Aýdany 67,7 ga jańa taý-ken-metallýrgııalyq keshenniń qurylysy 2020 jyly bastaldy. RG Processing kásiporyndy 2022 jyldyń úshinshi toqsanynda iske qospaq. Keshen Aqmola oblysynyń Býrabaı jáne Bulandy aýdandarynyń aýmaǵynda ornalasady, óndiristik úderistiń shıkizaty qosalqy qaryz alýshy kompanııa – RG Gold JShS Soltústik jáne Ońtústik Raıgorodok ken oryndarynda óndiretin bastapqy altyndy ken sanalady.
Jobany «Vernyı Kapıtal» kompanııalar toby taý-ken isindegi iri Resource Capital Funds tikeleı ınvestısııalar qorymen seriktese otyryp iske asyrady. RCF – taý-ken sektoryna ınvestısııalar salýǵa baǵyttalǵan jalpy basqarýdaǵy jeke tikeleı ınvestısııalar qorlarynyń toby. Top 1988 jyly qurylǵan, onyń ınvestısııalyq mandatyna qatty mıneraldy shıkizattyń barlyq túri jáne aktıvterdiń keń geografııasy kiredi. Qurylǵannan beri RCF 51 elde jobalary jáne shıkizattyń 30 túri bar 181 taý-ken kompanııasyna ınvestısııa saldy.
TKMK tehnologııalyq syzbasy kendi mınımaldy operasııalyq shyǵyndarmen jáne qorshaǵan ortany qorǵaý boıynsha álemdik standarttardy engizý múmkindigimen ońtaıly óndirý maqsatynda jobalanǵan. Jabdyq jetkizýshileri – jetekshi álemdik óndirýshiler, bul jobanyń uzaq merzimdi perspektıvada ekonomıkalyq tıimdiligin eleýli dárejede arttyrady.
Quramynda 88% altyny bar Dore qorytpasynyń quımalary tolyq kólemde óndiriletin ónimdi satýǵa uzaq merzimdi kelisimshart jasalǵan Qazaqstandaǵy affınaj zaýytyna satylmaq.
«Keshenniń qurylysy áli salynyp jatqandyǵyna qaramastan, daıyn ónimdi jetkizýge kópjyldyq kelisimshartqa qol jetkizdik. Dore qorytpasy ishki naryqta úlken suranysqa ıe, sebebi jyl saıyn bizde shamamen 5 tonna altyn óndiriledi. Altynnyń ótimdiligi joǵary jáne tasymaldanýy ońaı bolǵandyqtan, ony satýda qıyndyqtar týyndamaıdy», dedi RG Processing bas dırektory Loýrens Rossoý.
L.Rossoýdyń aıtýynsha, jobany iske asyrý ornyna fabrıkanyń resýrstyq bazaǵa jaqyn bolýyna baılanysty Aqmola oblysy tańdaldy, bul kendi tasymaldaý shyǵyndaryn edáýir azaıtpaq. Sonymen qatar óńirde qajetti ınfraqurylym damyǵan, joǵary bilikti kadrlar bar.
«Búgingi tańda Aqmola oblysy elde altyndy óndirý boıynsha aldyńǵy orynda tur. Sondyqtan ishki naryqtyń Dore qorytpasyna qajettilikterin qysqartýǵa qabiletti jańa fabrıkanyń dál osy jerde salynýy oryndy. Bul joba óńir úshin de mańyzdy, ıaǵnı óńirdiń ekonomıkalyq áleýeti artady, shamamen 1000 turaqty jumys orny men fabrıkanyń qurylysy kezeńinde 500 ýaqytsha jumys orny qurylady. Kásiporynnyń eldiń bıýdjetine aýdaratyn salyqtyq tólemderi jylyna 20 mlrd teńgeden asady. Banktiń ulttyq ekonomıkany turaqty damytý boıynsha negizgi mıssııasyn eskere otyryp, jobany iske asyrý esebinen eldiń altyndy strategııalyq qory eleýli dárejede tolysatynyn aıta ketý kerek», dep atap ótti QDB Klıenttermen jumys isteý jónindegi dıreksııasynyń aǵa bankıri Qasym Muhanbetov.
Damý banki 300 mln dollarǵa deıin, sonyń ishinde 217 mln dollar jáne 34,8 mlrd teńge mýltıvalıýtalyq qaryz usyndy. Qaryz alý merzimi – 9 jyl, QDB-nyń qarjy quraldary qurylys-montaj jumystary men jabdyqty satyp alýǵa jumsalady. Jobanyń respýblıkalyq ındýstrıalandyrý kartasyna engizilgenin eskere otyryp, qarjylandyrý Indýstrıaldy-ınnovasııalyq damýdyń memlekettik baǵdarlamasy (IIDMB) aıasynda da júzege asyrylatyn bolady.
