Hıpsterjan toı-bıznes pen shoý-bıznes úshin janryn ózgertpeıdi

Qalaı desek te, qazir ómir ózgerdi. Buryn talanttardyń tanylýy úshin buqaralyq aqparat quraldaryn, ásirese, televızııany ne almastyra alatyn edi?! Úlken taralymmen jaryq kóretin bedeldi basylymnyń bir ǵana maqalasy daryndardyń dańqyn jaıatyny keshe ǵana emes pe edi?! Búginde bári de basqasha. Áleýmettik jeliler kez kelgen oqıǵany áp-sátte aıdaı álemge taratyp jiberedi. Ǵalamtordyń kómegimen eleń etkizer jańalyqtyń bári gadjetterden gadjetterge qas pen kózdiń arasynda aýysyp jatyr. Máselen, Qyzylózek degen aýyldan shyqqan qazaq ánshisi Ǵalymjan Moldanazardyń «Aq­pen birge» deıtin beınebaıanyn jyl sońynda YouTube arqyly bir ǵana Reseıde bir aptanyń ishinde 33 myń adam tyńdaǵan. Orystardyń áleýmettik jelilerin dúr etkizgen ózindik daryn ıesi týraly Reseıdiń óner taqyrybyn qozǵaıtyn saıttary syndarly pikirlerin bildirip jatty. Bizde mýzyka óneri qalaı damyp jatqanynan kórshilerimiz asa habardar bola bermese de, Qazaqstanda rok ta, pop ta, rep te bar ekenine jáne ol eýropalyq deńgeımen para-par ekenin kórip, tańdanystaryn jasyrǵan joq. Álemdik mýzyka sapasynan bir mysqal da kem kórinbegen ózgeshe klıp ózge aǵaıyndarǵa unaǵany shyndyq. Eń qyzyǵy, qyzylordalyq jigittiń qazaq tilinde shyrqaǵan ánderin túsinbeı qaldyq dep tyń­damaı jatqan jandar taǵy joq. Fanktik negizdegi sándi bir áýender qulaqqa jaǵymdy quıylyp, ja­nyń­dy sıqyrly sezimge bóleı­tini áıteýir bir aqıqat. Ǵalymjan Moldanazardyń TMD-dan tabylǵan tyńdarmandary oǵan «qazaq Dorny», «qazaqtan shyqqan Tesla Boy» degen laqap at berip, kópshiligi «Hıpsterjan» dep te atap júr. Mysalǵa, ánshiniń atyn alys­qa shy­ǵarǵan «Aqpen birge» deı­tin beınebaıa­ny sonaý 90-jyldardyń jastaryn kóz aldy­ńa ákeletin, jergilikti KVN-shy­larmen túsirilgen, ıronııaǵa toly dúnıe. Aýyldan shyqqan talant 10-synypta oqyp júrgende-aq ánder jaza bastaǵan. Qyzylorda qalasynan mádenıettiń ordasy Almatyǵa aýysyp, T.Júrgenov atyndaǵy Ulttyq óner akademııasynda joǵary bi­lim alǵan jigit Aısa deıtin jergilikti oryn­daýshynyń stýdııasynda birneshe trekter jazady. Osylaısha, Orda Brothers prodıýserlik ortalyǵynan bir-aq shyǵady. Ol «Orda» tobynan bólek, Aısa, Qaırat Túntekov, Ásem, Asyl Bedelhan, Rin’go toby oryndaǵan birqatar ánderdiń avtory. Al qazaq jerin­degi tyńdarmandarǵa ol rok án­shisi Ásemmen birge shyrqaıtyn «Jylaıdy júrek» atty týyndysymen tanys. Hıpster Ǵalymjan qazir «Orda» tobymen áriptestikti toq­tat­qanymen, áli baılanystary úzilmegen syndy. О́ıtkeni, jyl basynda atalmysh toptyń qatysýymen «Tyıym salynǵan bıler» atty kartına túsirilgen-di. Bul fılm neshe túrli kereǵar