Sýret: adebiportal.kz
Keshe Astana jurtshylyǵynyń, el óńirleri ókilderiniń aıaýly aqynmen qoshtasý rásimin Qazaqstan Respýblıkasynyń Mádenıet jáne aqparat mınıstri Muhtar Qul-Muhammed Elbasynyń kóńil aıtý jedelhatyn oqýdan bastady.
Astana qalasynyń ákimi Imanǵalı Tasmaǵambetov, Qazaqstannyń Eńbek Eri, halyq jazýshysy Ábish Kekilbaev, akademık Kenjeǵalı Saǵadıev, Májilis depýtaty Qýanysh Sultanov, aqyn shyǵarmalarynyń aýdarmashysy Tatıana Frolovskaıa, Atyraý oblysynyń ákimi Baqtyqoja Izmuhambetov, Senat depýtaty, Qazaqstan Jazýshylar odaǵy basqarmasynyń tóraǵasy Nurlan Orazalın, aqyn Serik Turǵynbekuly jınalǵan jurtshylyqtyń et júregin eljiretken qoshtasý sózderinde tamasha talant ıesiniń san qyryn jan-jaqty asha aldy. Olardyń bárin qaıta baıan etip jatý qıyn.
Tek bir sózdi – qaıratker qalamger Qýanysh Sultanovtyń azaly lebizin keltirer bolsaq, ol bylaı óriledi: «Aqyn Farıza Ońǵarsynqyzy ult sanasyna, rýhanııat qazynasyna orasan eńbek sińirdi. Ol óner álemi men qoǵam sanasyna óziniń teńdesi joq názik lırıkasymen, semserdeı shymyr áleýmettik sózimen ómirdiń shyndyǵyn, qoǵamnyń qaıshylyqtaryn jaltaqsyz aıtýymen yqpal etip, eshkimge uqsamaıtyn, eshkimdi qaıtalamaıtyn ózindik jolyn salyp, dúnıetanymyn qalyptastyryp ketti. Ult sanasyna sapa qosty.
Farıza Ońǵarsynqyzy óziniń jastyq shaǵynan jas urpaq tárbıesine erekshe den qoıyp, aq júregimen dál osy áleýmettik toptyń bolashaǵyna úzdiksiz eńbek etken meıirimdi Ana, baýyrmal jan, bilgir qaıratker. Uzaq jyldar jas urpaq tárbıesine arnalǵan gazet, jýrnaldarǵa basshylyq etti. Aqyndyǵymen shektelip qalmaı, sábıler, balalar, jasóspirimder ómirine baılanysty keleli máseleler kóterip, alqaly, mártebeli jıyndarda sóz sóılep, pýblısıstıkalyq maqalalar jazdy.
Jas talanttarǵa, jas aqyndarǵa, ónerpazdarǵa qamqorlyq jasaýdan ómiriniń sońyna deıin jalyqqan joq. Elimizdiń túkpir-túkpirinde Farızaǵa uqsaǵysy kelgen júzdegen jas óren ósti. Kóptegen ata-analar jańa týǵan nárestelerine Farıza esimin berýdi jaqsy yrymǵa jorydy». Iá, solaı. Aqyn rýhy halyq júreginde jańǵyra beredi. Farıza esimi umytylmaıdy. «Egemen Qazaqstannyń» betinde Nesipbek Aıtuly jyrlaǵandaı, «Qazaqtyń aıaýlysy, perızaty, О́shpeıdi eshqashan da Farıza aty!».
Súleımen MÁMET,
«Egemen Qazaqstan».
