Beıjiń Olımpıadasynyń chempıony Baqyt Sársekbaev jeke bapkeri ári týǵan naǵashy aǵasy bolyp sanalatyn Kárim Mahmýdovqa 2009 jyly syıǵa tartqan páterin qaıtadan ózine alýǵa árekettenip jatyr. Bul týraly Tengrinews.kz habarlady.
B. Sársekbaev joǵaryda atalǵan máseleni óz paıdasyna sheshý úshin Astana qalasyndaǵy Saryarqa aýdandyq sotyna aryz jazypty. Onyń mundaı qadamǵa barýyna bapkeriniń ýádesinde turmaǵany sebep bolǵan eken. «Men bapkerime páterdi syıǵa bergenimdi joqqa shyǵarmaımyn. Biraq ol páterdi alar kezde «seni London Olımpıadasyna daıyndaımyn, ulttyq quramada bolasyń» dep aýyzsha ýáde bergen edi. Endi sertinen taıqyp ketip otyr ǵoı», - deıdi B. Sársekbaev.
Boksshynyń kelesi bir aıtqan sózine nazar aýdarsaq, onyń bapkeri alǵashynda janjal týdyrǵan páterdi keri qaıtarmaqshy bolǵan. Ne sebepti ekeni belgisiz, keıinnen Mahmýdov bul páterdi Parlament Májilisiniń depýtaty Azat Perýashevtiń júrgizýshisine «satyp jibergen» kórinedi.
Osy máselege baılanysty A. Perýashev Tengrinews.kz saıtyna bergen suhbatynda óz qyzmetkerine páter alý úshin qarjylaı kómek kórsetkenin aıtyp, jurtshylyq nazaryn mynaǵan aýdardy. «Meniń ótinishim boıynsha dostarym Beıjiń Olımpıadasynan júldemen oralǵan Baqyt Sársekbaevqa 4 páter syılaǵan edi. Osy azamattyń 2004 jyly О́zbekstannan elimizge kelýine yqpal jasaǵan da ózim edim. Jalpy, biz Baqytty belgili boksshy retinde bilemiz. Endi ol páter daýyna qatysty janjaldy túsinistikpen, azamattyq turǵydan sheshedi dep oılaımyn», - dedi A. Perýashev.
«KTK» telearnasynyń habarlaýynsha, Baqyttyń bapkeri álgi páterdi ózgege shamamen 300 myń dollarǵa satyp, keıin Almatyǵa kóship ketken. Al búgin osyǵan qatysty Saryarqa aýdandyq sotynda bolǵan iske jattyqtyrýshynyń qatyspaǵany málim bolyp otyr. Baqyt Sársekbaev bolsa, páteriniń basqa adamǵa satylǵanyna qaramastan, onyń ishine kirip alǵan kórinedi. Endi bul páterdiń jańa qojaıyny sottan boksshyny májbúrlep shyǵarýdy talap etýde.
Ámirhan Almaǵanbetov.
Derekkóz: Tengrinews.kz, «KTK» telearnasy.
Foto: Sports.kz.
