Jaqynda Aqtóbe qalasynda biregeı «Dostyq» sý sporty ortalyǵy paıdalanýǵa berildi. Ortalyqtyń kireberisine kerilgen kók lentany oblys ákimi Arhımed Muhambetov pen sport ardageri Kádirjan Izǵarın qıdy.
Jaqynda Aqtóbe qalasynda biregeı «Dostyq» sý sporty ortalyǵy paıdalanýǵa berildi. Ortalyqtyń kireberisine kerilgen kók lentany oblys ákimi Arhımed Muhambetov pen sport ardageri Kádirjan Izǵarın qıdy.
50 metrlik basseıni bar sý sporty ortalyǵynyń ashylýynda óńir basshysy 2012 jyly 40-tan astam jasandy jamylǵyly shaǵyn sport alańdary, at sporty mektebi, «Avıator» stadıony iske qosylǵanyn tilge tıek ete kelip, Elbasynyń buqaralyq sportpen aınalysýshylardyń sanyn 2020 jylǵa qaraı 30 paıyzǵa jetkizý jónindegi tapsyrmasyn merziminen buryn oryndaýdyń alǵysharty bar ekenin jetkizdi. Onyń aıtýynsha, qazirdiń ózinde óńirde buqaralyq sportqa tartylǵandar oblys halqynyń 25 paıyzyn quraıtyn kórinedi. Mundaı biregeı sý sporty ortalyǵy oblysta birinshi ret paıdalanýǵa berilip otyr.
Ákimshilik korpýs pen basseın zalynan turatyn ortalyqtyń qurylysyn júrgizgen «Interstal» JShS bir jarym jylda osyndaı biregeı nysandy iske qosty. Ǵımarattyń aýmaǵy 9182,5 sharshy metrdi quraıdy. Bul basseınde sporttyq jáne sınhrondy júzýmen, sý dobymen aınalysýǵa bolady. Uzyndyǵy 50 metrlik on joly bar basseın zamanaýı quraldarmen jabdyqtalǵan. Sýynyń tereńdigi 2-3 metr bolady. Munyń ózi sý doby, júzý jáne sınhrondy júzý sııaqty sport túrlerinen Azııa jáne Qazaqstan chempıonattaryn, ashyq týrnırler men oblys jáne qala birinshilikterin, halyqaralyq jarystardy ótkizýge múmkindik beredi. Munda jarystardyń nátıjeleri kórsetiletin kólemi 9h6 metrlik elektrondy tablo ornatylǵan. Basseın táýligine 16 saǵat jumys isteıdi. Bir aýysymda júzý sportymen 250 adamǵa deıin aınalysa alady.
Sý sporty ortalyǵynda zamanaýı sporttyq quraldarmen jabdyqtalǵan aýdany 203 sharshy metr sport, gımnastıka jáne sportaldy daıyndyq zaldary, er adamdar men áıelderdiń kıinetin jáne jýynatyn oryndary men saýnalar, býfet, dárigerlik jáne basqa bólmeler bar. Bul ortalyqty salyp, kerek-jaraqpen qamtamasyz etýge 1 400 mıllıon teńgeden astam qarjy jumsalǵan.
Satybaldy SÁÝIRBAI,
«Egemen Qazaqstan».
Aqtóbe oblysy.
