22 maýsymnan bastap Reseı Túrkııamen áýe qatynasyn ashady. Osy aıdyń basynda el bıligi Mysyrǵa tikeleı reısterdi qaıta bastaýǵa nıet bildirdi. Týrıstik sala sarapshylary bul jaǵdaılar Túrkııa men Mysyrǵa jasalatyn týrlardyń qunyna qazaqstandyqtar úshin áser ete me degen pikirimen bólisti.
Qazaqstannyń týroperatorlar qaýymdastyǵynyń prezıdenti Inna Reı týrısterdiń jańa kózi paıda bolǵandyqtan, Túrkııaǵa týrlardyń baǵasy qazir 30 paıyzǵa kóteriletinin aıtty.
«Ár eldegi qyzmetterdiń quny naryqtaǵy jaǵdaıǵa baılanysty bolady: tómen baǵalar kezeńi, joǵary baǵalar kezeńi bolady. Bul baǵyttyń qanshalyqty qoljetimdi jáne tartymdy bolýyna baılanysty. Týrıstik saladaǵy áriptester baǵalar 30 paıyzǵa kóteriledi deıdi. Bul reseılik naryqtyń ashylýyna baılanysty bolady. Týrlar týrıstik maýsymnyń sońynda ǵana arzan bolady. Mysyrda baǵanyń kóterilýine qatysty aıtar bolsam, mundaı ózgeris kútilmeıdi. Bul másele qazir dollar baǵamynyń ózgerýine baılanysty», dedi Inna Reı.
Nur-Sultan qalasyndaǵy týrıstik agenttiktiń dırektory Anna Obıdnık qonaqúılerdiń baǵasyn kóterile bastaǵany týraly aqparatpen bólisti.
«Mysaly, Belek qalasyndaǵy tanymal qonaqúılerdiń birinde demalys kúnderi týrdyń quny 300 eýroǵa kóterildi. Bul Túrkııanyń basqa qonaqúılerine de áser etýi múmkin. Mysyrda qazir baǵalar turaqty, biraq bári ózgerýi múmkin. Mysaly, Mysyrdyń Mersa-Matrýh kýrortynda baǵanyń ósýi múmkin. Bul jańa baǵytqa suranystyń artýyna baılanysty», dedi ol.