Qoıdy qasqyrǵa baqtyrǵanda...

Qostanaıda esirtki saýdasy jáne olarǵa «kókelik» jasaǵandar jónindegi ótken jyly bastalǵan «shýly» istiń núktesi qoıyldy. Ádette, polıseılerge eldiń ty­nysh­tyǵyn qorǵaıdy, qylmysty azaıtýǵa atsalysady dep senemiz. Al polıseı eldiń, ulttyń, tipti, adamzattyń bolashaǵy úshin qaýipti dert sanalatyn esirtki saýdasynyń qyza túsýine «atsalyssa», onymen aınalysatyndardy «qorǵap» otyrsa, olardy qoı baqtyrǵan qasqyr demegende ne deımiz? Qanshama órimdeı jastar polıseıler syrtynan «bas-kóz» bolyp, «kókelik» jasap otyrǵan esirtki saýdasynyń qurbanyna aınalady. Oblysta ótken jyly esirtki saýdasymen aınalysqan osyndaı úlken top quryqtalyp, soty birneshe aıǵa sozylǵan edi. Qylmystyq top 16 adamnan turady. Onyń ishinde 6 áıel – esirtki taratatyn júgirtekter, al on qylmysker – sheni serjanttan maıorǵa deıingi burynǵy polısııa qyzmetkerleri. Eń qaýiptisi de osy, jas urpaqty azdyrar julynqurtqa aınalǵan esirtki bıznesine polıseıler kiristi. El kimge senedi? Sot úderisine qatysqandardy qınaǵany da osy oı edi. Al Qostanaıda esirtki taratatyn uıymdasqan qylmystyq top búgin ǵana belgili bolyp otyrǵan joq, ol mundaı aram ispen, geroın satýmen kóp jyldan beri aınalysyp kelgen. Aqyrynda ádil sot olardyń árqaısysyna qylmys aýyrlyǵyna qaraı jaza úkimin shyǵardy. Topqa jetekshilik jasaǵan Rezıda Asylbaeva men Alevtına Petrenkonyń árqaısysy 20 jyldan bas bostandyǵynan aıyryldy. Nadejda Kıselevaǵa – 10 jyl, Polına Seredenkovaǵa – 8 jyl, Lıýbov Osennıkovaǵa – 10 jyl, Olga Chebýnınaǵa 8 jyl berildi. Al esirtki bıznesine «qam­qorlyq» jasaǵan polıseılerdiń arasynda jazanyń eń aýyryn, ıaǵnı 16 jyldy polısııa aǵa leıtenanty Nurlan Álmaǵanbetov arqalady. Odan keıin polısııa aǵa leıtenanttary Ermek Orazaqov, Samat Ermaǵambetov, Rıval Ǵazızýllın jáne polısııa kapıtany Serikjan Muhamedjanovtyń árqaısysy 15 jyl 5 aıdy temir tordyń arǵy jaǵynda ótkizedi. Polısııa maıory Jangeldi Erkebaev – 6, polısııa kapıtany Dmıtrıı Soı – 4, polısııa maıory Arman Bozbalın – 4, kishi serjant Nursultan Shýpov – 2 jylǵa, aǵa leıtenant Tólegen Naýryzbaev – 5 jylǵa sottaldy. Otannyń, eldiń, ata-ananyń, memlekettiń senimin esirtkiden keletin aram aqshaǵa aıyrbastaǵan olardyń barlyǵy da 30 ben 40-tyn arasyndaǵy jigitter. Alǵan bilimin eldiń ıgiligine, otbasyna, balalarynyń tárbıesine jumsaıtyn, aqyl-oı toqtatqan, tolysqan shaqtary. Eńbeksiz kelgen aqshaǵa elik­kenderdiń ózderiniń aıtqan antyna satqyndyq jasaǵandary ókinishti. Al esirtki bıznesiniń osylaı «damýynyń» qaýpi kimdi de bolsa oılantary haq. Názıra JÁRIMBETOVA, «Egemen Qazaqstan». QOSTANAI.