Muńdy da mánsiz oıdyń qushaǵyna bir súńgiseńiz óz qııalyńyzdyń teńizinen qonys izdeısiz. Qaıda barsańyz da sol mazań ómir, mımyrt tirlik. Súrinis-túńilister, qamyryq qara túnder, qyrmyzy terip qyrda júrgen shattyqty shaq, ǵumyrlyq máıek alar aıaýly kezeńder, albyrt sheshimder, bolbyr úmit bári-bári teńiz jaǵasynan sizge qol bulǵap turǵandaı. Sondaı beımaza sátte sizdiń jan kúıińizdi aq qaıyńnan artyq túsiner jan bar ma? Arzý-muńyńyzdy aq kóbik tolqyndaı jaǵaǵa laqtyryp tastaǵyńyz keledi. Al únsiz aq qaıyń bárin kóterýge daıyn. Tipti, sizdiń zilmaýyr qaıǵyńyzdy arqalap ǵumyr keshýge bar.
«Japyraq-júrek
jas qaıyń!
Janymdy aıyrbastaıyn.
Sen adam bola bastasań
Men qaıyń, bola bastaıyn.
Kelisesiń be, jas qaıyń».
Taǵaly aı astynda kók kóılek ózenniń etegin erkin basyp, qus jolyna kóz qadaǵan arýdyń sulbasy elesteıdi. Qolynda aqynnyń óleńi – japyraq júreginde jazylmaǵan hattar. Nárkes kózge uıalaǵan botana jasyn jel súrtýge oqtalady. Aq qaıyńǵa baılaǵan oramaly joǵalǵan. Álde jel ushyryp áketti me eken?! Onda onyń arman-tilegi, duǵaly mahabbaty bar edi-aý. Suhbat ústinde dál osy kórinis oıyma balalap alǵandaı, «Jas qaıyń» ániniń tarıhyn buryn bilsek te, búgin alǵash estigendeı bolyp otyrdyq. Qazaqstannyń halyq ártisi Almahan Kenjebekova aqıyq aqyn haqynda jan tolǵanysyn jetkizýde. Al men ádettegideı jalǵyzdan-jalǵyz oı ústindemin.
«Sol ýaqytta Narynqoldan qalaǵa úsh-aq avtobýs júredi. Sonyń bireýine úlgerip, ilinip kele jatqan betim. Kóligimiz Saryjazda toqtaǵanda, artynyp-tartynyp kóppen birge Muqaǵalı Maqataev ta otyrdy. Dostary jabylyp júrip, esikten kirgizip jibergenin kórip turmyn. Ań-tańmyn. Sol sátte qasymdaǵy kisi túsip, onyń ornyna Muqań jaıǵasty. Ishimnen osyny tilep otyrǵanmyn. Muqańmen qalaǵa birge keldim degen maqtanysh áldılep barady. Maǵan qaraı jaılap buryldy da «Qaıda oqısyń?» dedi. Sasyp qaldym, bir jutynyp baryp, bolashaq óner adamy ekenimdi aıttym. «Eee, ekeýimizdiń ılegenimiz bir teriniń pushpaǵy eken» dedi de, ıyǵyma qulaı ketti. Sodan Muqaǵalı qalaǵa deıin ıyǵymda uıyqtap bardy.
Aqyn baqıǵa attanǵannan keıin kóp ýaqyt túsime kirdi. Oryndyqta otyrǵan qalpy kózinde jas uıyp tur, maǵan áldenelerdi baıandaıdy. Júrek aryzyn jetkizgisi keletindeı...».
Muqańnyń muńyna jan bitirgen óner ıesiniń osyndaı áserli ándi ómirge ákelýi de teginnen-tegin emes sekildi. Ekeýin de áldılegen bir – topyraq, bir – tabıǵat-ana. Janyna teatr, júregine óleń bitken. Qalaǵa jetkeninshe alyp aqyndy ıyǵyna qondyrǵan qarshadaı qyzdyń qaısarlyǵy qaıran qaldyrady. Aqynǵa degen alǵaýsyz sezimi, qaryndastyq iltıpaty, jasampaz jyrǵa qurmeti bir ǵana qareketinen kórinis tapqandaı. Tipti «Jas qaıyń» ániniń ómirge kelýiniń alǵyshartyndaı kóńilge nur sebedi.
«Jaımashýaq kóktem mezgili. Alakól aýdanyna gastroldik saparmen kelgenbiz. О́ner kórsetip bolǵan soń, aýyl halqy dalaǵa dastarqan jaıdy. Qazan kóterildi, el ý da shý. Ústel basynda jıylǵan jurtqa jópeldemede ómirge jańa án kelgenin aıtyp, tusaýyn osynda kespek nıette ekenimdi jetkizdim. Ol kezde jaspyz, jalyndap turmyz. Oıymyzda túk te joq. Qolyma dombyramdy alyp «Jas qaıyń» ánin bastaǵanym sol-aq edi, kenet tóbemizge qara bult úıirilip, apyr-topyr jańbyr jaýa jóneldi. Halyq ornynan turar emes, áýenge elitip barady. Ǵajaby sol, án qalaı aıaqtaldy jaýyn da sap tyıyldy. Shamasy, Muqańnyń ishindegi sher tógilip ketti me deımin. Bul aqıyq aqynnyń eshkimge jetkize almaǵan muńyn tabıǵatqa aıtyp ketken týyndysy. Ishindegi zapyrany tasqa aınalǵan zar. Ándi alǵash ret Qazaqstannyń eńbek sińirgen ártisi Saǵat Jylkeldıev áldebir baıqaýda oryndady. Sodan el-jurtqa keńinen taralyp ketti. Men Muqańnyń 15 óleńine án jazdym, kóbi áli jaryqqa shyqqan joq», dep sózin túıindedi halyq ártisi.
Kózinde nurdan góri aqyl basym, janaryn momaqan muń qabyzdaǵan avtordyń áýezdi áni kúlli muqaǵalıshyl oqyrmanǵa ystyq. Aqyn sol áýen bolyp sóıleıdi. Shaıyrdyń sartap saǵynyshy ómirge degen ińkárligi qonystanǵan. «О́mir súreıik almasyp». Muqaǵalı – jas qaıyńmen almasyp ómir súrgen máńgi jasyl beıne.
Al men sol jas qaıyńnyń astynda tańǵa deıin súıgenin telmire kútken bozbala men basqa oshaqtyń shamyn jaqqan arýdy oılaımyn. Ol endi óz aldyna bólek áńgime. Muny nege aıtty demeńiz, sebebi «Jas qaıyń» áni olardyń mahabbatynyń eskertkishindeı edi.
