Mysaly, Qaraǵandy qalasyndaǵy №78 mekteptiń qazaq tili men ádebıeti pániniń muǵalimi Maǵrıpa Káribekova men Shahtınsk qalasyndaǵy «Snegýrochka» bóbekjaıynyń ádiskeri Alfııa Nasıbýllına «Eńbek ardageri» medaline ıelik etti.
Al Aqtas kentindegi №16 mekteptiń qazaq tili men ádebıeti pániniń muǵalimi, osy salada 30 jyldan astam ýaqyt jumys isteıtin Zıra Satovaǵa Úkimet basshysy Asqar Mamınniń Alǵys haty tabys etildi.
Ulaǵatty ustaz aldymen hımııa jáne bıologııa pánderinen sabaq beripti, keıin «Qazaq tili men ádebıeti pániniń muǵalimi» mamandyǵy boıynsha ekinshi joǵary bilim alǵan eken.
– Men áli kúnge deıin osy pándi oqytamyn. Qazir kásibı turǵyda ósý úshin kóptegen múmkindik bar. Tek qana alǵa basyp, oqytýda jańa shyǵarmashylyq ıdeıalar men tehnologııalardy engizý qajet. Eńbegimniń joǵary baǵalanǵanyna óte qýanyshtymyn, – deıdi Z.Satova.
Budan bólek, segiz muǵalim «Qazaqstan Respýblıkasy Bilim berý isiniń qurmetti qyzmetkeri», úsh ustaz «Bilim jáne ǵylym qyzmetkerleriniń kásipodaǵyna sińirgen eńbegi úshin» jáne segiz pedagog «Y.Altynsarın» tósbelgilerimen marapattaldy.
Aıta ketetin bir jaıt, muǵalimder merekesinde elimizge belgili mesenat Bekzat Altynbekov taǵy bir ıgi istiń amalyn jasady. Kásipker taǵaıyndaǵan árqaısysy 500 myń teńge mólsherindegi syılyqqa Olga Tarasenko, Quralaı Muqanova, Raısa Eleýsizova, Menzıf Mýrtazına jáne Serik Balpanov ıe boldy. Bilim berý salasynda kóp jyldan beri jemisti eńbek etip kele jatqan bul mamandarǵa syılyqty mesenattyń uly Ernııaz Bekzatuly tapsyrdy.
