«Qazmedıa ortalyǵynda» Qazaqstan Respýblıkasy Prezıdentiniń buqaralyq aqparat quraldary salasyndaǵy syılyqtary men granttaryn tabystaý rásimi ótti.
Saltanatty is-shara barysynda Prezıdent Ákimshiligi Basshysynyń birinshi orynbasary Dáýren Abaev Memleket basshysy Qasym-Jomart Toqaevtyń BAQ qyzmetkerleriniń kásibı merekesine arnalǵan quttyqtaýyn oqydy.
– Sizder qashanda ult múddesin bárinen bıik qoıyp, el qamy úshin qalam tartyp júrsizder. Memleketshildik qundylyqty dáriptep, jasampazdyq pen jaqsylyqtyń jarshysy bolyp kelesizder.Aqparat salasyn damytýǵa memleket tarapynan qashanda erekshe kóńil bólinedi. О́z kásibiniń maıtalmany bolǵan qarymdy jýrnalısterge qoldaý kórsetiledi. BAQ salasyndaǵy dástúrli Prezıdent syılyǵy – sonyń bir kórinisi. Onyń ıegeri atanǵan azamattardyń esimi qazaq jýrnalıstıkasynyń jylnamasyna jazylatyny sózsiz. Jyl saıyn eń tańdaýly jýrnalısterge beriletin marapat osymen jıyrma besinshi ret tabystalyp otyr. Bul syılyqqa qasterli Táýelsizdigimizdiń 30 jyldyǵy qarsańynda ıe bolýdyń da sımvoldyq máni bar, – delingen Prezıdenttiń quttyqtaýynda.
Sodan keıin Dáýren Abaev Prezıdent syılyǵy men grantynyń ıegerlerin, Alǵysyn alǵan shyǵarmashylyq ujymdardy quttyqtady.
Memleket basshysynyń О́kimimen Qazaqstan Respýblıkasy Prezıdentiniń syılyǵy ««Habar 24» telearnasynyń jańalyqtar bóliminiń júrgizýshisi Zaharchýk Vera Nıkolaevnaǵa, «Qmonitor.kz» jelilik basylymynyń sholýshysy Isabaeva Sáýle Borısqyzyna, «Qazaq» jáne «Shalqar» radıolarynyń Almaty stýdııasynyń jetekshisi Qutpanbaev Baqyt Jaǵyparulyna, «Qazaqstan temir joly» ulttyq kompanııasy» aksıonerlik qoǵamynyń BAQ-pen jumys departamentiniń bas menedjeri Oıshybaeva Jannat Baqtyǵulqyzyna berildi.
Prezıdent granttaryn «AIQYN» respýblıkalyq qoǵamdyq-saıası gazetiniń bas redaktory Baıǵaraev Nurmuhamed Ismanuly, «KTK» telearnasynyń aqparattyq baǵdarlamalar dıreksııasy ortalyq redaksııasynyń redaktory Nuraqyn Dıas Ermekuly, «QAZAQSTAN» ulttyq telearnasy «Ashyq alań» qoǵamdyq-saıası tok-shoýynyń júrgizýshisi Tolyqbaev Maqsat Málikuly, «Munara» gazetiniń bas redaktory Hasanov Serikbol Tilepbergenuly ıelendi.
Qazaqstan Respýblıkasy Prezıdentiniń Alǵysy «Aqıqat» ulttyq qoǵamdyq-saıası jýrnalynyń, «Vechernıı Almaty» gazetiniń, «Qazaq radıolary» jaýapkershiligi shekteýli seriktestiginiń, «Saryarqa» telearnasynyń shyǵarmashylyq ujymdaryna tabystaldy.
Memleket basshysynyń Alǵys hattary elimizdiń barlyq óńirine jiberildi. Atalǵan marapattar ár aımaqtan úzdik dep tanylǵan jýrnalısterge saltanatty túrde tabys etiledi.
