Keshe Memleket basshysynyń Qazaqstan halqyna Joldaýy jarııalanǵannan keıin Qazaqstan halqy Assambleıasynyń arnaıy keńesi ótti. Oǵan Assambleıadan saılanǵan Parlament Májilisiniń depýtattary, Assambleıa keńesiniń músheleri jáne respýblıkalyq etno-mádenı birlestikterdiń basshylary, Assambleıanyń ǵylymı-sarapshylyq keńesiniń músheleri qatysty.
Keshe Memleket basshysynyń Qazaqstan halqyna Joldaýy jarııalanǵannan keıin Qazaqstan halqy Assambleıasynyń arnaıy keńesi ótti. Oǵan Assambleıadan saılanǵan Parlament Májilisiniń depýtattary, Assambleıa keńesiniń músheleri jáne respýblıkalyq etno-mádenı birlestikterdiń basshylary, Assambleıanyń ǵylymı-sarapshylyq keńesiniń músheleri qatysty.
Keńes aıasynda sóz alǵan Qazaqstan halqy Assambleıasy Tóraǵasynyń orynbasary – Hatshylyq meńgerýshisi Eraly Toǵjanov Elbasynyń Joldaýdaǵy negizgi taqyryp – eń aldymen, el damýynyń naqty baǵytyn belgileý, onyń ishinde «Máńgilik El» týraly oı ekendigine toqtaldy. «Táýelsizdigimizdiń eń alǵashqy kúnderinen bastap aıtylyp júrgen, kún tártibinde turǵan suraqtardyń biri desek, artyq bolmaıdy dep oılaımyz. «Máńgilik El» – ol eń birinshiden, bizdiń táýelsizdigimizge baılanysty. Táýelsizdigimiz el birligimen baılanysty. Al el birligi qoǵamdyq kelisimmen baılanysty. Sondyqtan, Joldaýda kóterilgen máselelerdiń barlyǵy, onyń ishinde ekonomıkalyq, áleýmettik máseleler qoǵamdyq kelisimge baǵyttalǵan.
Budan keıingi kezekte sóz alǵan Assambleıa keńesiniń múshesi, Májilis depýtaty Rozaqul Halmuradov «Máńgilik El» Patrıottyq aktisiniń mańyzyna toqtalyp ótti. «Elbasy Assambleıaǵa barlyq etnos ókilderin toptastyrdy. Al Elbasy atap ótkendeı, «Máńgilik El» bolý úshin eń basty qajetti nárse – halqymyzdyń birligi. Qoǵamdyq kelisim, turaqtylyq, tatýlyq. Demek, Qazaqstan halqy Assambleıasynyń negizgi mindeti – osy. Osyǵan biz uıytqy bolyp, osy ıdeıanyń basy-qasynda júrýimiz kerek.
Assambleıa keńesiniń taǵy bir múshesi, Parlament Májilisiniń depýtaty Ahmet Mýradov Elbasy Joldaýynda aıtylǵan «Máńgilik El» ıdeıasyn júzege asyrýmen birge Assambleıanyń aldyna jańa maqsat-mindetter qoıylatyn bolatynyn jetkizdi. «Aldaǵy ýaqytta biz ártúrli etnos ókilderimen birge bas qosa otyryp, osy maqsat-mindetterdi júzege asyrýdyń joldaryn qarastyratyn bolamyz. Memleket basshysy óz Joldaýynda aıtqan «Máńgilik El» Patrıottyq aktisi túrli teorııalyq erejeler kórinis tapqan jaı ǵana qujat bolmaýy kerek. Bul patrıottyq aktige biz ult, qoǵam, oı birligin aıqyndaıtyn tetikterdi, bizdiń tutas el bolý jolynda tájirıbemizdi shoǵyrlandyrýymyz kerek. Demek, árbir qazaqstandyq, árbir Assambleıa múshesi óziniń budan keıingi taǵdyryn da Qazaqstanmen baılanystyra qaraıtyn bolsa, bir-birimizge, degen qarym-qatynasta shynaıy bolýymyz qajet.
