Bıylǵy Qysqy Olımpıadaǵa lısenzııa ala almaǵan Qazaqstan sportshylary da barady. Bul týraly egemen.kz tilshisi habarlady.
Jaqynda BAQ ókilderimen kezdesýde Sport jáne dene shynyqtyrý isteri agenttigi tóraǵasynyń orynbasary Elsııar Qanaǵatov Sochı Olımpıadasyna jarystarǵa qatysatyn sportshylarymyzben birge joldama almaı qalǵan otandastarymyz da baratynyn aıtty. «Byltyr Olımpıadaǵa joldama beretin kóptegen jarystar ótti. Oǵan el namysy úshin biraz sportshylarymyz jan alysyp, jan berisip qatysty. Alaıda báriniń Olımpıadaǵa lısenzııany jeńip alýǵa múmkindigi bolmady. Osy jaǵdaıdy jáne jas sportshylarymyzdyń eńbegin, talantyn eskere otyryp, biz olardy Olımpıadaǵa aparýdy jón kórip otyrmyz. Bul bir jaǵynan jas bolsa da talantymen talaı jarystarda kózge túsken sportshylarymyzǵa Olımpıadaǵa qatysatyn áriptesterinen, dostarynan úlgi alsyn degen oımen jasalyp jatyr. Olar Olımpıadaǵa týrıst retinde baratyn 300-ge jýyq adamnyń quramynda bolady», deıdi E.Qanaǵatov. Sonymen birge onyń aıtýynsha, Olımpıadaǵa týrıst retinde zeınet jasyna shyǵyp, eńbegi sińgen burynǵy sportshylarymyz da barady.
Dastan Kenjalın.
Derekkóz: Sport jáne dene shynyqtyrý isteri agenttigi.
