Rasymen, indet juqtyrǵandar sany azaıyp, jaǵdaı turaqtaldy ma degende álemniń bir buryshynan epıdemııalyq ahýaldyń ýshyǵyp kele jatqanyn estısiń. Tolqynnan – tolqynǵa ustanymymen ómir súrip júrgendeımiz.
Fýtboldan Eýropa chempıonaty ótip jatqan kórshiles Reseı qaıta dabyl qaǵa bastady. Alǵashqylardyń biri bolyp óz vaksınasyn shyǵarǵanymen, el bıligi halyqty jappaı vaksınalaýdy sátti ótkize almaǵan sekildi. Qazirgi ýaqytta Máskeýde indet juqtyrǵandar sany ótken jyldyń jeltoqsan aıyndaǵy deńgeıge jetti, al aýrýhanaǵa túsken naýqastar sany ótken aptamen salystyrǵanda 70 paıyzǵa ósken. Keıbir sarapshylar eki-úsh aptadan keıin el astanasyndaǵy aýrýhanalarda oryn jetpeýi múmkin dep eskertip otyr.
Sporttyq is-shara ótip jatqan Sankt-Peterbýrgtiń bıligi de qaýipsizdik sharalaryn kúsheıte bastady. 15 tamyzǵa deıin qaladaǵy memlekettik mekemelerdiń jáne ýnıtarlyq kásiporyndardyń qyzmetkerlerin vaksınalaý júrgiziledi. Sondaı-aq Sankt-Peterbýrg ákimshiligi 20 maýsymnan bastap Eýropa fýtbol chempıonatynyń fan-aımaǵyndaǵy kórermender sanyn 5-ten 3 myń adamǵa deıin qysqartty.
Reseılik densaýlyq saqtaý mamandary birneshe aıdan beri vırýstyń Úndistanda tabylǵan delta túri Reseıge jetip, tez taralatynyn eskertip kelgen. Keıbir dárigerler shetelden jáne Reseı aımaqtarynan kelgen fýtbol jankúıerleri qalada vırýstyń delta nusqasyn taratady dep qaýiptenedi.
Osyndaı qater Brazılııaǵa da tónip otyr. Eldegi COVID-19-ben baılanysty ólim sany 500 myńnan asty, bul – álemdegi ekinshi kórsetkish. Mamandardy vaksınalaýdyń baıaý júrýi alańdatýda. Pandemııa bastalǵaly beri el bıliginiń áreketine kóńili tolmaǵan halyq qaýipsizdik sharalary úshin bılikti kinálap otyr. Afrıka men Úndistanda da daǵdarys jalǵasyp jatyr.
Jaz aılaryndaǵy týrızm maýsymynan ekinshi jyl qur qalǵysy kelmegen Eýropa turǵyndardy vaksınalaýdy qarqyndy júrgizip, shekaradan tek ekpe alǵandardy ótkizbekshi. Jaqynda The Washington Post basylymy júrgizgen taldaý vaksınalaý qarqyndy júrgen aımaqta indet juqtyrǵandar sany az, al kerisinshe ekpe almaǵandar arasynda joǵary degen qorytyndyǵa kelgen. Bolashaqta vaksına almaǵan jandar úshin shekteý kóbeımeı me degen suraq týady. О́ıtkeni qazirdiń ózinde mamandar vaksınanyń mańyzyn arttyryp, indetpen kúresýdiń ózge joly joq ekenin aıtyp júr.
Maýsymnyń úshinshi jeksenbisinde medısına qyzmetkerleriniń kúnin atap ótken elder aq halatty abzal jandardyń eren eńbegin qaıtalap aıtýdan sharshamaıdy. Saladaǵy daǵdarysty, aýyrtpalyqty óz moınyna alǵan mamandardyń keńesi men eskertýine mán bermesek bolmaıdy. Osydan týra bir jyl buryn elimizdegi jaǵdaı kúrt ýshyǵyp, eń kúrdeli kezeńderdiń biri bolǵany esimizde. Sol sebepti indet tolyq joıylmaı, bosańsýdyń reti joq.
