Osylaısha, 2021 jylǵy 1 qarashadan bastap tańbalanbaǵan aıaqkıimdi óndirýge jáne el aýmaǵyna ákelýge tyıym salynady. Al bólshek saýda ókilderi tańbalanbaǵan taýar qaldyqtaryn 2022 jyldyń 1 qarashasyna deıin satyp úlgerýi kerek.
Joǵaryda aıtqanymyzdaı, aıaqkıimdi mindetti sıfrlyq tańbalaý 2021 jyldyń shildesinde engiziledi dep josparlanǵan. Alaıda ımporttaýshylardyń kóbi kúz-qys maýsymyna arnalǵan taýarlarǵa sheteldik óndirýshilerden aldyn ala jarty jylǵa erterek tapsyrys beredi. Sondyqtan kóktemde tapsyrys berilgen tańbalanbaǵan aıaqkıimder 1 shildege deıin Qazaqstan shekarasynan ótpeı qalý múmkin degen qaýip týyndaǵan edi.
– Endi naryqta jańa normalarǵa muqııat daıyndalý úshin taǵy bes aı jáne tańbalanbaǵan taýarlardyń qaldyqtaryn satý úshin bir jyldan astam ýaqyt bar. Bıznes úshin táýlik boıy sıfrlyq tańbalaý boıynsha jedel jeli jumys isteıdi. Sıfrlyq ekonomıkany damytý ortalyǵy únemi mamandandyrylǵan vebınarlar ótkizedi, sala ókilderine jeke keńester beredi. Aıaqkıimdi sıfrlyq tańbalaý týraly paıdaly aqparat markirovka.kz portalynda bar. Sondyqtan árbir kásipkerdiń naryqtaǵy jumystyń jańa erejelerine muqııat daıyndalý múmkindigi men ýaqyty jetkilikti, – deıdi Sıfrlyq ekonomıkany damytý ortalyǵynyń bas dırektory Bıkesh Qurmanǵalıeva.
Mindetti sıfrlyq tańbalaýdy engizýge keden qoımalary da daıyndalýda. Qoıma aýmaǵynda kedendik rásimder kezinde sheteldik zaýyttarda tańbalanbaǵan taýarǵa Data Matrix sıfrlyq kody bar stıkerler nemese etıketkalar ornatylady.
Esterińizge sala keteıik, taýarlardy sıfrlyq tańbalaý – EAEO deńgeıinde júzege asyrylatyn ultaralyq joba. Aıaqkıim salasy elimizde mindetti sıfrlyq tańbalaý engiziletin alǵashqy salalardyń biri. Mundaı sheshim naryqtaǵy kontrafakti deńgeıin eskere otyryp qabyldandy. Memlekettik kirister komıtetiniń dereginshe, aıaqkıimniń «kóleńkeli» naryǵy jalpy kólemniń shamamen 48,5 paıyzyna teń. Aıaqkıimniń sıfrlyq tańbalanýy naryqty «aǵartýǵa» jáne ony kontrafaktiden tazartýǵa yqpal etedi. Sonymen qatar atalǵan shara qoǵamdyq baqylaýdy kúsheıtýge múmkindik beredi. Naqty Onim mobıldi qosymshasy arqyly tutynýshylar tańbalanǵan taýardyń túpnusqalyǵyn ońaı teksere alady.
