Almatyda ádebıet pen óner qaıratkerlerine Prezıdenttik stıpendııasy jáne jas talanttarǵa Memlekettik stıpendııalar tabystaldy
Keshe Almatyǵa Elbasynyń arnaıy tapsyrmasy boıynsha Prezıdent Ákimshiligi Basshysynyń orynbasary Baǵlan Maılybaev pen Mádenıet jáne aqparat mınıstri Muhtar Qul-Muhammed kelip, dástúrli túrde berilip kele jatqan Prezıdenttik stıpendııasy men mádenıet salasyndaǵy Memlekettik stıpendııalardy tapsyrdy. Ádebıet pen óner maıtalmandaryna kórsetilý ústindegi osynaý yqylasqa bıyl – jıyrma jyl!
Sonymen, keshe Almaty qalasyndaǵy Dostyq úıinde ádebıet pen óner qaıratkerlerine 2013 jyldyń Prezıdenttik stıpendııasy men mádenıet salasyndaǵy Memlekettik stıpendııany tabystaý rásimi bolyp ótti.
Prezıdenttik jáne Memlekettik stıpendııalardyń ıelerine arnalǵan Elbasynyń quttyqtaý sózin Prezıdent Ákimshiligi Basshysynyń orynbasary Baǵlan Maılybaev jetkizdi. Elbasynyń quttyqtaýynda: «Men bıylǵy Qazaqstan halqyna Joldaýymda qoǵamnyń mádenı damýyna basa nazar aýdardym. Atap aıtqanda, mádenı salanyń uzaqmerzimdi tujyrymdamasyn ázirleýdi tapsyrdym. Sondaı-aq, Máńgilik El alǵash ret Ulttyq ıdeıa retinde pash etildi. Biz Máńgilik El bolý úshin til, rýhanııat, dástúr jáne basqa da ulttyq qundylyqtarymyzdy saqtap, damytýymyz kerek», delingen.
Sonymen, stıpendııalar Qazaqstan Respýblıkasynyń qurmetti ataqtary men memlekettik nagradalaryna ıe bolǵan shyǵarmashyl qyzmetkerlerdi, sondaı-aq, mádenıetti saqtap, damytýǵa umtylǵan daryndy jastardy da memlekettik turǵyda qoldaý maqsatynda jyl saıyn beriledi.
Osylaısha bıyl da 100 ádebıet jáne óner qaıratkerine syıaqy berildi. Prezıdenttik stıpendııaǵa ıe bolǵandar qatarynda Bıbigúl Tólegenova, Asanáli Áshimov, Iýrıı Pomeransev, Anatolıı Molodov syndy kóptegen kórnekti óner qaıratkerleri, Ábish Kekilbaev, Marfýǵa Aıthojına, Muzafar Álimbaev, Sherhan Murtaza syndy ádebıettiń tulǵalary bar.
Memlekettik stıpendııa alǵandar arasynda Berik Aıtjanov, Núrken Áshirov, Ámir Bısenǵalıev, Mádına Baspaeva, Taır Gataýov, Álııa Dosbatyrova boldy.
Memlekettiń nazaryna iligip, alǵys aıtyp jatqan ıgi jaqsylarǵa Mádenıet jáne aqparat mınıstri Muhtar Qul-Muhammed Sochıge attanyp ketken Prezıdenttiń atynan alǵysyn jetkizip:
– Elbasyna sizderdiń attaryńyzdan da alǵys aıtýǵa ruqsat etińizder. О́ıtkeni, el damýynyń eń qıyn kezeńinde, osydan týra jıyrma jyl buryn, jalaqynyń da, zeınetaqy men stıpendııanyń da ýaqytynda tólenbeı jatqan tusynda, Qazaqstannyń ár shalǵaıyndaǵy úlken kásiporyndardyń jumysy toqtap turǵanda, Prezıdentimiz ulttyq ıntellıgensııanyń qaımaǵyn jınap, bir jaǵynan rýhanı sep bolsyn dep osy stıpendııany taǵaıyndaǵan bolatyn. Sodan beri jıyrma jyl ótipti. Odan keıin halyqtyń ál-aýqaty men turmysy áldeneshe ósip, ol jyldarmen salystyrǵanda Qazaqstannyń kúsh-qýaty kóbeıse de bul stıpendııa áli kúnge deıin berilip keledi, – dedi.
Elbasy el zııalylarymen osy jyldar arasynda kezdesip júrgende kólemi jaǵynan stıpendııa barlyq máseleni sheship bermese de, bul qarjylyq qoldaý – Memleket basshysynyń ádebıet pen mádenıettiń aıtýly ókilderine kórsetken yqylasy, bolashaǵynan kemel úmit kúttirgen talantty jastarǵa degen qoldaýy ekeni aıtylyp-aq keledi. Sondyqtan da Almatynyń mádenı ómirindegi osynaý dástúrli shara – daralardyń dıdarlasýy, jastarǵa aıtylar aqylgóı amanaty da bolsa kerek.
