Qarýyn qalamǵa aıyrbastaǵan

Talaı bozdaqty qurban etip, talaı jaýyngerdi jarymjan kúıge túsirgen Aýǵan soǵysyn keńes áskerleriniń tastap shyqqanyna da shırek ǵasyr ýaqyt bolypty. Ulynan qapyda kóz jazǵan ananyń kóz jasy áli kepken joq. On jyl boıy kim úshin, ne úshin soǵysqanyn bilmegen sarbazdar 15 aqpandy merekelep, sol kúni bir serpilip qalady. О́ıtkeni, 1989 jyldyń dál osy kúni olar Aýǵanstan jerin birjola tastap shyqqan-dy. Elimizden bul soǵysqa 22 myń sarbaz ben sardar qatysyp, olardyń 761-i elge tabytpen oralsa, 21-i iz-túzsiz ketkender qatarynda deıdi resmı derek. Al elordamyz Astanadan (ol kezderi Selınograd edi) boryshtaryn ótegen jaýynger-ınternasıonalısterdiń arasynda Selınograd oblystyq áskerı komıssarıatynan áskerge 1981 jyly shaqyrylǵan áriptesimiz Ǵalym Qojabekov te bar edi. О́ziniń áskerı boryshyn Aýǵanstan jerinde tolyqtaı ótep, elge esen-saý oralǵan ol kelgen boıda qarýyn qalamǵa aıyrbastady. Onyń dáleli, joǵary bilim ala júrip, Selınograd oblystyq «Kommýnızm nury» (qazirgi «Arqa ajary») gazetine jumysqa turýy edi. Osynda júrip temirqanat bolǵan ol toqsanynshy jyly qazaqshaǵa sýsap júrgen jurtshylyqtyń nıetine ashylǵan «Aqmola aqıqaty» (qazirgi «Astana aqshamy») gazetine 1995 jyly aýysady. Mine, osydan keıin keıipkerimizdiń ekinshi tynysy ashylyp, ózin jańa qyrynan kórsetedi. Etken eńbek pen tógilgen ter tekke ketsin be, ol osy jerden bas redaktordyń birinshi orynbasarlyǵyna deıin kóteriledi. Sol ýaqyttan beri onyń shyǵarmashylyq ǵumyry osy gazetpen bite qaınasyp keledi. Sport dese, ishken asyn jerge qoıatyn Ǵalymnyń jyldar boıǵy tájirıbesiniń jemisi salaǵa qatysty kitaptar jazýymen tolyǵýda. Sondaı-aq, óndiristik tájirıbeden elimizdiń túkpir-túkpirinen kelgen stýdentterge aǵalyq aqyl-keńesterin aıtyp, baǵyt-baǵdar berýi de olardyń mamandanýlaryna óz septigin tıgizýde. «Keler urpaq soǵysty kórmek túgili, estimese eken. Bul soǵys biz­ben ketsin. Elimiz tynysh, irge­miz berik, táýelsizdigimiz tuǵyrly bolǵaı», deıdi jaýynger-jýrnalıst. Búginde aıaýly áke, qadirli jar, qadirmendi ata bolyp otyr­ǵan Ǵ.Qojabekov sol soǵys jyldaryndaǵy qarýlas dostaryn jıi esine alyp otyrady. Ásirese, opat bolǵan joldastaryn oılaǵanda esine jaýynger aqyn Baqytbek Smaǵuldyń: Japyraqsyz tur qaıyń yrǵatylyp, Syńǵyr-syńǵyr syr minez, syrǵa qylyq. Oılaǵanda ózińdi, qarýlas dos, Jas júregim ketedi ýǵa tolyp, degen óleń joldary eriksiz eske túse beredi. Áıtse de ol eńsesin túsir­meıdi. Keıingi tolqyn aman bolsyn degen tilegin ishteı qaıtalaýmen bolady. Ábdirahman QYDYRBEK, «Egemen Qazaqstan». ASTANA.