Obyr dertin emdeý memorandýmy

Astana qalasy búkil álemge tanymal Gýstav Rýssı atyndaǵy fransýz onkologııa ınstıtýtymen áriptestik qarym-qatynasyn ulǵaıtýda. Munyń dáleli retinde keshe elorda ákimdiginde shahar basshysy Imanǵalı Tasmaǵambetov pen atalǵan ınstıtýttyń bas dırektory Aleksandr Eggermont strategııalyq seriktestik pen ynty­­maqtastyq týraly memoran­dýmǵa qol qoıdy. Memorandým Astana qala­syndaǵy onkologııalyq qyz­met­ti ári qaraı damytý úshin halyq­aralyq dıagnostıka jáne emdeý standarttaryn engizý, sonymen birge, onkologııalyq patologııalardy aldyn alý men emdeýdiń zamanaýı ádisterin paıdalana otyryp, elorda mamandarynyń biliktiligin arttyrýǵa baǵyttalǵan. Budan ózge taraptar aýrýdy dıagnostıkalaý men emdeý salasyndaǵy ınnovasııalyq tehnologııalarymen tájirıbe almasý syndy ózge de salada birqatar ıgi jumystar jasaýǵa kelisti. Gýstav Rýssı atyndaǵy onkologııa ınstıtýty quramynda 11 joǵary tehnologııalyq ǵylymı zerthanalar, eki myńnan astam joǵary bilikti mamandar jumys istese, jyl saıyn eki júz myńǵa deıin keńester berilip, bir jylda shamamen 12900 stasıonarlyq naýqastarǵa qyzmet kórsetiledi eken. Búgingi tańda ıgilikti isterdiń nátıjesinde Fransııada obyr keseline shaldyqqandardyń 70 paıyzy naýqastarynan saýyqqan. 2009 jyly Astana qalasyn damytý baǵdarlamasy boıynsha onkologııa ortalyǵynyń zamanaýı jabdyqtarmen jabdyqtalǵan morfologııalyq dıagnostıka blogy bar ár aýysymda 380 kelip-ketýshilerge arnalǵan emhanasy, jańa 245 oryndy emdeý ǵımaraty qoldanysqa berilgen. Onkologııa dıspanseri orta eseppen 6,5 myń qala turǵyndaryna, onyń ishinde medısınalyq uıymdy tańdaý boıynsha ózge de óńir turǵyndaryna kómek kórsetedi. Jyl saıyn álemde 10 mln. dert tirkelip, onyń 6,2 mıllıony onkologııa aýrýynan qaıtys bo­lady eken. Al Qazaqstanda jyly­na obyrdyń 30 myń jańa túri anyq­talsa, onkologııamen aýyratyn 140 myń naýqas esepte turady. Onyń 60 paıyzy hımııa terapııadan ótýge muqtajdar sanatynda. Elimizdegi obyr syrqatyna shaldyqqandar tegin dári-dármekpen qamtamasyz etiledi. Ábdirahman QYDYRBEK, «Egemen Qazaqstan». ––––––––––––––– Sýretti túsirgen Sultan Seıitov.