Jalpy, ótken jyly sarqandyqtar «dala arýy» atanǵan daqyldy 2200 gektarǵa sepse, bıyl onyń alqaby 4585 gektarǵa jetken. Qazir sharýashylyqtar júgeri jınaý naýqanyn tolyq aıaqtady. Aýdanda elýge jýyq sharýashylyq júgeri ósirýmen aınalysyp otyr. Olar ótken jyly 2200 gektar jerden 6 myń tonna ónim jınasa, bıyl 4585 gektardan 25 myń tonnadan astam júgerini qambaǵa basty. О́ńirde sharýa qojalyqtaryn memlekettik qoldaý, erekshe sortty tuqymdar úshin sýbsıdııa, ártúrli aýylsharýashylyq tehnıkalaryn alýda jeńildetilgen nesıe, sondaı-aq naýqan kezinde jeńildetilgen jaǵar janarmaımen ýaqytyly qamtamasyz etý jolǵa qoıylǵan.
– Júgeri mal azyǵy retinde baǵaly. Maldyń tez qońdanýyna kómegi zor. Sondyqtan jınalǵan ónimderdiń basym bóligi mal azyǵyna jóneltiledi. Negizgi daqyldardyń barlyǵyn ótken aıdyń sońyna deıin aýa raıynyń qolaıly kezinde oryp úlgerdik. Qarashanyń aıaǵyna deıin maıly daqyldar jáne qant qyzylshasyn jınaýdy mejelep boldyq, – deıdi Sarqan aýdandyq aýyl sharýashylyǵy bóliminiń basshysy Jandos О́mirsadyq.
Sarqan aýdanynda bıyl aýyl sharýashylyǵy baǵytyndaǵy egistik alqaby 98 myń ga bolsa, sonyń 58 myń gektaryna dándi jáne burshaqty daqyldar sebilgen. Egistikten jalpy jınalǵan ónim – 138 tonna. Al oblys boıynsha aýyl sharýashylyǵy daqyldarynyń alqaby 3,7 myń gektarǵa ulǵaıyp, 972 myń gektarǵa jetken. Aýyl sharýashylyǵyn qoldaýǵa bıyl 50 mlrd teńge bólinip, sonyń 43 mlrd teńgesi sýbsıdııaǵa baǵyttalǵan eken.
