О́tken jyldyń sońynan bastap el Prezıdentiniń 2020 jylǵy 24 qarashadaǵy «Saıası qýǵyn-súrgin qurbandaryn tolyq ońaltý jónindegi memlekettik komıssııa týraly» Jarlyǵy boıynsha Soltústik Qazaqstan oblysynda saıası qýǵyn-súrgin qurbandaryn tolyq ońaltý jónindegi óńirlik komıssııa jumys isteıdi.
Usynylǵan kitaptar komıssııa jumysy aıasynda oryndalǵan alǵashqy eńbekterdiń biri bolyp sanalady.
«Jas azamat» gazeti ózin jastar basylymy dep jarııalap, onyń betterinde Alash partııasynyń múddesi ashyq nasıhattaldy. «Jas Azamat» kitabynda gazettiń 22 nómiriniń materıaldary usynylǵan. Zertteýshiler óz ýaqytynda arab grafıkasynda jazylǵan maqalalardy aýdarý úshin úlken jumys atqardy.
Sonymen qatar, «Jas Azamat» kitabynda Maǵjan Jumabaev, Jumaǵalı Tileýlın, Smaǵul Sádýaqasov, Qoshke Kemeńgerov, Bilál Maldybaı, Ábdirahman Aısarın jáne t.b. tulǵalardyń róli kórsetilgen.
Al ekinshi kitap, «Alash» qozǵalysynyń kórnekti qaıratkerleriniń biri - Jumaǵalı Tileýlınniń qyzmettik jolyna arnalǵan.
Jumaǵalı Tileýlınniń Soltústik Qazaqstan mádenıeti men biliminiń qalyptasýy men damýyna qosqan úlesi zor. Ol óńirdegi medısınalyq bilimi bar alǵashqy maman, gýbernııalyq densaýlyq saqtaý jáne halyqqa bilim berýdi uıymdastyrýshy, Petropavl pedagogıkalyq tehnıkýmynyń birinshi dırektory, Qazaqstannyń tarıhy men etnografııasyn zerdeleý jónindegi qoǵamnyń oblystyq fılıalynyń birinshi tóraǵasy, ólketaný mýzeıin uıymdastyrýshylardyń biri boldy.
Tanystyrylǵan kitaptar - saıası qýǵyn-súrgin qurbandaryn tolyq ońaltý jónindegi óńirlik komıssııanyń úlken zertteý jumysynyń nátıjesi bolyp otyr.
