Kún ótken saıyn Sochı Olımpıadasy máreden shyǵatyn shaq jaqyndap keledi. Ol jaqyndaǵan saıyn Kavkaz taýynyń teristik-batysyndaǵy osy qalaǵa álem janarynyń qadalýy jıileı bastady. Al qadalǵan saıyn sol alamandaǵy ahýal jaıy sóz bolmaı qalmaıdy. Bizdiń Sports.kz agenttigindegi áriptesterimiz sondyqtan Qazaqstannyń qysqy sport túrleri boıynsha arǵy-bergi tarıhyndaǵy eń ataǵy mol sańlaǵy, burynǵy belgili shańǵyshy Vladımır Smırnovqa habarlasypty.
DÚNIE DODASYNYŃ DÚBIRI
HHII Qysqy Olımpıadanyń bastalýyna 13 kún qaldy
Kún ótken saıyn Sochı Olımpıadasy máreden shyǵatyn shaq jaqyndap keledi. Ol jaqyndaǵan saıyn Kavkaz taýynyń teristik-batysyndaǵy osy qalaǵa álem janarynyń qadalýy jıileı bastady. Al qadalǵan saıyn sol alamandaǵy ahýal jaıy sóz bolmaı qalmaıdy. Bizdiń Sports.kz agenttigindegi áriptesterimiz sondyqtan Qazaqstannyń qysqy sport túrleri boıynsha arǵy-bergi tarıhyndaǵy eń ataǵy mol sańlaǵy, burynǵy belgili shańǵyshy Vladımır Smırnovqa habarlasypty.
– Vladımır Mıhaılovıch, jaǵdaıyńyz qalaı?
Tilshilerdiń sonaý Shvesııaǵa soǵylǵan qońyraýy tańerteń jumysyna ketkeli jatqan Lıllehammer Olımpıadasynyń chempıonyn úıinde ustapty.
– Bári de jaqsy. Qazir TMD elderi boıynsha jumys jasaıtyn «Skanııa» fırmasy ókildigindemin. Budan birer kún buryn Astanadan oraldym. Álemniń jasóspirimder arasyndaǵy 2015 jylǵy chempıonatyn Almatyda ótkizý máselesi sheshildi. Endi erler arasyndaǵy 2019 jylǵy álem chempıonatyn da Qazaqstanda ótkizý quqyǵyn jeńip alýǵa kúsh salyp jatyrmyz...
– Qazaqstandyqtardyń Sochı Olımpıadasyndaǵy múmkindikterin qalaı baǵalaısyz?
– Meniń ózim de barsha qazaqstandyqtar sııaqty Olımpıada bastalar sátti aıryqsha bir tolqý ústinde kútip júrmin. Jáne bul jaı kútý ǵana emes. Jasyratyny joq, óz sportshylarymyzdan erlikke para-par jarq ete qalatyn qımyldar shyǵar degen úmittemin. Munda men, eń aldymen, kimdi oıyma alyp turmyn? Bárin de. Olımpıadaǵa qatysatyn kez kelgen atletten erekshe erlik kútemin. Qalaı degende de, solaı bolýy úshin jan-tánimmen jankúıerlik etemin. Qattyraq kóńil bóletinderim – konkı, shańǵy, frıstaıl, short-trek, mánerlep syrǵanaý... Mundaıda tabysty aldyn ala josparlap qoıýǵa bolmaıdy. Sonda da bolsa, úmitsiz emespiz. Eger meniń naqty kimderge kóbirek kóz qadaıtynymdy bilgilerińiz kelse, aıtaıyn, olar ózderińizge de aıan bolsa kerek: konkıshi Denıs Kýzınge senemin, shańǵyshy Alekseı Poltoranınge úmit artamyn. Olardyń «altyn» alatyndaryna da sengim keledi. Sebebi, bul qyrandardyń sońǵy kezdergi nátıjeleri kóńilimizdi qopańdatyp qoıdy.
– Alekseı Mıhaılovıch, el Prezıdenti 2022 jylǵy Qysqy Olımpııa- lyq oıyndardy ózimizde ótkizý jolyndaǵy kúresimizge qoldaý kórsetip otyr. Qazaqstanda Qysqy Olımpıadany ótkizý jónindegi ıdeıany erekshe jaqtaýshy retinde siz bul bastamaǵa ne qosa alar edińiz?
– Men jeke tulǵa retinde Qazaqstannyń Olımpıadany ótkizý jónindegi tapsyrys prosesine áli qosylǵan joqpyn. Biraq barynsha úlken jaýapkershilikpen baıandaı alamyn, osynaý qurmetti ataqqa qol jetkizý jolyndaǵy kúreske qolymnan keletin barlyq kómegimdi qosamyn. Ázirge bul máseleniń uńǵyl-shuńǵylyn qaraý qolǵa alynǵan joq. Degenmen, álemniń basty alamanyn alýǵa barlyq múmkindik bar. Shynynda, bizdiń múmkindigimiz óte joǵary. Sebebi, bul kezge deıin Qazaqstan álemdik deńgeıde jarystar ótkizýde aıtarlyqtaı tájirıbe jınap úlgerdi. Onyń syrtynda elimizdiń halyqaralyq aýqymdaǵy bedeli de birshama bıik. Bul aqıqatynda da aıryqsha mańyzdy tarıhı shaq. Ony endi ózimizdiń paıdamyzǵa bura bilýimiz kerek. Demek, tarazy basyn aýdaryp jiberetindeı jaqsy tujyrymdama kerek. Eń bastysy, kúlli qazaqstandyqtardyń Olımpııalyq oıyndardy óz elderinde ótkizýge degen yntasy men yqylasy bolýy tıis.
– Sochıde Qazaqstannyń Olımpııalyq oıyndardy ótkizýge degen shynaıy peıilin kórsetýine múmkindik bola ma?
– Olımpııalyq Sochıdegi Qazaqstan úıi kelýshiler men sport fýnksıonerlerine bizdiń el týraly áńgime aıtyp, syr shertip turýdyń birden-bir laıyqty arnasy bolmaq. Osynda elimizdiń ár saladaǵy tabystary, álem ınstıtýttarynyń biz jóninde bergen baǵalary, jaqyn keleshektegi maqsattarymyz ben mindetterimiz týraly áńgimeni jalǵastyra bilýimiz kerek. Oıyndar kezinde belgili sport tulǵalarymen jeke kezdesýdiń de kóp nársege muryndyq bolyp ketetini bar. Bir sózben aıtqanda, Sochıdi 2022 jyly Qazaqstanda da sondaı Oıyndar ótkizýge múmkindik bar ekenin bildirýge paıdalanyp qalýymyz kerek. Al eń úlken serpindi, árıne, sportshylarymyzdyń sondaǵy naqtyly tabystary beredi.
Damır QOJAMQUL.
