Úlken óner de, uly shyǵarmalar da kóp oqyǵan, kóp izdengen, kópti kórgen adamdardan shyǵady eken. Keshe Almatydaǵy Qazaqtyń memlekettik M.Áýezov atyndaǵy akademııalyq drama teatrynda Qazaqstannyń halyq ártisi, Memlekettik syılyqtyń laýreaty Sábıt Orazbaevtyń «О́mirdiń ózi – teatr» atty kitabynyń tusaýy kesilip, mádenı sharaǵa Almatynyń ıgi jaqsylary ortaqtasyp, ultymyzdyń talaı ulylary ulyqtaldy.
Úlken óner de, uly shyǵarmalar da kóp oqyǵan, kóp izdengen, kópti kórgen adamdardan shyǵady eken. Keshe Almatydaǵy Qazaqtyń memlekettik M.Áýezov atyndaǵy akademııalyq drama teatrynda Qazaqstannyń halyq ártisi, Memlekettik syılyqtyń laýreaty Sábıt Orazbaevtyń «О́mirdiń ózi – teatr» atty kitabynyń tusaýy kesilip, mádenı sharaǵa Almatynyń ıgi jaqsylary ortaqtasyp, ultymyzdyń talaı ulylary ulyqtaldy.
Qaı jaǵynan alsań da taǵylymdy ótken zııalylar toǵysýynda belgili qoǵam jáne óner qaıratkerleri, aqyn-jazýshylar, akterdiń sahnalas áriptesteri men týǵan-týysqandary tabyldy. Tusaýkeser rásimine jastar kóptep jınalǵany qýantty.
Kıeli de kirpııaz ónerdiń qyry men syryn túgel meńgergen bıik te tereń ıntellekt ıesi retinde moıyndalǵan Sábıt aǵamyzdyń qolǵa tıgen jańa kitaby qaı ólshemge salsań da súbeli dúnıe – syrsandyqtyń aýzy ashylǵandaı salmaqty ekenin zamandastary tilge tıek etti.
Osylaısha, jansaraıy jaryq akter keıingilerge ónege jolyn kórsetip, ónertaný ǵylymynyń qorjynyna ólsheýsiz estelikterin qosty. Kitaptyń tusaýkeser rásimin júrgizgen Áshirbek Syǵaı aıtqandaı, aqıqatynda bul kitapta qyrshý men qytymyrlaný, qabaq túıisý joq. Tarlan talant ıesi ózine tán jumsaq ıýmor, ádemi ázilimen kóz kórgen jaıttardy jazady. О́mirdi ǵajap jaǵyna qaraı ózgertken óner men óner adamdary jaıly jalyqtyrmas ǵıbratty kezeńder týraly baıandaıdy.
Tusaýkeserdegi estelikter tıegin Kamal Ormantaev syndy altyn qoldy dáriger bastap berdi.
– Uly óner oǵan degen uly mahabbattyń, ony súıgen, qasıetin kıepettegen adamdardyń, úlken júrektiń arqasynda ǵana ólmeı kele jatyr, – deıdi Dýlat Isabekovteı jazýshy. Dýlat aǵamyz jastardyń jetesine Sábıt Orazbaevtyń tereń talantqa aınalýyna kitapty kóp oqyǵany, álem ádebıeti men qazaq ádebıetin bilip qana qoımaı, salystyryp, bezbendeı alatyn qasıeti jeteledi degendi jetkizdi.
Qazaqtyń tulǵaly akteri Asanáli Áshimov aǵamyz teatr tabaldyryǵyn birge attaǵan áriptesimen sahnadaǵy alǵashqy rólderi, oqylatyn kitaptar men oqylmaıtyn kitaptar bar ekendigi týraly syr sherte kele:
– Sábıttiń kórgen-túıgenin aqtaryp, kitap shyǵaryp, jastarǵa qazir estelikter aıtyp otyrýynyń ózi de búgin – úlgi, erteń – tarıh, – dedi.
Kitaptyń tusaýkeserinde jınalǵandardy tánti etip, tań-ǵaldyrǵan sáttiń biri – Bıbigúl Tólegenova apamyzdyń drama teatry, óner týraly jasandylyqtan ada paıymdary men daıyndyqsyz, mıkrofonsyz án shyrqaýy edi. Ǵajaıyp daýys ıesi 85 jasynda da sulýlyǵynan bir tanbaı, shyn daryndar qandaı ekenin pash etti desek ásire sóz bolyp shyqpas.
Qoǵam qaıratkeri Shámsha Berkimbaeva apamyz kitaptyń salmaqty da qyzyqty bolyp shyǵýy Sábıt aǵamyzdyń ana tiliniń ýyzyna jaryp óskendiginen de degenimen kópshilik kelisip, qoshemetin bildirdi. Keshte aqyndar atynan Temirhan Medetbek sóz aldy.
«Almaty aqshamy» kitaphanasy serııasymen jaryq kórgen bul kitapqa – esseler, estelikter, oı-tolǵamdar engen. Jobanyń jetekshisi – Qalı Sársenbaı. Avtordyń kitabyn quraǵan shyǵarmalar jyldar boıy atalmysh gazette úzdiksiz jarııalanyp, oqyrmandar yqylasyna bólengen.
Aınash ESALI,
«Egemen Qazaqstan».
ALMATY.
––––––––––
Sýretti túsirgen
Samat QUSAIYNOV.
