Sarap eksperttik klýbynyń otyrysynda Memleket basshysy Qasym-Jomart Toqaevtyń pandemııadan keıingi kezeńde memleketti odan ári damytýǵa, densaýlyq saqtaý, bilim berý júıesiniń tıimdiligin arttyrýǵa, óńirlik atqarýshy bıliktiń basqarý tetikterin jetildirýge, saıası jańǵyrtýǵa, adam quqyqtaryn qorǵaýǵa qatysty jáne basqa da máselelerge qatysty Joldaýda kóterilgen bastamalary talqylandy.
Otyrys barysynda «Rýhanı jańǵyrý» qazaqstandyq qoǵamdyq damý ınstıtýty Basqarma tóraǵasy Asylbek Esenbaev bıylǵy Joldaýda memlekettik bılik apparatynyń azamattarmen ózara is-qımylynyń qoljetimdiligi men túsinistigin qamtamasyz etý boıynsha naqty habarlar bar ekenin atap ótti.
«Bul tek qana qarym-qatynas pen «Halyq únine qulaq asatyn memleket» tujyrymdamasy týraly ǵana emes, sonymen birge «Eń aldymen Azamat» qaǵıdasy týraly. Qarapaıym azamattar úshin qoljetimdilik pen qarapaıymdylyq birinshi orynda bolýy kerek. Máselen, turǵyn úı salasyndaǵy baǵdarlamalardyń kóptigi sonsha, olardy shatastyrý ońaı. Osy Joldaýda «Otbasy bankiniń» aldyna «bir tereze» qaǵıdaty boıynsha azamattarmen ózara is-qımyldy qamtamasyz etý mindeti qoıylyp otyr», dedi A.Esenbaev.
Al saıası sholýshy Ǵazız Ábishev memlekettik bıýdjettiń kiris bóligi eldiń munaı qorlaryna baılanbaýy tıis degen pikir bildirdi.
«Ekonomıka jaıynda Joldaýda nege bulaı aıtylǵanyn túsinemin. Búkil álem sońǵy jıyrma jyl ishinde sıfrly tehnologııalardy, baǵdarlamalyq qamtamasyz etýdi, ushaqtardy, aspaptardy, farmasevtıkany damyta otyryp, munaı baǵasynan da qymbat dúnıelerdi shyǵarýda. Sondyqtan meniń oıymsha, munaı barreline 100 dollardan asyp jatsa da, bul bizdiń elimizge uzaq merzimdi baǵalyq sapada qundy qor bermeıdi», dedi ol.
О́z kezeginde Prezıdent janyndaǵy Qazaqstannyń strategııalyq zertteýler ınstıtýtynyń sarapshysy Indıra Rystına Memleket basshysynyń bıylǵy Joldaýynyń bir ereksheligi, ony tek qujat retinde ǵana emes, sonymen qatar búkil Úkimettiń jumysyn josparlaýdyń, jobalaýdyń strategııalyq quraly retinde de qarastyrýǵa bolady degen pikirin bildirdi.
«Joldaýda «Halyq únine qulaq asatyn memleket» tujyrymdamasynyń ózektiligin ashatyn saıası jańǵyrtý boıynsha birneshe usynys boldy. Sonyń biri – jergilikti atqarýshy bıliktiń jumys sapasyn zertteý maqsatynda áleýmettik saýaldamalardy engizý. Atalǵan zertteý jumystaryn táýelsiz uıymdar júrgizýi tıis. Bul – meniń oıymsha, halyq únin estýdiń engizilip jatqan jańa bir tetigi», dep atap ótti QSZI sarapshysy.
Sarapshy Lázzat Nurqatova Joldaýda aıtylǵan «Kásibı biliktilik týraly» jańa zańdy qabyldaýdyń ózektiligine toqtaldy.
«Jańa ýaqyt barlyq mamanǵa jáne olardyń quzyretterine jańa talaptar qoıyp jatyr. Kásibı máselelerdi sheshý úshin búginde adamnyń kolledjde nemese ýnıversıtette alatyn bilim deńgeıi jetkiliksiz ekeni anyq. Mundaı zańnyń qabyldanýy kásibı mamandar qaýymdastyǵyn ózin ózi damytýǵa yntalandyrady jáne barlyq jastaǵy turǵyndar arasynda Lifelong learning qaǵıdatyn qalyptastyrýǵa yqpal etedi», dedi L.Nurqatova.
Sarap klýbynyń otyrysynda sóz sóılegen Qazaq tehnologııa jáne bıznes ýnıversıtetiniń dekany Almagúl Nurǵalıeva Joldaýda odan ári ekonomıkalyq damýdyń naqty perspektıvalary aıqyndalǵanyn tilge tıek etti.
«Ekonomıka bir orynda turmaıdy, ol árqashan qozǵalysta. Naryqqa ártúrli boljaýǵa qıyn faktorlar áser etýi múmkin, mysaly, pandemııa. Bul jerde ekonomıster tarapynan damýdyń naqty ssenarııleri qajet, osy máselelerdi sheshýdiń ǵylymı ádis-tásilin de qarastyrý qajet», dep atap ótti ol.
Saıasattanýshy Samat Nurtaza Joldaýdyń aýyzsýdy únemdeý, sý resýrstaryn paıdalaný bolashaqta mańyzdy másele bolatynyn alǵa tartty.
«Rasynda sý máselesi – jer sharyndaǵy bolashaqta kún tártibinde birinshi bolatyn taqyryp. Bizdiń elimizdiń jaǵdaıynda el ishindegi barlyq ózender basqa memleketterdiń terrıtorııasynan aǵyp keledi, bul jóninde transshekaralyq sýlar jónindegi kelisim kerek. Aýyzsýdy únemdeýdi búginnen bastaý kerek», dedi ol.
Jalpy, «Rýhanı jańǵyrý» qazaqstandyq qoǵamdyq damý ınstıtýtynyń Sarap eksperttik klýbynyń qatysýshylary, Memleket basshysynyń bıylǵy Joldaýy ómirdiń barlyq salalaryna áser etetinin jáne qazaqstandyqtardyń ál-aýqatyn jaqsartý boıynsha birqatar naqty keshendi is-qımyldar júıesi usynylyp otyrǵanyn atap ótti.
