«KazSat-3» ushar kún alys emes

Keshe Ulttyq ǵarysh agenttiginde Premer-Mınıstrdiń birinshi orynbasary Baqytjan Saǵyntaevtyń qatysýymen keńeıtilgen alqa otyrysy ótti. Basqosýda atalǵan vedomstvonyń ótken jylǵy qyzmetiniń qorytyndylary men bıylǵy mindetteri týraly negizgi baıandamany agenttik tóraǵasy Talǵat Musabaev jasady. «Memleket basshysy óziniń bıylǵy Qazaqstan halqyna Joldaýynda otandyq ǵaryshtyq salany qurýdyń mańyzdylyǵyna erekshe kóńil bóldi. Prezı­denttiń «Qazaqstan-2050» Strate­gı­ıasynda ǵarysh salasyn damytý jóninde berilgen tapsyrmalaryn oryndaı otyryp, esep berý kezeńinde Qazǵarysh strategııalyq josparynyń «Ǵa­rysh ınfraqurylymyn qurý jáne damytý» jáne «Ǵarysh qyzmetiniń ǵylymı jáne ǵylymı-tehnologııalyq bazasyn damytý» syndy eki negizgi baǵyty boıynsha birqatar ǵaryshtyq jobalar men baǵdarlamalardy júzege asyrý jumystaryn jalǵastyrdy», dedi Ulttyq ǵarysh agenttiginiń tóraǵasy Talǵat Musabaev. «KazSat» baılanys jáne habar taratý ǵaryshtyq júıesin qurý aıasynda úsh joba júzege asyrylýda. Qazirgi tańda «KazSat-2» qalypty jumys istep tursa, onyń júktemesi 63 paıyzdan asqan. Spýtnıktiń resýrsyn Qazaqstannyń 11 baılanys operatory paıdalanyp, 2 mlrd. teńgeden astam somada qyzmet kórsetilgen. «KazSat-3» spýtnıgin qurý men ushyrý jobasy boıynsha jumystar «Akademık M.F.Reshtenıov atyndaǵy aqparat­tyq spýtnıktik júıeler» reseılik jetekshi ǵarysh kompanııasymen jasalǵan kelisimshart aıasynda júrgizilýde. 2013 jyly «KazSat-3» spýtnıgin jalpy qurastyrý men synaý jumystary aıaqtalǵan. «KazSat-3» ǵarysh apparatyn «Baıqońyr» ǵarysh aılaǵynan 2014 jyldyń 30 sáýirine deıin ushyrý josparlanyp otyr. «KazSat» spýtnıkterin basqarý boıynsha rezervti jerústi keshenin qurý jumystary aıaqtalyp, ol ótken jylǵy maýsym aıynda iske qosylǵan. Dáldigi joǵary spýtnıktik navıgasııa júıesi jobasy sheń­berinde ótken jyly teńiz lokal­dy dıfferensıaldy stansa­sy qurastyrylyp, turaqty paı­dalanýǵa berilgen. Dıfferen­sıal­dy túzetý jáne monıtorıng ortalyǵy iske qosylyp, ol táji­rıbelik paıdalanýdan ótkizil­gen. Dıfferensıaldy stansalarda 50 otandyq tájirıbe jasalyp, olar Qazaqstan aýmaǵy boıynsha ornalastyrylǵan. Taǵy bir asa mańyzdy joba «Báıterek» ǵaryshtyq zymyran keshenin qurastyrýy bolsa, Qazaqstan men Reseı úkimetteriniń deńgeıinde «Báıterek» keshenin «Zenıt» zymyrantasyǵyshy negizinde qurý jobasyn júzege asyrý boıynsha birlesken is-sharalar jospary maquldanǵan. Sonymen qatar, 2014-2016 jyl­dar­ǵa arnalǵan «Baıqońyr» keshenin birlesip paıdalaný bo­ıynsha «Jol kartasyna» qol qoıylǵan. Qazaqstan ǵalymdary ǵarysh­tyq zertteýlerge álemdik deńgeıde úles qosatyn birqatar iri ǵylymı nátıjelerge qol jetkizgen. Al­ǵash ret ǵaryshtyq tehnıka men tehnologııalardyń otandyq úlgi­leri qurastyrylǵan. Baıandamasy sońynda agenttik tóraǵasy T.Musabaev Elbasynyń alǵa qoıǵan strategııalyq maqsat­tarynyń mańyzyn atap ótti. Oǵan qol jetkizý úshin eńbek ónimdiligi men jumys sapasyn edáýir arttyrý qajet ekenin de nazardan tys qaldyrmady. «2014 jyl biz úshin óte mańyzdy ári kúrdeli bolmaq. Máselen, táýelsiz Qazaqstan tarıhynda alǵash ret bir jylda 3 ǵaryshtyq apparat, ıaǵnı bir baılanys jasandy serigi men jerdi qashyqtyqtan zondtaýdyń eki apparaty ushyrylatyn bolady», dedi ol. Alqa otyrysyn qory­tyn­dylaǵan Premer-Mınıstrdiń birinshi orynbasary Baqytjan Saǵyntaev Qazaqstannyń álemdegi eń ozyq 30 el qataryna kirý maqsaty aıasynda vedomstvonyń jumysy óte mańyzdy ekenin atap ótti. Sondaı-aq, eldiń ǵarysh qyzmetin damytý jóninde Memleket basshysy alǵa qoıǵan mindetterdi júzege asyrý boıynsha Qazǵaryshqa naqty tapsyrmalar berdi. Ábdirahman QYDYRBEK, «Egemen Qazaqstan».