Syndarly pikir, taǵylymdy talqylaý

Elbasy N.Nazarbaevtyń halyqqa arnaǵan Joldaýy oblys bastaýysh partııa uıymdary arasynda keń qoldaý taýyp otyr. Nurotandyqtar jınalys­tarda bilim berý, densaýlyq saqtaý, asyraýshysynan aıyrylǵan múge­dek­tik boıynsha áleýmettik jár­dem­aqy alý, onyń mólsherin kóbeı­­tý, aýyl sharýashylyǵyn, kásip­kerlikti damytý máseleleri boıynsha jan-jaqty talqylaýlar uıymdastyrdy. Syndarly pikir alysýlar «Mámbetov jáne K» komandıttik seriktestigi janynan qurylǵan bastaýysh partııa uıymynda ótti. Uıym jetekshisi Erkebulan Mámbetov óz sózinde agroónerkásip keshenin ınnovasııalyq baǵytqa túsirý, shaǵyn jáne orta bıznes túrindegi jańa óńdeý kásiporyndar jelisin qurý, sharýa qojalyqtaryn qarjylandyrý jaılaryna keńinen toqtaldy. Ol seriktestikten naqty mysaldar keltire otyryp, mal sharýashyly­ǵyn órkendetýge bıznesti nesıe arqy­ly qoldaýǵa qolaıly jaǵ­daılar týǵyzylǵanyn atap ótti. Aýyldyq jerlerdegi sapaly bilim máselesi nurotandyqtardyń nazaryna alynýy tıis. Elbasynyń balalardy mektepke deıingi bilimmen 100 paıyz qamtý, oqýshylardyń syndarly oılaý, ózindik izdenis pen aqparatty tereń taldaý mashyǵyn ıgerý jónindegi tapsyrmalaryna jumyla atsalysýymyz kerek, dedi jıynda sóıleýshiler. «Rıelt Servıs» JShS bastaýysh partııa uıymynyń músheleri múgedekterdi qoldaý, sybaılas jemqorlyqpen kúres, medısınany damytý jaılaryn keńinen sóz etti. Men kásipker retinde shaǵyn jáne orta bıznesti damytýǵa arnalǵan blogyna erekshe nazar aýdarǵym keledi. Bul máselege Joldaýda erekshe mán berilip, HHI ǵasyrdaǵy Qazaqstandy ındýstrııalyq jáne áleýmettik jańǵyrtýdyń basty quraly retinde ataldy. El ekonomıkasynda onyń úlesi artqan saıyn damýymyz da ornyqty bola túsetinin kúndelikti tájirıbe kórsetip otyr. Jahandyq reıtıngke sáıkes, bıznesti júrgizýge eń qolaıly jaǵdaıy bar elder tobyna kirýimiz bul úrdisti keńinen óristetýge zor múmkindikter beredi. Mindetti medısınalyq saqtandyrýdy engizý jaıy tikeleı jumys berýshilerge de, qyzmetkerlerge de úlken jaýapkershilik júkteıdi, dedi JShS dırektory Saıran Hamzın jınalǵandarǵa arnaǵan sózinde. Eń aýqymdaǵy mundaı talqy­laý­lar aýdandarda da uıymdas­tyryldy. О́mir ESQALI, «Egemen Qazaqstan».  Soltústik Qazaqstan oblysy.