Almatydaǵy saq qorǵandary joıylyp ketýi múmkin

Almaty oblysyndaǵy «Altyn adam» tabylǵan áıgili Esik qorǵandary jer betinen múldem joıylyp ketýi yqtımal. Bul týraly «Jetinshi arna»  habarlady. Saq qorǵandary jatqan tarıhı mekenge erekshe qorǵaýǵa jatatyn mártebe berilgenimen, sonyń 90 paıyzǵa jýyq aımaǵy jeke tulǵalarǵa satylyp ketken. Qoryq qyzmetkerleriniń aıtýynsha, kóktem shyǵa qorǵannyń bir bóligi súrilip, onda qurylys jumystary bastalatyn kórinedi. «Esik qorǵandary tóńiregine mektep salýdyń qajeti joq. Men osy máselege qatysty narazylyǵymdy jergilikti ákimshilikke aıttym», - deıdi «Esik» memlekettik tarıhı-mádenı qoryq-murajaıy respýblıkalyq memlekettik qazynalyq kásipornynyń dırektory Gúlmıra Muhtarova. Eńbekshiqazaq aýdany ákiminiń orynbasary Nurjan Qudaıbergenovtiń aıtýynsha, Esik qalasynda jer telimi tapshylyǵynan qorǵan janynan mektep salý josparlanǵan. Al qoryq qyzmetkerleri jergilikti bıliktiń bul sheshimimen kelispeı otyr. Osydan bir jyl buryn respýblıkalyq buqaralyq aqparat quraly ókiline bergen jaýabynda О́ńirlik tarıhı-mádenı muralardy saqtaý ortalyǵynyń dırektory Eset Dáýrenbaev bylaı degen edi: «Esik qorǵandary dúnıejúzilik IýNESKO murasynyń tizimine engizilýi múmkin. Sonymen birge, Jambyl aýdanyndaǵy Tamǵaly-Tas petroglıfteri men Sarqand aýdanyndaǵy Qoılyq qalashyǵy,Talǵar aýdanyndaǵy Talhıs qalashyǵy jáne Balqash aýdanyndaǵy Qaramergen qalashyqtary tizimge engiziledi. Qazir osyǵan qatysty uıymdastyrý jumystary júrgizilýde. 2014 jyly mádenı muralarǵa arnalǵan IýNESKO -nyń tizimin Esik qorǵandary toltyrar dep úmittenemiz». Ámirhan Almaǵanbetov. Derekkóz: «Jetinshi arna». Foto: Zhetysu.gov.kz.