«QazAgro» qyzmeti tıimdi bola tústi

Ortalyq kommýnıkasııalar qyzmetinde «QazAgro» ulttyq basqarýshy holdıngi» AQ basqarma tóraǵasy Dýlat Aıtjanov Astanadaǵy buqaralyq aqparat quraldary ókilderimen kezdesip, holdıngtiń ótken jylǵy qyzmetiniń qorytyndylary men Memleket basshysy Nursultan Nazarbaevtyń bergen tapsyrmalarynyń oryndalý barysy týraly aıtyp berdi. Baspasóz máslıhatyn júrgizgen Ortalyq kommýnıkasııalar qyzmetiniń ókili agrarlyq sektordyń el ómirindegi mańyzyn, osyǵan baılanysty oǵan memleket tarapynan erekshe kóńil bólinip otyrǵandyǵyn jetkize ketti. Sondyqtan bul salaǵa aldaǵy ýaqyttary onda óndiriletin ónim kólemin eselep arttyrý mindeti júktelgen. Sóz kezegin alǵan «QazAgro» basshysy Dýlat Aıtjanov ótken jyly holdıngtiń agrarlyq sektorǵa baǵyttaǵan qoldaý qarjysy 193,5 mıllıard teńgeni quraǵandyǵy, munyń 171,2 mıllıard teńgesi aýylsharýashylyq qurylymdary men aýyldaǵy halyqty nesıelendirýge jumsalǵandyǵyn atap kórsetti. Bul rette eskeretin bir jaıt, holdıng qyzmeti júıege túsip, damytylǵan saıyn aýyl sharýashylyǵyna baǵyttalyp otyrǵan onyń ózindik jáne tartqan ınvestısııalyq qarjysynyń úlesi molaıyp, memleket tarapynan beriletin nesıe kólemi azaıyp keledi. Máselen, ótken jyly holdıngtiń qarjylandyrý qurylymyndaǵy respýblıkalyq bıýdjet qarajatynyń kólemi bar bolǵany 9 paıyzdy qurasa, jyl qorytyndysynda holdıngtiń jyldyq nesıe qorjynynyń úlesi jalpy kólemniń 48 paıyzyna deıin jetip, 348 mıllıard teńgeni qurady. Demek, jyl ótken saıyn holdıng qyzmetiniń tıimdiligi arta túsýde. Búgingi kúni aýyldyq jerlerdegi halyqqa beriletin shaǵyn nesıeniń 93 paıyzy holdıng quramyndaǵy Aýyl sharýashylyǵyn qarjylaý qoldaý qorynyń enshisine tıedi. Sol sekildi agrarlyq sektorǵa beriletin árbir úsh aýyl-sharýashylyq tehnıkalarynyń ekeýin holdıng quramyndaǵy taǵy bir iri korporasııa «QazAgroQarjy» AQ lızıngke satyp áperýde, dep málimdedi «QazAgro» basshysy. Holdıng ınvestısııalyq baǵdarlamalar aıasynda jalpy quny 237,5 mıllıard teńge turatyn 346 jobany qarjylandyrǵan. Munyń 290 jobasy paıdalanýǵa berilse, sonyń ishinde 160 jobanyń júktemelik qýaty 70 paıyzdan asyp otyr. О́tken jyldyń ózinde 68 joba iske qosylǵan. Mine, osyndaı jumystardyń nátıjesinde 15,4 myń adam jańa jumys oryndarymen qamtyldy. Munan ári Dýlat Aıtjanov Elbasy bergen tapsyrmalardyń oryndalý barysy týraly baıan­dap ótti. Elbasy holdıng qyzmetine qatysty 7 tapsyrma bergen eken. Olardyń barlyǵy oryndalý ústinde jáne naqty nátıjeleri de jaman emes. Dýlat Aıtjanov munyń árbirine jeke-jeke toqtalyp ótti. Elbasy aýylsharýashylyq qurylymdaryn nesıelendirýdi jandandyrý, sonyń ishinde shaǵyn jáne orta bızneske qarjylaı qoldaýdyń tıimdi tetikterin qarastyrý jóninde tapsyrma bergen bolatyn. Osyǵan sáıkes 2013 jyly shaǵyn jáne orta bıznes úshin nesıelendirýdiń jańa túrleri engizildi. Solardyń qatarynda iri qara malyn lızıngke berý, buryn paıdalanylǵan tehnıkalardyń lızıngi, jedel lızıng, daıyn nysandardyń lızıngi, sheber-lızıng sekildi nesıe túrleri bar. Eger 2012 jyly nesıe alýshylar sany 7803 birlikti qurasa, 2013 jyly bul kórsetkish 15618 birlikke jetti. Al 2014 jyly holdıng bul kórsetkishti endi 17,5 myńǵa jetkizýdi josparlap otyr, dep habarlady «QazAgro» basshysy. Sol sekildi Elbasynyń tapsyrmasyna sáıkes jumys istemeıtin qaryzdardy tómendetý jóninde de sharalar qabyldanyp, iske asyryla bastaǵan. 