Mádenıet jáne aqparat mınıstri atqarylǵan jáne ústimizdegi jyly atqarylatyn aýqymdy mádenı sharalardyń jaı-japsaryn da málimdedi.
Mınıstrden keıin sóz kezegi KSRO halyq ártisi, KSRO Memlekettik syılyǵynyń laýreaty Bıbigúl Tólegenovaǵa berildi. О́negeli óner ıesi aldymen Aq Olımpıadaǵa Elbasymen birge attanyp ketken sport sańlaqtaryna sáttilik tiledi.
– Qazir barshamyz jarysqa ketken sportshylarymyzǵa jankúıermiz. Bul salada da júzimiz jarqyn bolyp, abyroıymyz arta bersin, – dep batagóı sózben áńgimesin bastaǵan Bıbigúl Ahmetqyzy qanshama jumysy qaýyrt bolsa da osynaý bastamalarǵa uıytqy bolyp kele jatqan Elbasyna, eline amandyq tiledi, júrekjardy lebizderin jetkizdi.
Bıbigúl apamyz da osy jıyrma jylda talaı jaqsylyqtarǵa retimen kýá bolyp júrse de, azǵana jyldardyń ózinde ózimen úzeńgiles tulǵalardyń kelmeske ketip qalǵany úshin de kóńilinde qaıaý bar ekenin jasyra almaı, endigi ónerdegi jastarǵa munan da dáýirli zamandar tiledi.
Dátke – qýat! Tulpardyń ornyn taı basyp jatqan kezeńder. Bıyl Memlekettik stıpendııaǵa ilikkender arasynda jurttyń kóz aldynda ósip kele jatqan akterlerdiń, bekzat ónerdiń juldyzyn jaqqan balet bıshileriniń, arqaly aqyndardyń jańa esimderi de tabylady. Mańǵystaýdyń mań dalasynda kesek-kesek jyrlarymen, tas teskendeı shýmaqtarymen tanylǵan Rahat Qosbarmaqov syndy aqyn solardyń biri.
El úkilep otyrǵan osyndaı jastardy, halyqaralyq festıvalderde ulttyq ónerdi óz deńgeıinde dáriptep júrgen daryndardyń birqataryn mınıstr aǵa býynǵa tanystyryp shyqty.
Osydan keıin Almatydaǵy M.Iý.Lermontov atyndaǵy Memlekettik akademııalyq orys drama teatrynyń beldi akteri Vladımır Tolokonnıkov sóz alyp, osynaý jyldarda otandyq óner qandaı tabysqa ıek artsa da onyń negizinde óner adamdarynyń yntymaǵy men aýyzbirshiligi jatqanyn jarqyn mysaldarmen dáleldedi. Orys drama teatry osy jyldarda tıisti deńgeıde óner kórsetip qana qoımaı, ejelden kórshi, ejelden týys Qazaqstan men Reseı mádenıetteri arasyna altyn kópir bolǵanyn, táýelsizdik jyldarynda ǵımaraty kúrdeli jóndeýden ótip, eń zamanaýı sahnalyq tehnıkalarmen jabdyqtalǵanyn, endigi jerde teatr álemniń eń aıtýly ujymdaryn uıalmaı qarsy alatyn deńgeıde ekenin baıandady.
Qazaqtyń aqyn qyzy Aqushtap Baqtygereeva da eljandy tilekpen sóz tıegin aǵytty. Shyǵarmashylyq aınalasyndaǵy áńgimelerdi qozǵap, tildesýdiń tamasha múmkindigin taýyp bergen Memleket basshysyna shynaıy alǵysyn jetkizdi.
Astanadan Elbasynyń amanatyn arqalap kelgen mınıstr Muhtar Qul-Muhammed osydan keıin óziniń burynǵy áriptesi – Qazaqstannyń burynǵy mádenıet mınıstri Jeksembek Erkimbekovke sóz kezegin berdi.
Atalǵan salanyń máselesin bir kisideı biletin mádenıet qaıratkeri kóptegen ornyqty usynystaryn ortaǵa saldy. Tek 2013 jyly otandyq mádenıet salasynda aýyz toltyryp aıtarlyq birqatar is-sharalar, aýqymdy oqıǵalar bolǵanyn atap ótti. «Astana Opera» teatrynyń ashylýynan da bólek, Muqan Tólebaevtyń 100 jyldyǵy respýblıka kóleminde ǵana emes, elden tys jerlerde keńinen atap ótilgenin, Qazaqstannyń Qytaı Halyq Respýblıkasynda, Ońtústik Koreıa men Vetnamda mádenı kúnderi tabysty atqarylǵanyn atady.
Qoryta kelgende, Prezıdenttik jáne Memlekettik stıpendııaǵa laıyq shyǵarmashylyq ıeleriniń bári de aldymen eldiń amandyǵyn tilep, Máńgilik Eldiń ónerine máńgi qyzmet etýge daıyn ekendikterin bildirdi. Jer barda, onyń betinde Qazaq degen el barda óner de óristeı bermek!
Aınash ESALI,
«Egemen Qazaqstan».
ALMATY.
Sýretti túsirgen Iýrıı BEKKER.
