• 14 Qańtar, 2014

Shalqyǵan yrys, shat turmys

320 ret

kórsetildi

2 mın

oqý úshin

Egemen Qazaqstan

«Rodına» agrofırmasynyń keshegisi men búgingi tirshiligine kóz salǵan kisi eleske de baǵynbaıtyn ózgerister qushaǵynda tolǵanatyny bar. El ómirindegi eleýli oqıǵalardyń bári osynda. Sharýashylyqqa jurtty jumyldyra biletin, qıyndyqqa qaıyspaýǵa baýlıtyn basshy buıyrǵan eken. Mundaǵylar «Rodınanyń» artta qalýǵa haqysy joqtyǵyn túsinedi.

Búgingi kúni zamanalyq agroqalashyqqa aınalǵan sharýashylyq kóp salaly qyzmet atqarady. Sońǵy úsh jyl qatarynan munda jyl saıyn 2,5 mıllıard teńgeniń ónimi óndirilip, ár jumysshyǵa shaqqandaǵy eńbek ónimdiligi 35 myń dollarǵa jetip otyr. Jalpy, ónimniń 35 paıyzy mal sharýashylyǵynyń úlesinde. Elbasy júktegen mártebeli mindet – Astananyń azyq-túlik beldeýin qamtamasyz etýdegi eginshiler úlesi de salmaqty. Dıqandar «onúshinshi» eńbekaqyny qospaǵanda, aıyna150 myń, malshylar 100 myń teńgeden kem jalaqy almaıdy.

О́tken jyly Rodınada toı kóbeıip, 20 bóbek dúnıege keldi. Bul úlken mereke. Munda jas jubaılarǵa 100 myń teńge, sábı týǵanda 100 myń teńge qarjylaı saýǵa jasaý dástúri bar. «Altyn belgi» granty, stýdenttik shákirtaqy da osynda. Ortalyqtan jylytylatyn jaıly úıde turatyn rodınalyqtar sý men jylý qunynyń 40 paıyzyn, azyq-túlik ónimderiniń 20 paıyzyn ǵana tólep, nandy 25 teńgeden satyp alady. Mundaı jeńildik aýyldaǵy 230 zeınetker men 117 bıýdjettik mekeme qyzmetkerlerine birdeı dárejede qarastyrylǵan. Jas mamandar Jańa jyldy «Jastar» shaǵyn aýdanyndaǵy jarqyraǵan jańa turǵyn úılerde qarsy aldy.

Elbasy Nursultan Nazarbaev Qazaqstan Táýelsizdiginiń 22 jyldyǵyna arnalǵan saltanatta sharýashylyq dırektory Ivan Saýerdiń omyraýyna Qazaqstannyń Eńbek Eri Altyn juldyzyn taqty. «Rodınanyń» altyn dáýiri jalǵasa bermek.

Baqbergen AMALBEK,

«Egemen Qazaqstan».

Aqmola oblysy,

Selınograd aýdany.

Sýretterdi túsirgender Ermurat Dosymov, Igor Býrgandınov.