Bolgar etno-mádenı birlestiginiń tóraǵasy Oleg Dymov Elbasynyń Joldaýynda aıtylǵan máseleler memleketti alǵa jyljytýda alǵyshart bola alatynyn atap ótti. «Elbasy Qazaqstan halqyna Joldaýy arqyly óziniń kóregendigin taǵy bir dáleldedi. Joldaýda aıtylǵan máselelerdiń ózeginde halyqtyń áleýmettik jaǵdaıyn jaqsartý, eldiń áleýetin kóterý jatyr. Elbasy aıryqsha nazar aýdarǵan taǵy bir másele – azamattyq qoǵamdy, turaqtylyqty, ultaralyq jáne etnosaralyq baılanystardy nyǵaıtý, sondaı-aq, qoǵamǵa, elge qaýip tóndiretin, onyń damýyna keri yqpal etetin qubylystardyń aldyn alý jáne boldyrmaýdyń joldary boldy. Iаǵnı siz ben biz qoǵamnyń turaqtylyǵyn qamtamasyz etýge, ondaǵy azamattar arasyndaǵy ózara senim men shynaıylyqtyń berik ornaýyna, sol arqyly jaqsy aýannyń qalyptasýyna yqpal etýimiz kerek. Sebebi, memlekettiń bolashaqtaǵy damýynyń basty ózegi osy qaǵıdatqa kelip tireledi», dedi Májilis depýtaty.
Keńes otyrysynda L.N.Gýmılev atyndaǵy Eýrazııa ulttyq ýnıversıtetindegi IýNESKO kafedrasy meńgerýshisiniń orynbasary Ádil Ahmetov ta sóz aldy. Ol: «Esterińizde bolsa, byltyrǵy Joldaýdyń basty taqyrybyna «Qazaqstan-2050 Strategııasy – qalyptasqan memlekettiń jańa saıası baǵyty» qujaty negizgi irgetas bolatyn. Búgingi Joldaý sol Strategııaǵa negizdelgen bizdiń damýymyzdyń jol kartasy dep aıtýǵa bolady. Prezıdent atom elektr energetıkasyn damytýǵa óte úlken salmaq saldy. Ozyq elderdiń barlyǵynda da atom elektr energetıkasy jaqsy damyǵan. Bir ǵana Amerıka Qurama Shtattarynda 104 atom elektr stansasy bar. Álemde elektr energııasyn eń kóp paıdalanatyn jalǵyz el – Amerıka. Eger, biz 2050 Strategııasyna baılanysty álemde oza damyǵan 30 eldiń quramyna kirý úshin eń aldymen, energetıka salasyn myqtap damytýymyz kerek. Árıne, bul jerde Prezıdenttiń kózqarasy óte unady. О́ıtkeni, qazaqta: «Qolda barda altynnyń qadiri joq» degen. Bizde ýran bar. Ýrannyń qory jaǵynan biz 2-orynda bolsaq, óndirý jaǵynan álemde ekinshi oryndamyz. Alaıda, biz sol ýranymyz bola turyp, energetıkamyzdy áli damyta almaı otyrmyz. Atom energııasy – taza energııa. Qazir tehnologııa Japonııada bar, Reseıde bar, Amerıkada bar, Fransııa men Anglııada bar, solardyń eń ozyq úlgilerin alyp, atom energetıkasyn damytsaq, bizdiń el alǵa shyǵatyn elderdiń qatarynda bolady. Osy máseleniń qozǵalýyna men aıryqsha rızashylyq bildirdim. Osy ýaqytqa deıin bul másele onsha qozǵalmaıtyn. Onyń ústine MAGATE bizge ıek artýda. Mysaly, ol atom elektr stansalarynyń otynyn daıyndaýdy, ýrandy radıasııa taratpaıtyn deńgeıge deıin baıytýdy bizge, Qazaqstanǵa tapsyryp otyr. О́ıtkeni, Qazaqstan antııadrolyq qozǵalystyń basynda turǵan el. Demek, senedi. Demek, biz atom energetıkasyn damytamyz desek, barlyq eldiń tehnologııasy, ǵylymy men bilimi keledi», dedi Á. Ahmetov.
Otyrys sońynda Joldaýdyń negizgi baǵyttary talqylanyp, ony qoldaý jónindegi Qazaqstan halqy Assambleıasynyń úndeýi qabyldandy, sondaı-aq, Assambleıanyń Joldaýdy nasıhattaý jáne ǵylymı-sarapshylyq qoldaý boıynsha jumystarynyń baǵyttary qaraldy.
Láıla EDILQYZY,
«Egemen Qazaqstan».
