Petropavlǵa sapar shekken «Taraz» birinshi kezeńde alań ıeleriniń qaqpasyna eki gol saldy. Dýbl avtory – Nenad Adamovıch. Biraq úzilisten keıin jaǵdaı kúrt ózgerdi. Qaqpashy Muhamedjan Seısenniń jibergen qatelikteri saldarynan «Qyzyljardyń» oıynshylary match aıaqtalǵanǵa deıin tarazy basyn teńestirdi – 2:2.
Almatyda «Qaırat» Qyzylordanyń «Qaısaryn» qabyldady. Bul oıynda 33-mınýtta Hose Kante Martınes soqqan jalǵyz gol báseke taǵdyryn sheshti – 1:0.
«Jetisý» qatarynan úshinshi kezdesýde jeńis toıyn toılady. Osy týrdy Túrkistannyń «Turanyna» qarsy ótkizgen taldyqorǵandyqtar alań ıeleriniń qaqpasyna jaýapsyz eki gol soqty. Esep – 0:2. Osy tabystarynyń arqasynda kósh sońynda kele jatqan «Jetisý» jarys kestesinde birneshe satyǵa joǵarlady.
Aqtaýda ótken «Kaspıı» men «Astana» arasyndaǵy báseke de asa shıelenisti ótti. Birinshi taımda qonaqtar eki dop aıyrmashylyǵymen alǵa shyqqanda, elordalyqtar endi jeńisti ýysynan shyǵara qoımas dep oılady. Biraq úzilisten keıin alań ıelerin eki márte nysanany dál kózdedi – 2:2.
Al osy týrdaǵy ózge matchtar mynadaı eseptermen aıaqtaldy: «Ordabasy» - «Shahter» 0:0, «Tobyl» - «Aqtóbe» 2:1 jáne «Atyraý» - «Aqjaıyq» 2:1.
Jarys kestesinde «Astana» jeke-dara alda keledi. Olardyń enshisinde 34 upaı bar. Ekinshi orynda – «Tobyl». Kósh basyndaǵy komandadan qostanaılyqtardyń úsh upaıy kem. Qorjynynda 24 upaıy bar «Qaırat» úshinshi oryndy ıelenýde.
