegi shuǵyl sharalar, áleýmettik-ekonomıkalyq turaqtylyqty saqtaý jónindegi jedel sharalar jáne ekonomıkalyq ósýdi qalpyna keltirý jónindegi keshendi jospar.
«Zardap shekken salalardaǵy 700 myń kásipker 1,2 trln teńge somaǵa salyq jeńildikterin aldy, kásipkerlerdiń 40 myń jobasy jeńildetilgen nesıeler aldy. Atalǵan jobalardyń kredıttik qorjyny 2 trln teńgeden asty. Jumyspen qamtýdy qoldaý sharalarymen 1,4 mln qazaqstandyq qamtyldy, bul eńbek naryǵyndaǵy turaqtylyqty qamtamasyz etýge jáne jumyssyzdyq deńgeıin ustap turýǵa múmkindik berdi», dedi Tımýr Jaqsylyqov.
Ol HVQ-nyń sáýir aıyndaǵy sholýynda Qazaqstannyń IJО́ ósiminiń boljamy 2021 jyly 3%-dan 3,2%-ǵa deıin jaqsarǵanyn habarlady. Moody's, Fitch jáne Standard & Poor's jetekshi reıtıngtik agenttikteri de pandemııaǵa deıingi reıtıngterdi rastady jáne Qazaqstan ekonomıkasynyń damýyna oń boljamdar berdi.
Álemdik trendter týraly aıta kele, ekonomıkalyq vedomstvo basshysynyń orynbasary pandemııa nátıjesinde álemdik jahandyq memlekettik qaryz jańa tarıhı maksımýmǵa jetkenin atap ótti. Bul salyqtan bosatý jáne salyqtyq demalystar berý, densaýlyq saqtaýǵa jumsalatyn memlekettik shyǵystardy ulǵaıtý, halyqqa tikeleı tólemder berý jáne basqa túrindegi fıskaldyq saıasat quraldaryn belsendi paıdalanýǵa baılanysty. Jahandyq qarjylyq qoldaý 14 trln dollarǵa jetti. Nátıjesinde, jahandyq memlekettik qaryz álemdik ekonomıkanyń rekordtyq 100% kólemine jaqyndady.
«Bul rette pandemııa qoǵam men ekonomıkany sıfrlandyrý prosesin qaıtymsyz etti. COVID-19 sıfrly ónimderge degen qajettiliktiń kúrt ósýine ákeldi, osylaısha IT-ındýstrııaǵa úlken qıyndyqtar týǵyzdy jáne sonymen qatar damýǵa serpin berdi. Nátıjesinde, pandemııaǵa deıin birneshe jyl qajet bolatyn sıfrlandyrý prosesi jedeldedi», dep atap ótti T.Jaqsylyqov.
Vıse-mınıstr ótken jyly barlyq oqýshylardyń 90%-dan astamy alǵash ret onlaın bilim alýǵa májbúr bolǵanyn, bul bilim sapasyna aıtarlyqtaı áser etkenin atap ótti. Keıbir baǵalaý nátıjesi boıynsha mektepterdiń jabylýyna baılanysty bolashaq kiris shyǵynynyń keltirilgen quny Azııanyń damýshy elderi úshin shamamen 1,25 trln dollardy quraıdy, bul 2020 jyly aımaqtyń IJО́-niń 5,4%-na teń.
«Qazaqstan halyqtyń ál-aýqatyn arttyrý jáne ekonomıkanyń turaqty ósýin qamtamasyz etý boıynsha uzaq merzimdi maqsattarǵa qol jetkizý úshin júrgizilip otyrǵan saıasattyń sabaqtastyǵy qaǵıdattaryn ustanatyn bolady. Úkimet 2025 jyly ShOB úlesin eldiń IJО́-ne 35%-ǵa deıin ulǵaıtý jáne álemde bıznes júrgizýge barynsha qolaıly jaǵdaılary bar úzdik 20 eldiń qataryna kirý maqsatyn qoıdy», dedi Ulttyq ekonomıka mınıstriniń birinshi orynbasary.
