Shaǵymdar qaraýsyz qalmaıdy

«Nur Otan» partııasy janyndaǵy Sybaılas jemqorlyqqa qarsy respýblıkalyq qoǵamdyq keńestiń tóraǵasy jáne partııanyń Májilistegi fraksııasynyń múshesi Qaıyrbek Súleımenov tuńǵysh ret azamattardy qabyldady. Qabyldaýǵa 20-ǵa tarta adam jazylypty. Olardyń deni qarjy polısııasy men memlekettik organdar qyzmetkerlerine, sondaı-aq, sot júıesine shaǵymdaryn aıta kelipti. Bul rette qylmys­­tyq isterge qatys­ty sot sheshim­derine rıza emestigin bildirip jatqandar da boldy. Mysaly, Kókshetaý qalasynyń turǵyny Ásem Shamgýnova Aqmola obly­syndaǵy ekonomıkalyq jáne sybaılas jemqorlyqqa qarsy kúres departamenti qyzmetkerleriniń ústinen shaǵymdanyp, qylmys­tyq is qozǵaý qaýlysymen kelis­peıtindigin jetkizdi. Al aýyl turǵyny Ga­lına Sıkachıno Astana qalasy aýdan­aralyq mamandandyrylǵan sotynyń qylmystyq is jónindegi she­shimimen kelispeıtindigin bildirdi. Sondaı kelispeýshiligin bil­dirip, keshe Qoǵamdyq qabyldaýǵa Olımpıada chempıony Baqyt Sár­sekbaev ta bas suqty. Ol Qaıyrbek Súleımenovten alaıaqtyq deregi boıynsha qylmystyq is máselesin qaraýdy surady. Onyń aıtýynsha, páter syıǵa tartylǵan jat­tyqtyrýshy Mahmudov ózine alǵan mindettemesin oryndamaǵan. Al atalǵan baspanaǵa bir tıyn salmaǵan úshinshi jaq ony ıelenýge talpynyp jatqanǵa uq­saıdy. Onyń ústine, Olımpıada chempıony ózin jáne senimdi ókilin sýdıa sot prosesine shaqyrmaı, syrttaı sheshim shyǵarǵanyna kelispeıtindigin bildirdi. Al se­nimdi ókildiń syrqattanyp qalýy týraly anyqtamasy bola tura, ony sýdıa qaperge almaǵan. Sóıtip, sot ertesine tańerteńgisin ótip, japa shegýshi jaqtyń qatysýynsyz sheshim shyǵarylǵan. Sportshynyń shaǵymyn tyńdap bolǵan soń, Q.Súleımenov sottyń zańsyz sheshim qabyldaýy boıynsha derekti anyqtaý úshin shaǵymdy Joǵarǵy Sotqa jol­daıtynyn aıtty. Sársekbaevtyń basyndaǵy jaǵ­daıǵa túsinik bere ketken «Nur Otan» partııasy Respýblıkalyq qoǵamdyq qabyldaý bólmesiniń meńgerýshisi Rýslan Asaýbaev eshkim sottar men tergeý organ­darynyń jumysyna aralasa almaıtynyn, bul jerde másele partııa tarapynan japa shegýshige quqyqtyq keńes beriletindiginde ekenin jetkizdi. Onda da quqyqtyq qoldaý tegin negizde jasalady. Iаǵnı barlyq tıisti qaǵazdary rettelgennen keıin qorǵaýshylar iske kirisetin bolady. Jalpy, partııanyń Ortalyq qoǵamdyq qabyldaý bólmesiniń meńgerýshisi jyl basynan beri jeti depýtat pen jeti memlekettik organ laýazymdy tulǵalarynyń qabyldaýynda myńǵa tarta adam­nyń bolǵanyn alǵa tartty. Onyń aıtýynsha, 2014 jyldyń qańtary men 1 aqpany aralyǵynda quqyq qorǵaý organdary men sot júıesine shaǵymdanǵan 194 aryz túsipti. Olardyń ishinde 72 adam sot she­shimderimen kelispeıtindikterin bildirse, 61-i sot sheshimderiniń oryndalmaıtynyna shaǵymdanǵan. Jáne de memlekettik qyzmetker­lerdiń áreketteri men áreket­siz­dikteri úshin de 88 adam shaǵym­da­ryn aıta kelgeni málim boldy. Budan basqa 275 azamatqa zańdyq keńes berilipti. Asqar TURAPBAIULY, «Egemen Qazaqstan».