Búgingi tańda «UAT» AQ-da aqparattyq qaýipsizdikti qamtamasyz etýdiń túrli zamanaýı quraldary engizildi jáne qoldanylady. Onyń ishinde 24/7 rejiminde kıbershabýyldardan senimdi qorǵaýdy qamtamasyz etetin aqparattyq qaýipsizdiktiń jedel ortalyǵy jumys isteıdi. Aqparattyq tehnologııalar salasyndaǵy qylmystar sanynyń ósýi uıymdardyń aqparattyq júıeleriniń qorǵalýy men turaqtylyǵyna qoıylatyn talaptardyń artýymen qatar júredi.
Osyǵan baılanysty «UAT» AQ servıster men qosymshalardyń qaýipsizdigin qamtamasyz etýdiń ulttyq baǵdarlamasy – Bug Bounty baǵdarlamasyna qosyldy. Bul júıe elektrondy úkimet resýrstarynyń kıberqaýipsizdigin qorǵaýdyń neǵurlym joǵary deńgeıin qamtamasyz etýge múmkindik beredi.
«Kún saıyn myńdaǵan aqparattyq júıeler, sonyń ishinde memlekettik organdar hakerlerdiń shabýylyna ushyraıdy. Biz úshin elektrondy úkimet derekterin qaýipsiz saqtaý jáne qorǵaýdy qamtamasyz etý mańyzdy. Yntymaqtastyqtyń nátıjesinde biz júıelerimizdiń qaýipsizdik deńgeıin joǵarylatyp qana qoımaı, óz resýrstarymyzdy únemdeımiz», dep atap ótti «Ulttyq aqparattyq tehnologııalar» AQ basqarma tóraǵasy Rostıslav Konıashkın.
Byltyr jeltoqsan aıynda Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın memlekettik organdarǵa arnalǵan Bug Bounty baǵdarlamasynyń iske qosylǵanyn habarlaǵan bolatyn. Sol kezde jabyq testileý aıasynda zertteýshilerden ǵalamtordyń qazaqstandyq segmenttiń basym bóligine áser etýi múmkin mańyzdy osal tustar anyqtaldy.
«Dúnıejúzilik tájirıbe kórsetkendeı, iri IT-kompanııalardyń Bug Bounty baǵdarlamalaryna qosylýy kompanııanyń kıberqaýipsizdikke mán berip, ony óz tutynýshylary úshin ashyq ekendigin kórsetedi. «UAT» AQ memlekettik sektordan birinshi bolyp ulttyq Bug Bounty baǵdarlamasyna qosyldy. Biz bul sheshimdi qoldaımyz, óıtkeni bul aqparattyq júıelerdi qorǵaýǵa degen kózqarastyń jetilgenin kórsetedi», dedi «Kıbershabýyldardy taldaý jáne tergeý ortalyǵy» ZTB prezıdenti Oljas Satıev.
Aıta ketelik, Bug Bounty – kompanııa syıaqy alý úshin baǵdarlamalyq jasaqtamany osaldyqtardy tekserý maqsatynda úshinshi tarap kıberqaýipsizdik sarapshylaryn tartatyn arnaıy baǵdarlama. Bul baǵdarlamany Google, Facebook jáne Mozilla sııaqty kompanııalar paıdalandy jáne qosymsha qaýipsizdik mamandaryn jaldaý qunyn únemdeı otyryp, olardyń júıelerin senimdirek etti. Ulttyq Bug Bounty platformasynyń operatory Ortalyq Azııadaǵy kıberqaýipsizdik qyzmetteriniń kóshbasshysy – TSARKA.
