Almatylyq kásipker Edige Ibraıymov qazaqtyń kıiz úıin jańa tehnologııalarmen jabdyqtap, ekologııalyq turǵydan taza, ári arzan qonaq úıge aınaldyrýdy maqsat tutyp otyr. Bul týraly «Qazaqstan» telearnasy habarlady.
Ol kıiz úıdi sheteldik týrısterdi tartatyn tabys kózi dep biledi. «Qazaq úı» dep atalatyn bul qonaq úı keshenine jańa jabdyqtar ornatylady. Onyń jasaǵan jobasy negizinde, jańasha kıiz úıde kún energııasynan elektr qýatyn óndiretin shaǵyn stansııa, baılanys pen kompıýter jelisi, basqarý jáne qaýipsizdik júıesi, aýa temperatýrasyn retteý quraldary bolady. Bul qonaq úılerdi kásipker «Omby–Maıqapshaǵaı», «Almaty–О́skemen» tas joldary boıyna ornalastyratyn bolady.
Osy joba iske asyrylsa, jolaýshylardyń jaıly tynyǵýyna múmkindik jasalǵaly otyr. Jalpy bul qonaq úı kóptiń kóńilinen shyqsa, ózge aımaqtarǵa da ornalastyrý isi qolǵa alynady.
Baqytbek Keneshuly.
Derekkóz: «Qazaqstan» telearnasy
Foto: «Qazaqstan» telearnasy.
