Qyrǵyzstan musylmandary ýlemi keńesi Rahmatýlla ajy Egemberdıevke mýftı oryntaǵynan óz erkimen ketýdi usyndy. Bul týraly Ras.kz habarlady.
Qyrǵyzstan telegraf agenttiginiń aqpary boıynsha, 7 qańtarda Qyrǵyzstan musylmanlary ýleminiń resmı emes otyrysy bolyp, onda mýftıge oryntaǵynan óz erkimen ketý usynyldy. Ol buǵan kelisip, endi resmı túrde óz sheshimin jarııalaıtyn kórinedi.
Agenttiktiń málimdeýinshe, jańa mýftıdiń ornyna Bishkek qalasynyń qazysy qyzmetin atqarǵan, qazir «Tablıgı Djamaat» qaýymdastyǵynyń basshysy Maqsat Tolomýshov taǵaıyndalýy múmkin.
Mýftıge qatysty janjal Jańa jyldyń aldyndaǵy kúnderde ınternette onyń qatysýymen bolǵan ıntımdik sıýjetti usynǵan vıdeo paıda bolǵannan keıin kóterildi. Onda ajynyń bir jas áıelmen ámpeı-jámpeı bolyp jatqany túsirip alynypty. Shý kóterilgennen keıin Egemberdıev kadrdaǵy kelinshektiń ıslam zańy boıynsha alǵan óz áıeli ekenin málimdedi.
Aıta ketetin jaıt, Qyrǵyzstan zańnamasynda kóp nekelilikke tyıym salynǵan. Alaıda, keıbir erkekter zańdy aınalyp ótip, musylman jolymen degen jeleýmen basqa qosymsha áıelder alyp jatady. Olardyń nekeleri meshitterde qıylady.
Qyrǵyzstan musylmandary ýlemi keńesi Rahmatýlla ajy Egemberdıevti 2012 jylǵy jeltoqsanda Qyrǵyzstan musylmandary dinı basqarmasynyń burynǵy basshysy salyq tóleýden jaltarǵany úshin qyzmetinen alynǵan kezde saılaǵan edi.
Jalpy, sońǵy tórt jylda Qyrǵyzstanda jemqorlyq janjalyna baılanysty 5 mýftı aýysyp úlgerdi.
Aıdar О́risbaev.
Derekkóz: Ras.kz
Foto: Tengrinews.kz
