Jyl saıyn uıymdastyrylatyn dástúrli baıqaýdyń basty maqsaty – jastar arasynda otbasylyq qundylyqtardy dáripteý, ata dástúrden alystamaý. Ata dástúr demekshi, Dıdahmet Áshimhanovtyń «Sary samaýyr» degen áńgimesi oıǵa oraldy. Áńgimede ádet-ǵuryp túgili, úıdiń tirligine ıkemi joq jas kelin sonaý atadan balaǵa mıras bolyp kele jatqan samaýyrdyń keńirdegin qyzyl shoqpen kepteı bergen. Sóıtip júrip aýyzúıge kirip boıanǵan, kirpigin túzegen, qasyn julǵan... Sol eki arada samaýyrdyń sýy sarqylyp búıiri balqyp ketken eken. Bul jerde jazýshynyń aıtpaǵy, qazaqy dástúrimizdi sary samaýyrdaı joǵaltyp bara jatqandyǵymyz edi. Zamannyń aǵymyna qaraı ata-saltty túp-tamyrymen qaıtarmasaq ta «Aıaýly jas kelin» degendeı baıqaýlar kerek-aq.
– Aldyn ala irikteý kezeńi aımaqtyń ár qalasy men aýdandarynda ótti. Sodan sýyrylyp shyqqandar oblystyq deńgeıde óz aýdandarynyń namysyn qorǵaıdy, – dedi ShQO jastar ortalyǵynyń dırektory Araılym Esimbekova.
Birneshe kezeńnen turatyn baıqaýǵa Shyǵys Qazaqstannyń ár aýdanynan on alty kelin qatysty. Bári barynsha salt-dástúrden alystamaǵandyqtaryn dáleldedi. Alǵashqy kezeńde kelinder baýyrsaq pisirip, shaı qaınatyp, dastarqandy jaınatyp jiberdi. Ádilqazylar tarapynan qoıylǵan saýaldarǵa jaýap berdi. «As adamnyń arqaýy» atty bóliminde qazylar alqasyn qazaq ashanasynda umytylyp bara jatqan taǵamdardy daıyndap tań qaldyrdy. Sondaı-aq qazaqy kelinge tán óz ónerlerin de kórsetti.
Baıqaý bir kúndik bolǵanymen, kelinder jyl kóleminde daıyndaldy. Saıys bolǵandyqtan, biri-birinen basym túsýi zańdylyq. Qazylar alqasynyń sheshimimen úshinshi oryndy Aıagóz aýdanynyń kelini Erkejan Vadınova qanaǵat tutty. Ekinshi oryndy Shemonaıha aýdanynan qatysqan Janııa Hısabek enshiledi. Al Shyǵys Qazaqstan oblysynyń «Úzdik kelini» ataǵyna úrjarlyq Talshyn Iýsýpahýnova ıe boldy. Olardyń barlyǵy arnaıy dıplomdarmen jáne aqshalaı syılyqtarmen marapattaldy.
Aıta ketsek, baıqaýǵa qatysýshylar úı sharýasymen ǵana aınalysyp qoımaı, ártúrli salalarda eńbek etedi. Biri muǵalim bolsa, endi biri – dáriger. Arasynda memlekettik qyzmetkerler de bar edi.
Shyǵys Qazaqstan oblysy