pikirler týǵyzǵanyn óner taqyrybynan qulaǵdar jandar biletin bolar. Osy kartınada onyń «Alystama» deıtin tregi shyr­qalady. Eń qyzyǵy, qazaq aýylynda týyp-ósken jigit aǵylshynsha aıtyp tyrashtanbaı-aq, oryssha ándetpeı-aq, ana tilindegi janyńdy qoparǵan jumbaq áýen­dermen aty shyǵyp keledi. Eýro­palyq promoýterlerdiń de izdegeni osy. О́zgege uqsamaıtyn óner ıesi. Al shyndap kelgende, bizdiń kóptegen ánshilerimiz shet memleketterde tanylý úshin qoldan kelgenin jasap-aq jatady. My­saly, osydan birneshe jyl buryn reseılik saıttar almatylyq «Buhar Jerreau» («Buqar jyraý») rep-trıosy jaıly jarysyp jazdy. Olardyń Sankt-Peterbýrgte túsirilgen «Most» dep atalatyn klıpi A-One men MTV-dan rotasııalanyp, ıaǵnı biraz kórsetildi de ǵaıyp boldy. Reseıdi jaýlaýǵa baǵyttalǵan bul joba onsyz da óz ónerpazdary jyrtylyp-aıyrylyp jatqan megapolıste jutylyp kete bardy desek jańylysa qoımaspyz. Al Ǵalymjannyń qazir ǵalam­tor kezip júrgen trekteri – sıntı-pop, fank stılinde, keıbir mýzykalary úıinde otyryp-aq ja­zyl­ǵan. Ánshi aldaǵy ýa­qytta óz tyńdarmandaryna aǵylshyn tilinde shyrqaýǵa ýáde berse de, oǵan asa qaıyl bolyp otyrǵandar neken-saıaq. Reseılikterdiń kóp­shiligi qazaqsha ánder áldeqaıda jandy terbeıtin jumbaqtaý estiledi eken dep esepteıdi. Qa­zaq hıps­teriniń ánderin álemdik trendterdiń bezbenine salyp jibersek, Kaýrısmıakı men Bala­banovtardyń fılmderine tán, ulttyq boıaýǵa baı dep biletinder de jetkilikti. Feısbýkta otyrǵan orys aǵaıyndar eger basqa da qazaq mýzykanttary Ǵalymjan Molda­nazardyń úrdisin jalǵastyratyn bolsa, onda qazaqstandyq sıntı-pop bir kezdegi kanadalyq postrok nemese fın psıhofolky sııaqty ınternasıonaldyq brendke, ıakı halyqaralyq qubylysqa aınalýǵa múmkindigi bar degen pikirlerin alǵa tartady. Al endi tyńdarmandardyń bir toby «Aqpen birge» áninde 1976 men 1980 jyldar arasynda dáýiri júrgen Joy Division-niń máneri bar ekendigin aıtady. Sol sııaqty «Jylaıdy júrektiń» jartysy jarnama dep jaqsy sózin qımaǵandarǵa aıtatyn ýáj tabýǵa bolady. Bul klıpti qyryq ret aınaldyra kele, jarnama taba almadyq. Ne desek te, Ǵalymjan Molda­nazar eshkimge uqsamaıtyn jańa sóz, jańa áýenderimen eldi eleńdetti. Eń qyzyǵy, ol on jylǵa jýyq mýzyka jazyp júrse-daǵy, «Aqpen birgeni» Internetke salǵany sol edi, sıntı-pop stılindegi mýzyka tyńdarman júreginiń esigin qaqty. Qyzylózekten shyqqan hıpsterdiń orysshasy «onsha» bolmasa da tyńdarmannyń tilin tapty. «Men mýzykanyń barlyq janryn syılaımyn, biraq, toı-bıznes pen shoý-bıznes úshin óz stılimdi ózgertpeımin», deıdi Hıpsterjan. Aınash ESALI, «Egemen Qazaqstan». ALMATY. http://youtu.be/Dd_z2lHEgQQ http://youtu.be/jpy0Hjai7m4