nemese jaqsy iske umtylǵan jan jaıbaraqat otyra almaıdy
Jambyl oblysynyń ákimi Kárim Kókirekbaev merekelik demalys bes kún eken dep, jaıbaraqat jatyp alǵan joq. «Baı dúısenbini» beımaral kútse, tulpardaıyn tyqyrshyǵan ýaqyttyń talaı isten qur qaldyratyny anyq. Sondyqtan jańa jyldyń alǵashqy senbisin Qordaı aýdanyn aralaýdan bastady.
nemese jaqsy iske umtylǵan jan jaıbaraqat otyra almaıdy
Jambyl oblysynyń ákimi Kárim Kókirekbaev merekelik demalys bes kún eken dep, jaıbaraqat jatyp alǵan joq. «Baı dúısenbini» beımaral kútse, tulpardaıyn tyqyrshyǵan ýaqyttyń talaı isten qur qaldyratyny anyq. Sondyqtan jańa jyldyń alǵashqy senbisin Qordaı aýdanyn aralaýdan bastady.
Oblystyń ońtústik-shyǵysyn alyp jatqan Qordaı aýdanynyń jeri, negizinen, taýly-tastaqty bolyp keledi. Soltústik jáne shyǵys bóligin bıiktigi teńiz deńgeıinen 1000 metrden asatyn Shý-Ile taýlary orap jatyr. Kindiktas, Jetijol sııaqty taý jotalary aýdannyń ortalyq jáne ońtústik-shyǵys bóligin qamtyǵan. Eger janyńyzǵa jazyqtaý jer kerek bolsa, onda Shý ańǵaryna qaraı baryńyz.
Ákim jumys sapary aıasynda aýdandaǵy áleýmettik nysandardyń tynys-tirshiligimen jáne osynda tútin tútetken kásipkerler júzege asyryp jatqan jobalardyń betalysymen, baǵyt-baǵdarymen tanysty. Sonyń biri – jeke kásipkerlerdiń qarjysyna salynǵan Otar aýylyndaǵy kún elektr stansasy. Oblystyń burynǵy ákimi Qanat Bozymbaev tusaýyn kesken bul stansa ónerkásiptik deńgeıde jumys isteıtin, sonymen birge, ortaq elektr júıelerine qosylǵan, óz elektr qýatyn eldiń birtutas energııa júıesine jetkizetin memleketimizdegi eń alǵashqy qýat kózi bolyp esepteledi. Stansanyń qýaty aldaǵy ýaqytta 7 MVt-ǵa deıin jetedi dep kútilýde.
Otar beketinen Kenen aýyly onsha alys emes. Oblys ákimi aqyn ómir súrgen aýyldan salynyp jatqan 600 oqýshyǵa arnalǵan mekteptiń qurylys jumysymen de tanysty. Quny 844,3 mln. teńge bolatyn bilim ordasynyń qurylysy 2011 jyly bastalypty. Biraq jumys barysy tym sozylyp ketipti. Oblys ákimine atbasyn burǵyzǵan másele de osyǵan alańdaýshylyq sııaqty kórindi. Ákimdi nysandaǵy jumys barysymen tanystyrǵandar bilim oshaǵynyń qurylysy ústimizdegi jyldyń birinshi jartysynda aıaqtalady dep sendirdi.
«Vista International» kompanııasy Muzbel aýylynda qaıta qalpyna keletin energııa kózderi baǵytyndaǵy jobalaryn júzege asyryp jatyr. Olar ótken jyly jalpy qýaty 21 MVt quraıtyn Qordaı jel elektr stansasynyń 4 MVt quraıtyn alǵashqy kezeginiń qurylysyn aıaqtaǵan bolatyn. Jamaǵattyń ıgiligi úshin jeldi de jumysqa «jekken» aýylda búginde 13 adam turaqty jumyspen qamtamasyz etilipti.
Kenen aqyn jyryna qosqan Qordaı óńiri kenge de baı. Sondyqtan aýdandaǵy óndiris salasy da qarqyndy damyp keledi. Mine, sońǵy jyldary Qordaıdyń altyny men kúmisin óndirý jobasy da tabysty júzege asyryla bastady. «Central Asia Gold Production» kompanııasy bul jobany 2012 jyly bastaǵan bolatyn. Kompanııa basshylarynyń aıtýynsha, munda bir jylda 500 kg altyn men kúmis óndirýge bolady eken. О́nerkásiptegi atqarylǵan ońdy ister baǵaly metall óndirýge barynsha den qoıǵan kompanııanyń alǵa qoıǵan maqsattarynyń aıqyn ekenin bildiredi.
Aýdandaǵy «Kýlıkov sút ónimderi» JShS sútti qaıta óńdeý jáne sút ónimderin óndirýmen aınalysady. Ol jylyna 3,6 myń tonna sút ónimderin shyǵarady. Búginde 50 adam jumys istep jatqan kásiporynnyń quny ıelerine 150 mln. teńgege túsipti. Kanadadan et baǵytyndaǵy 221 bas qyzyl angýs jáne gereford asyl tuqymdy iri qara mal aldyrǵan seriktestiktiń tabysy men Qasyq aýylyna tabıǵı gaz jetkizýge baryn salǵan qurylysshylar qarqyny da oblys ákiminiń oıynan shyqty. Búginde bul aýyldaǵy 745 úıdiń 160-yna tabıǵı gaz jetkizilipti.
Kósemáli SÁTTIBAIULY,
«Egemen Qazaqstan».
Jambyl oblysy,
Qordaı aýdany,
Qordaı aýyly.
