Qańtar aıynyń aıaǵynda «Roskosmos» Muhtar Aımahanovty reseılik ǵaryshkerler tobyna engizý máselesin qarastyryp, onyń kandıdatýrasyn maquldady. Bul týraly Azattyg.org habarlady.
Kezinde Qazaqstan bıýdjetinen arnaıy bólingen qarjymen daıyndyqtan ótken Aımahanovtyń ǵaryshker ataný máselesi uzaqqa sozylyp ketken edi. 2012 jyly Reseı azamattyǵyn alǵan ǵaryshker endi sol eldiń atynan ushatyn boldy. Bul másele Qazaqstanda árqıly pikirtalas týǵyzdy.
Qazaqstan Ulttyq ǵarysh agenttiginiń tóraǵasy Talǵat Musabaev ǵaryshkerdi «memleket múddesine qaramaı jeke armanyn ózdiginen oryndaýǵa umtyldy» dep sókti.
27 qańtarda «Roskosmos» ǵarysh agenttigi komıssııaaralyq otyrys ótkizip, onda qazaq ǵaryshkeri Muhtar Aımahanovty reseılik ǵaryshkerler tobyna engizý máselesin qarastyrǵan bolatyn. Agenttiktiń resmı saıtynda shyqqan aqparǵa qaraǵanda, komıssııa onyń kandıdatýrasyn maquldaǵan.
Jaqynda «Roskosmos» saıtynda Muhtar Aımahanov týraly beınesıýjet te ilese jarııalandy. Onda Reseıdiń ǵaryshkerlerdi daıyndaıtyn «juldyzdy qalashyǵynda» júrgen Aımahanovtyń daıyndyq joly týraly táptishtep baıandalady.
Qazaqstannyń «úshinshi ǵaryshkeri» atanýǵa úmitker bolǵan Aımahanovtyń Reseı atynan ushatyny jaıly aqparat qoǵamda árqıly pikirtalas týǵyzdy.
Ulttyq ǵarysh agenttiginiń tóraǵasy Talǵat Musabaev 29 qańtar kúni «Qazaqparat» agenttigine bergen suhbatynda Aımahanovty daıyndaýǵa Qazaqstannyń qyrýar qarjy jumsaǵanyn aıtyp, ony kinálaı sóıledi.
«Muhtardyń óz armanyn memlekettik múddeden joǵary qoıýyn túsine almaımyz. Ol bul áreketimen óziniń dosy Aıdyn Aıymbetovty ǵaryshqa attaný múmkindiginen aıyryp otyr. Aıtqandaı, onyń daıyndyǵy da Muhtardan kem túspeıdi. Bul jerde úlken ujdan máselesi bar. Aımahanov bul sheshimdi agenttikpen de, úkimetpen de kelispeı, ózi qabyldaǵan. Qazaqstan onyń reseılik ǵaryshkerlerdi daıyndaý ortalyǵynda bilim alýyn uıymdastyryp, aqysyn tólegen», – deıdi Talǵat Musabaev.
Belgili bolǵandaı, Qazaqstan 9 jyl boıy eki ǵaryshkerdi daıyndaýǵa bıýdjetten 17 mıllıon teńge jumsaǵan.
Sarapshylardiń pikiri «bul jerde kináni ǵaryshkerden emes, Qazaqstannyń ǵarysh salasyn basqaryp otyrǵan adamdar men olardyń ǵarysh salasyna qatysty júrgizip otyrǵan saıasatynan izdeý kerek» degenge saıyp keledi.
Tuńǵysh qazaq ǵaryshkeri Toqtar Áýbákirov Aımahanovtyń daıyndyqqa ketken qarjyny ózdiginen aqtaýǵa umtylysyn aıyptaý qatelik ekenin aıtady. «Men onyń sheshimin júz paıyz qoldaımyn. Durys. Jarady! Men bolsam da solaı ister edim. Ǵaryshkerlerdi daıyndaýǵa aqsha bólindi. Biraq ol qumǵa quıǵan sýdaı joq boldy. Munyń sebebin Talǵat Musabaevtan suraý kerek. Endi Muhtardyń ózi sol qarajatty aqtaýdyń qamyn jasap jatyr», – dedi ol. Toqtar Áýbákirov sondaı-aq Muhtar Aımahanov ǵaryshqa ushatyn bolsa, onyń ketken aqshany on ese aqtaıtynyna senim bildirdi.
Qazaqstandyq eki ushqysh - Aıdyn Aıymbetov pen Muhtar Aımahanov 2007 jyly Reseıdiń Iýrıı Gagarın atyndaǵy ǵaryshkerler ortalyǵynda arnaıy daıyndyqtan ótken edi.
Ekeýiniń biri 2009 jylǵy kúzde halyqaralyq ekıpaj quramynda ǵaryshqa ushýǵa tıis bolatyn. Biraq Qazaqstan jaǵy qarjy tapshylyǵyna baılanysty ǵaryshker ushyrýdy keıinge qaldyrǵan. Bul másele Astana men Máskeý arasynda bolǵan eń joǵarǵy kelissózderde birneshe ret kóterilse de, sheshilmegen kúıi qaldy.
45 jastaǵy Muhtar Aımahanov 2012 jyly Reseı azamattyǵyn alǵan edi. Qazir ol otbasymen Reseıde turyp jatyr. Al Qazaqstanda qalǵan Aıdyn Aıymbetovke 2012 jyly ǵaryshker mártebesi berildi.
2013 jylǵy qyrkúıek aıynda Ulttyq ǵarysh agenttiginiń tóraǵasy Talǵat Musabaev Pekınde Qytaı ulttyq ǵarysh ákimshiliginiń basshysymen kezdesti. Onda olar Qytaı ekıpajy quramynda qazaqstandyq ǵaryshkerdi ushyrý máselesin talqylaǵan bolatyn.
Aıdar О́risbaev.
Derekkóz: Azattyg.org
Foto: Newskaz.ru
