Qazaq folklorynyń 100 tomdyǵynyń jarııalanýy – eldigimizdi eńselenter eren oqıǵa. Parlament Májilisiniń keshegi otyrysynda depýtat Aldan Smaıyldyń Úkimet basshysy Serik Ahmetovtiń atyna joldaǵan saýalynyń mánin bir sóılemmen osylaısha túıip aıtýǵa bolady. Saýalda bylaı delingen:
* Memleket mereıi
Qazaq folklorynyń 100 tomdyǵynyń jarııalanýy – eldigimizdi eńselenter eren oqıǵa. Parlament Májilisiniń keshegi otyrysynda depýtat Aldan Smaıyldyń Úkimet basshysy Serik Ahmetovtiń atyna joldaǵan saýalynyń mánin bir sóılemmen osylaısha túıip aıtýǵa bolady. Saýalda bylaı delingen:
Qurmetti Serik Nyǵmetuly!
Ultymyzdyń dáýirlerdi sóıletken baı folklory – qazaq ádebıeti men mádenıetiniń qaınar kózi, halyqtyń teńdesi joq rýhanı qundylyǵy.
«Egemen Qazaqstan» respýblıkalyq gazeti» aksıonerlik qoǵamynyń prezıdenti Saýytbek Abdrahmanov osy aýyz ádebıetine qatysty myna bir oqıǵany atalǵan basylym betinde (7.HII.2013 j.) bylaı dep eske alady: «2004 jyly «Mádenı mura» baǵdarlamasyn jańa qolǵa alyp jatqan shaqta Aqparat mınıstri retinde AQSh-tyń sol kezdegi elshisi Elızavet Djons hanymmen kezdesýim kezinde mınıstrlik jumysyn áńgimeleı kelip, Elbasy Nursultan Nazarbaevtyń bastamasymen qolǵa alynǵan «Mádenı mura» baǵdarlamasynyń aıasynda 100 tomdyq qazaq folklory shyǵarylatynyn aıtqan edim. Sózimdi elshilik qyzmetkeri aýdaryp bolysymen mınıstrliktiń adamy: «Durys aýdarǵan joq», dep qaldy. Sóıtti de, ózi bir tusyn qaıta aýdaryp berdi. Sóıtsek, elshilik qyzmetkeri meniń «júz tomdyq» degenimdi mınıstr jańylys ketken bolar dep, ózinshe «túzetip» «on tomdyq» dep aýdarǵan eken... Sonda Batys adamynyń uǵymynda bizde júz tomdyq folklor bolýy múmkin, onyń báriniń basy qosylyp, sondaı kólemde shyǵarylýy múmkin degen oıdyń ózi bolmaı turǵany ǵoı».
Jaqynda Prezıdent bastamashy bolǵan osy «Mádenı mura» baǵdarlamasynyń eń bir iri jobasy – qazaq folklorynyń 100 tomdyq «Babalar sózi» jınaǵyn shyǵarý jumysy aıaqtaldy. Mundaı basylym álem mádenıetiniń tarıhynda buryn-sońdy bolǵan emes. Dúnıe dıdarynda folklory júz tomdy quraıtyn basqa ult bar bolsa, bar da shyǵar, biraq folkloryn júz tomǵa jınap, bastyryp shyǵarǵan álemdegi jalǵyz ult – qazaq ekeni anyq. Bul – álemdik máni bar oqıǵa, ult retinde maqtanysh etetin rýhanı jetistigimiz. Sondyqtan, Bilim jáne ǵylym mınıstrliginiń M.O.Áýezov atyndaǵy Ádebıet jáne óner ınstıtýtynda álemdik deńgeıdegi folklorshymyz, akademık Seıit Qasqabasovtyń jetekshiligimen bastalyp, jerine jetkizilgen, Mádenıet jáne aqparat mınıstrliginiń qamqorlyǵymen Astanadaǵy «Folıant» baspasynda kórkem bezendirilip, sapaly qaǵazǵa basylǵan «Babalar sózi» serııasynyń aıaqtalýy memleket ómirindegi eleýli rýhanı-mádenı beles retinde qaralýy kerek. Osy oqıǵaǵa tıisinshe mán berilip, úkimet deńgeıinde kóńil bólinýi, eldiń ishinde de, syrtynda da laıyqty nasıhattalýy qajet dep sanaımyz. Atap aıtqanda, 100 tomdyqtyń IýNESKO-nyń Shtab-páterinde, Maındaǵy Frankfýrt qalasyndaǵy kitap kórmesinde tusaýkeserin ótkizý, álemdik tilderdegi salmaqty jýrnaldarda ǵylymı maqalalar jarııalaý, osy oqıǵaǵa oraılastyrylǵan halyqaralyq ǵylymı konferensııalar uıymdastyrý, dúnıejúzindegi eń tanymal kitaphanalardyń qorynda osy qundy basylymnyń bolýyn qamtamasyz etý qajet. Osyndaı aýqymdy da ózekti sharalardy atqarý jóninde Bilim jáne ǵylym, Mádenıet jáne aqparat, Syrtqy ister mınıstrlikterine tıisti tapsyrmalar berýińizdi suraımyz. Biz osylaı eldik rýhymyzdy asqaqtata túseıik.
Aldan SMAIYL,
Qazaqstan Respýblıkasy
Parlamenti Májilisiniń depýtaty.
