Qostanaı oblysy polısııa departamentiniń esirtki qylmysyna qarsy is-qımyl basqarmasynyń qyzmetkerleri «Qarasora-2021» jedel aldyn alý is-sharasy barysynda Qostanaı qalasynda, Rýdnenskıı kóshesinde oblys ortalyǵynyń 19 jasar turǵynyn ustady.
«Ol shańsorǵysh salynǵan qorapty qolyna ustaǵan, tekserý barysynda shańsorǵysh ishinen jalpy salmaǵy 250 grammnan asatyn untaq zat salynǵan paket tabyldy. Saraptama kórsetkendeı, bul zat geroın bolyp shyqty», dep habarlady polısııadan.
Qostanaı oblysy PD bastyǵynyń orynbasary polısııa polkovnıgi Dúısembaı Baıbosynovtyń aıtýynsha, qazirgi ýaqytta QR QK-niń 296-babynyń 4-bóliginde «Asa iri mólsherde esirtki zattaryn saqtaý» kózdelgen sotqa deıingi tergeý bastaldy.
Kúdikti qamaýǵa alynyp, tergeý amaldary júrgizilýde.
Jyl basynan beri oblysta zańsyz aınalymnan 105 kg astam túrli esirtki quraldary, onyń ishinde 645 gramm geroın alyndy.
