27 maýsymdaǵy derek boıynsha oblysta 73 adamnan qaýpi zor dert anyqtaldy. Onyń ishinde oblys ortalyǵynan 54 naýqas bar. Al «Teńiz» kenishinde 12 jumysshy atalǵan ınfeksııany juqtyrǵan. Sondaı-aq Jylyoı, Isataı, Mahambet, Qurmanǵazy aýdandarynda jeti adamnan indettiń belgisi tabyldy.
Oblystyq densaýlyq saqtaý basqarmasynyń basshysy Ashan Baıdýálıevtiń málimetine qaraǵanda, aqpan aıynan beri Atyraýǵa 111 200 doza vaksına jetkizilipti. Onyń ishinde 92 700 doza Spýtnık V, 2 000 doza Qazvac, 9 500 doza Hayat-Vax jáne 7 000 doza CoronaVac vaksınasy bar. Ekpe salý úshin 31 stasıonarlyq, 10 jyljymaly beket ashyldy. Tarqatyp aıtqanda, Teńiz keń ornynda eki, «Atyraý», «Baızar» jáne «Dına» saýda ortalyqtarynda úsh, qala men aýdandyq emhanalarda 36 beket jumys istep tur.
– «Teńiz» ken ornynda vaksına alýshylar kórsetkishi qala men aýdandardaǵydan 6 esege joǵary bolyp otyr. Qazir vaksınany kóp alǵandardyń kóshin quqyq qorǵaý organdarynyń qyzmetkerleri bastap tur. Qazir bul salada vaksına alǵandar 154 paıyzdy quraıdy. Eń tómengi kórsetkish sozylmaly aýrýlary bar naýqastar (2,7%), stýdentter (6,3%) men pedagogter (35,2%) arasynda baıqalady, – deıdi A.Baıdýálıev.
Al oblystyq sanıtarlyq-epıdemıologııalyq baqylaý departamentiniń basshysy-bas sanıtar dáriger Mádenıet Tanaýovtyń deregine súıensek, karantındik shekteý sharalarynyń saqtalýyna 64 mobıldi top monıtorıng júrgizilip keledi. Jyl basynan 21 maýsymǵa deıin 9 761 reıdtik tekseris ótkizilip, 40 469 nysan qamtylǵan. Mobıldi toptar 432 buzýshylyqty anyqtady. Nátıjesinde, shaǵyn jáne orta bıznes nysandary men jeke tulǵalarǵa 42 mln 154 myń 359 teńgeni quraǵan 312 aıyppul salynypty.
Oblystyq densaýlyq saqtaý basqarmasynyń málimeti boıynsha, Atyraý oblysynda 397 adam úı jaǵdaıynda em alý úshin oqshaýlandy. Al modýldik aýrýhanada 131, №2 oblystyq aýrýhanada 97, aýdandardaǵy stasıonarlarda 65 adam hattamaǵa sáıkes em qabyldap jatyr. «Teńiz» ken ornynda ornalasqan ınfeksııalyq stasıonarda 47, ftızıopýlmanologııalyq ortalyqta 5 pasıent emdelip jatyr.
Munaıly óńir «qyzyl aımaqqa» qaıta engen soń qandaı shara qolǵa alynyp otyr? Osy oraıda aldymen bas sanıtar dáriger Mádenıet Tanaýovtyń karantındik shekteý sharalaryn kúsheıtetin qaýlyǵa qol qoıǵanyn aıtýǵa bolady. Jańa qaýly 28 maýsymda kúshine endi.
Qaýlyda Ashyq jobasyna qatysatyn áleýmettik-ekonomıkalyq obektilerdiń qyzmetin qospaǵanda oıyn-saýyq obektileriniń, banket zaldarynyń, jabyq úı-jaıdaǵy, sonyń ishinde qoǵamdyq tamaqtaný obektilerindegi balalar oıyn-saýyq ortalyqtary men attraksıondardyń, oıyn alańdarynyń (aýladaǵylardy qospaǵanda), túngi klýbtardyń, karaoke, kompıýterlik jáne oıyn klýbtarynyń, kalıan, bılıard, boýlıngterdiń, býkmekerlik keńselerdiń, mádenı nysandardyń, jeke, toptyq daıyndyqtardy qosa alǵanda kınoteatrlardyń, teatrlardyń, konsert zaldarynyń, fılarmonııalardyń, kórermenderi bar sporttyq is-sharalardy ótkizýge tyıym salynsyn» delingen.
Sondaı-aq senbi men jeksenbide azyq-túlik jáne azyq-túlik emes jabyq bazarlardyń, saýda úıleri men ortalyqtaryna (pavılondar, býtıkter), saýda jelileriniń, sport keshenderi, fıtnes ortalyqtar, sporttyq-saýyqtyrý obektileri, sport jáne jattyǵý zaldarynyń jumys isteýine tyıym salyndy. Mundaı tyıym saýnalar, SPA ortalyqtary, basseınderdiń jumysyna qatysty bolyp otyr. Bul nysandardyń keıbiriniń kúndelikti jumys kestesi tańǵy saǵat 7.00-de bastalyp, keshki saǵat 19.00-ge deıin jalǵasady. Qoǵamdyq tamaqtaný oryndary keshki saǵat 20.00-ge deıin isteıdi. Al sporttyq nysandar men saýnalar, SPA ortalyqtaryna túngi saǵat 22.00-ge deıin jumys isteýine ruqsat berilgen.
Atyraý oblysy
