Jıyrmasynshy ǵasyrdyń saıası keńistiginde onyń qoltańbasy aıqyn kórinedi. Beısaıası biligi, sózge ustalyǵy hám oıǵa súleıligi samarqaý aqylyńdy ashytyp, tolǵaýy toqsan kóńilińdi tolqytatyny taǵy ras. Susty qabaǵymen-aq isti tyńdyratyn sarabdal saıasatkerdiń ántek ádetin álem áli qansha ýaqyt jyrlar eken.
Buǵan deıin Cherchılldiń qabaǵyna qarap, oı qorytqanymyz bar. Qatýly qaıratkerdiń shylymyn qolynan tartyp alyp, sýretke tartqan fotograf Iýsýf Karshtyń erligi el esinde. Tanymal jýrnaldardyń muqabasynan túspeı, onyń ataqty týyndysyna aınalǵan-tuǵyn. Endi qarańyzshy, Sotheby’s dúkeninde Ýınston Cherchılldiń súıikti vıskıi beınelengen «Qumyralar men bótelkeler» kartınasy satylymǵa shyǵypty. Sýretshilik qyrymen de kózge túsken brıtandyq kóshbasshynyń týyndysy táp-táýir dúnıe hám ózindik taǵdyry bar. Tipti sol saladaǵy belgili óner maıtalmandarynyń joǵary baǵasyna ıe bolǵanymen qymbat.
Jalpy, saıasatker ómirinde eki nársege asa qumar bolǵan. Onyń biri – keskindeme óneri bolsa, ekinshisi – ishimdik. Árbir kúniniń álqıssasyn soda qosylǵan vıskımen bastaıtynyn aqparat ókilderi kúni búginge deıin kúlki qylady-mys. Cherchılldiń ózi ony súıikti ádeti esebinde eske alyp, kózi tirisinde mıyǵynan kúlgen de qoıǵan. Bul kartınanyń burynǵy kartınadan ózgesheligi sol, onyń eń jaqsy kórgen ishimdigi Johnnie Walker jazylǵan. Brendtiń erekshe qara jáne altyn dıagonaldi japsyrmasy osy natıýrmortta aıqyn kórinedi.
Cherchıll 1890 jyly Úndistannyń soltústik-batys shekarasynda qyzmet etip júrgen kezinde vıskıdiń alǵash ret dámin tatyp kóredi. «Sý ishýge jaramady. Al ony óńeshten ótkizý úshin azdap vıskı qosýǵa týra keldi. Yntaly kúsh-jigerdiń nátıjesinde ony súıýdi úırendim», dep tolǵanady keıinirek ózi. Ekinshi dúnıejúzilik soǵystyń bastalýymen vıskı onyń kúndelikti ómiriniń ajyramas bóligine aınalady.
Astyq tapshylyǵy Shotlandııada spırt zaýyttarynyń jabylýyna ákelgende, iske ózi aralasyp, kásiptiń jandanýyna jol ashady. 1945 jyly mamyrda premer-mınıstr bul qareketin bylaı túsindirdi: «Qandaı da bir jaǵdaı bolsyn, eshqashan vıskı úshin arpany azaıtýǵa bolmaıdy. Bul baǵa jetpes eksport. Eksportqa baılanysty basqa da qıyndyqty eskere otyryp, Ulybrıtanııaǵa ǵana tán bul artyqshylyqty eskermegenimiz aǵattyq bolady. Tabys kózine aınalǵan bul elementti saqtamaý ábestik», deıdi halyqty sabyrǵa shaqyryp.
Nárkez natıýrmort 1930 jyly avtordyń Kenttegi úıinde jazyldy. Kenep betindegi Johnnie Walker men Black Label bótelkesi kózge ottaı basylady. Kúmis tabaq ústindegi sharap quıatyn shynylar ádemi úılesim tapqandaı. Túster men zattardy oınata otyryp úılestirý hám jaryqqa ár berý onyń dosy jáne beıneleý ónerdegi tálimgeri Ýılıam Nıkolsonnyń áserinen týǵan dúnıe bolsa kerek. Sýretshi men saıasatker tabıǵat aıasynda peızajdardy birge jazǵan, al qolaısyz aýa raıynda olar natıýrmorttarmen jumys istegen. Qyzyǵy sol, sondaı sátterde saıasatker qyzmetkerlerine shyǵarmasyna arqaý bolar zattardy izdeýdi tapsyrady eken. Bul erikkendik bolyp kórinýi múmkin, dese de Cherchıll qolyna qylqalam alǵanda dúnıeden jyraq ómir súrgendeı.
Qarańyzshy, qumyralar men shynylarǵa shaǵylysqan sáýleler áınekke órnek salǵandaı. Bul natıýrmortta 1937 jyly jazylǵan sheber Nıkolsonnyń patsha kolleksııasyna engen «Altyn sheńber» týyndysyndaǵy detaldary bar. Cherchıll óziniń natıýrmortyn kórnekti tulǵa, kásipker hám dıplomat Averell Garrımanǵa syılaıdy. Ol 1940 jyldary Rýzvelttiń basshylyǵymen Eýropadaǵy arnaıy elshi qyzmetin atqarǵan edi. Jumys barysynda talaı márte Cherchıllmen dıdarlasyp, dosyna da aınalǵan. Sodan soń 1943 jyldyń qazan aıynda Keńes Odaǵyna elshi bolyp taǵaıyndalady. Keıin 1975 jyly álgi Garrıman «Cherchıll men Stalın kezindegi arnaıy ókil. 1941-1946 jj.» atty memýar jazady.
Aıtpaqshy, amerıkalyq dıplomat Ulybrıtanııa premer-mınıstriniń jalǵyz uly Randalftyń áıeli Pamelamen ońashada til tabysqan kórinedi. Bul qarym-qatynastan saıasatker beıhabar bolǵan syńaıly. Sóıtip kelini 1971 jyly Garrımanǵa turmysqa shyǵyp, onyń úshinshi áıeli bolady. Muny nege aıtyp otyr deısiz ǵoı, 1986 jyly Averell qaıtys bolǵannan keıin syılyqqa kelgen natıýrmort Pamelanyń ómiriniń sońyna deıin birge bolady. 1997 jyly kartınany amerıkalyq kásipker Ira Lıpman satyp alypty. Ol qaıtys bolǵannan keıin, ataqty shyǵarma qaıtadan satylymǵa qoıylyp otyr.
Endi Cherchılldiń natıýrmortynyń quny 250 myń fýnt sterlıng, ıakı 280 myń eýro turady. Bizdiń teńgege shaqsaq, bir oblystyń jyldyq bıýdjetinen kóp. Sondyqtan dámelenbeı-aq qoıalyq. Cherchılldiń talantyn túkke turǵysyz dep tanyǵandar da bar. Kezinde «Nıý-Iork Taıms» gazeti atalǵan natıýrmortqa «Bótelkeler» dep at qoıyp, synǵa alǵan bolatyn. Áıtse de ony oqyrman qulaǵyna da qystyrǵan joq. Syrbaz saıasatkerdiń kartınalary aýksıonda bedelin túsirgen emes. Oǵan mysal qyzy Merı Sýmeske tıesili «Chartelldegi altyn balyqtar toǵany» peızajy. 2014 jyly ol Sotheby’s-te 1,8 mıllıon fýntqa satyldy.