2013 jyly mundaı nesıelerdiń úlesi 10-nan 7 paıyzǵa deıin tómendetilgen. 7,6 mıllıard teńgeden astam problemaly qaryzdar óndirilip alynǵan. Osyǵan baılanysty basqa da jumystar júrgizilgen. Elbasynyń agrarlyq sektorǵa júktegen taǵy bir úlken tapsyrmasy et eksportynyń kólemin arttyrý ekendigi belgili. Holdıng osyǵan baılanysty ótken jyly biraz júıeli jumystar júrgizdi. Máselen, holdıng qarjylandyrǵan jobalar boıynsha Reseı men Belarýs elderine 2013 jyly 1870 tonna et pen onyń ónimderi, Reseı, Qytaı, Italııa elderine 890 tonna bııazy jún, Qytaı men Germanııaǵa 2330 tonna bylǵary ónimderi jóneltildi. Eksporttyń jalpy somasy 1,5 mıllıard teńgeni qurady. Al bıylǵy jyly osy kórsetkishti eki esedeı kóterip, 2,9 mıl­lıard teńgeniń mal sharýashylyǵy ónimderin eks­­porttaý­dy josparlap otyrmyz, dedi Dýlat Aıtjanov. Osy rette holdıng basshysy Qazaqstan et ónimderiniń sapasy Máskeý jurtshylyǵy tarapynan laıyqty baǵalanyp otyrǵandyǵyn, bul qalada bizdiń et ónimderimizge degen suranystyń artqan ústine artyp kele jatqandyǵyn, sonyń nátıjesinde qaladaǵy asa iri saýda mekemesi «Mosregıontorg» AAQ men ózara túsinistik pen yntymaqtastyq týraly memorandýmǵa qol qoıylǵandyǵyn jetkizdi. Sondaı-aq, holdıng quramyndaǵy «Azyq-túlik korporasııasy» AQ ótken jyly Qytaıǵa 10 myń tonna astyq eksporttaǵan eken. Holdıng bul isten úlken úmit kútýde. Sóıtip, bıyl bul kórsetkishti 30 myń tonnaǵa jetkizýdi josparlap otyr. Dýlat Aıtjanov sóziniń sońynda elimizde jýyqta ǵana bolyp ótken shara – teńge baǵamynyń ózgertilýine baılanysty oryndalatyn jumystardy da baıandaı ketti. Onyń aıtýynsha, bul shara holdıng quramyndaǵy korporasııalar úshin tıimdi bolyp tabylady. О́ıtkeni, syrtqa shyǵarylatyn eksporttyq ónimder kólemi artady. Osyǵan baılanysty aýyl sharýashylyǵyndaǵy jaǵdaı da jaqsara túsedi. Holdıngtiń nesıe qorjyny 343,3 mıllıard teńgeni qurasa, sonyń 26,7 mıllıard teńgesi nemese 8 paıyzy ǵana basqa valıýtaǵa baılanǵan. Sondyqtan bizden nesıe alýshylar kóp zardap shege qoımaıdy. Onyń ústine sheteldik bank­terden tartylǵan nesıeler boıynsha birqatar báseńdetý sharalaryn qarastyrý ústindemiz. Al teńge boıynsha alynǵan nesıeler ózgermeıdi. Qaryzgerlerdiń negizgi bóligi úshin nesıelendirý sharty burynǵy qalpynda qalady. Mindettemeler arttyrylmaıdy. Bul jaǵynan alǵanda, olar utysqa shyǵyp otyr dep esepteımiz, dedi holdıng basshysy. Dýlat Aıtjanov jýrnalısterdiń qoıǵan barlyq suraqtary boıynsha naqty da tushymdy jaýap qaıtardy. Suńǵat ÁLIPBAI, «Egemen Qazaqstan».