Oblystyq bilim basqarmasy basshysynyń orynbasary Jámılá Bekbatyrovanyń aıtýynsha, jańa oqý jylynda óńirdegi 442 mektepke 240 myńnan asa oqýshy barady. Birinshi synypqa boljammen 22 myń 327 oqýshy keledi dep kútilýde. Mektep muǵalimderiniń 98,6 paıyzy koronavırýsqa qarsy ekpe saldyrǵan. Sonymen qatar bilim basqarmasynyń ókili jańa oqý jylyna oqýlyqtar men oqý-ádistemelik keshenderdi jáne qosymsha oqý quraldaryn satyp alý úshin 3,1 mlrd teńge bólingenin de aıtty.
«Jańa oqý jylynda oqýshylar oqýlyqtarmen 100 paıyz qamtamasyz etiledi dep josparlanýda. Búginde oqýlyqtardy baspadan tasymaldaý jumystary júrgizilýde. Al oblys mektepteri oqý úderisinde paıdalanatyn jumys qalpyndaǵy 52 myń 797 dana kompıýtermen jabdyqtalǵan», deıdi J.Bekbatyrova.
Bul aqparatqa qarap óńirdegi bilim oshaqtarynyń jańa oqý jylyna daıyndyǵy jaqsy ekenin kórýge bolady. Alaıda aımaqta apatty jáne úsh aýysymdy mektepterdiń máselesi áli kúnge deıin ózekti bolyp otyr. Jyl saıyn jumys júrgizilgenimen, óńirdegi bul másele tolyq sheshilgen joq.
Jalpy, oblysta qazirgi kezde 3 apatty, 6 úsh aýysymdy jáne 6 oryn tapshylyǵy bar mektepter bar. Atalǵan mektepter Taraz qalasy men Qordaı, Shý aýdandarynda ornalasqan. Degenmen bıyl óńirde 10 jańa bilim oshaǵy paıdalanýǵa beriledi dep josparlanypty. Onyń ishinde qurylys esebinen 8, jekemenshik mektepter ashý esebinen 2 mektep bar. Alaıda óńirde mektep salý, mektepterdi kúrdeli jóndeýden ótkizý máselesine kelgende jaýapty mekemeler synnyń astynda qalyp otyr. Birqatar bilim oshaǵynda jumys baıaý. Oblys ákimi Berdibek Saparbaev ta jýyrda oblystyq bilim basqarmasynyń basshylyǵyn synǵa alǵan bolatyn. Máselen, Qordaı aýdany, Kúnbatys aýylyndaǵy apatty mekteptiń ornyna salynyp jatqan 150 oryndyq mekteptiń qurylysyna qatysty másele kóterilgen. Jumysty baıaý júrgizip kele jatqan merdiger kompanııanyń atalǵan nysandy jańa oqý jylyna deıin tapsyra almaýy múmkin ekeni aıtylǵan. Degenmen olar qyrkúıek aıyna deıin tapsyratynyn aıtyp, sendirýde. Mundaı másele Taraz qalasynda da bar.
«Búgingi tańda 2 mekteptiń kúrdeli jóndeý jumystary tolyq aıaqtaldy. 1 qyrkúıekke deıin 9 mekteptiń kúrdeli jóndeý jumystary aıaqtalady. Al 4 mekteptegi kúrdeli jóndeý jumystary osy jyldyń sońyna deıin aıaqtalady dep kútilýde. Bul jumys mektepterde oqý prosesi oqýshylardy jaqyn ornalasqan mektepterde nemese ákimshilik ǵımarattarynda oqytý arqyly uıymdastyrylady», deıdi J.Bekbatyrova.
Al Jambyl oblysy boıynsha bilim salasynda sapany qamtamasyz etý departamentiniń basshysy Dámesh О́skembaeva bıylǵy maýsym-shilde aılarynda elimizdiń Bilim jáne ǵylym mınıstriniń tapsyrmasyna sáıkes, memlekettik jalpy bilim beretin mektepterde keshendi monıtorıng júrgizilgenin, oǵan oblystaǵy barlyq 442 mektep qamtylǵanyn jetkizdi.
«Monıtorıng qorytyndysy boıynsha birqatar másele anyqtalǵan. Atap aıtqanda, mektepterdegi ashanalardyń, sport zaldarynyń, pán kabınetteri men laboratorııalardyń jetispeýi sııaqty máseleler bar. Bul boıynsha Bilim jáne ǵylym mınıstrligine, oblys ákimdigi men bilim basqarmasyna taldamalyq aqparattar joldandy. Sondaı-aq anyqtalǵan máseleler boıynsha bilim bólimderine naqty tapsyrmalar berildi», deıdi ol.
Sonymen qatar búginde oblys boıynsha 9 mektepte qurylys jumystary júrgizilýde. Onyń ishinde Taraz qalasyndaǵy №2, №16, №22 jáne «Shalǵaı Qarasý» alabynda ornalasqan orta mektepter, Baızaq aýdanyndaǵy Býryl jáne Úlgili orta mektepteri, Qordaı aýdanyndaǵy Masanshy, Kúnbatys jáne Qalǵuty orta mektepteri bar. Al 4 mekteptiń qurylysy jańa oqý jylyna deıin aıaqtalyp, paıdalanýǵa beriledi dep josparlanǵan.
Jambyl oblysy
