Kórmede reseılik jáne qazaqstandyq kitaphanalardyń sırek kezdesetin basylymdary usynyldy. Sondaı-aq hakim Abaıdyń jaryq kórgen alǵashqy kitaby da qoıyldy.
El Táýelsizdiginiń 30 jyldyǵy aıasynda uıymdastyrylǵan halyqaralyq ekspedısııaǵa Reseı Memlekettik kitaphanasynyń dırektory Vadım Dýda, Qazaqstan Ulttyq akademııalyq kitaphanasynyń basshysy Úmithan Muńalbaeva, Reseı Jazýshylar odaǵynyń basqarma tóraǵasy Nıkolaı Ivanov, reseılik qalamger Grıgorıı Prıahın, Qazaqstan Jazýshylar odaǵynyń músheleri Baıanǵalı Álimjanov, Mereı Qart, Álibek Baıbol, EUÝ professory Seıdahmet Quttyqadam jáne basqa da eki eldiń ǵylymı jáne shyǵarmashylyq qaýymy qatysýda.
Baǵdarlamada Abaı men Pýshkın eskertkishterine gúl shoqtaryn qoıý josparlanǵan. Qazaqstan tarıhyn, mádenıeti men ádebıetin nasıhattaý maqsatynda ótip jatqan is-sharada Uly Otan soǵysyndaǵy Jeńistiń 76 jyldyǵy, Máskeý shaıqasynyń 80 jyldyǵy jáne Rjev túbindegi urystardyń bastalýy aıasynda Máskeý men Máskeý oblysyndaǵy jaýyngerlerdiń jerlengen jerlerine barý da kózdelip otyr.
Joba qatysýshylary Uly Otan soǵysy kezindegi memorıaldyq jáne murajaı keshenderin aralap, Rjev aýdany Trýbıno aýylynyń turǵyndarymen kezdesýlerge qatysady, sondaı-aq Máskeý qalasy M.I.Rýdomıno atyndaǵy shetel ádebıeti kitaphanasynda «Kitaphanalar – Jeńistiń kýágerleri» taqyryby boıynsha dóńgelek ústel ótkizedi. Bul joba Uly Jeńistiń 75 jyldyǵyna arnalǵan TMD elderi men Shanhaı yntymaqtastyq uıymynyń ulttyq kitaphanalary birlese júzege asyryp, Jeńiske úles qosqan adamdar týraly kitaptardyń, baspa shyǵarmalarynyń jáne jazbalardyń baı materıaldary jınalyp, M.I.Rýdomıno atyndaǵy kitaphananyń saıtyna ornalastyryldy.
«Balalar men jasóspirimder ádebıeti» jylynyń baǵdarlamasy aıasynda balalar avtorlarymen jáne ıllıýstratorlarmen kezdesýler men Reseı memlekettik balalar kitaphanasynda dóńgelek ústel ótkizý de uıymdastyrylmaq. Qazaqstandyq jáne reseılik zııaly qaýymnyń kezdesýleri men birlesken is-sharalary memleketaralyq baılanystardy nyǵaıtyp, Qazaqstan men Reseı arasyndaǵy biryńǵaı mádenı-patrıottyq keńistikti qalyptastyrýdyń kópiri bolmaq.
Jobany uıymdastyrýshylar men qatysýshylar Qazaqstan men Reseı kitaphanalarynyń oqyrmandaryn tanystyrý jáne balalar men jastarmen basqa da patrıottyq is-sharalar ótkizý úshin Málimetter bazasy men materıaldar jınaǵyn qalyptastyrýdy maqsat etip otyr.
