Azyq-túlik as ta tók

Elde bolsa – eringe tıedi. Osy ótken senbi-jeksenbi kúnderin oblys ortalyǵynyń turǵyndary dál merekedegideı ótkizdi. Aýyl­dyqtar qaladaǵy «Kvazar» dep atalatyn   ortalyq bazardy et pen sút, maı, nan-toqashy  bar, kókónis pen kartopqa toltyrdy da tastady. Jármeńke oblystyq ákimdiktiń qoldaýymen qala turǵyndaryn qoljetimdi baǵamen aýylsharýashylyq jáne azyq-túlik taýarlarymen qamtamasyz etý maqsatynda ótkizildi. Oblys qalalary men aýyldarynyń aýylsharýashylyq ónimderin ón­dirýshilerdiń qatysýymen ótetin jármeńkeler aldaǵy ap­ta­larda  da jalǵasyn tabady. Jalpy, oblystyq aýyl sharýashylyǵy basqarmasynyń habaryna qara­ǵanda, oblysta jyldyń birinshi toqsanynda  230,6 myń tonna sút, 33,9 myń tonna et  daıyndalsa,  3744 tonna shujyq, 548 t. sary maı, 746 t. irimshik pen súzbe, 33224 t. bıdaı uny,  67564 t. nan, 1232 t. kondıter ónimderi, 9174 t. jarma, 6241 t. makaron ónimderi, 2274 t. kúnbaǵys maıy  óndirilipti. Kartop jetedi. Jańa túsimniń 151,2 myń tonna astyǵy qambada saqtaýly.  Dúrligetindeı eshteńe joq. Saýda oryndarynyń bári de ózimizdiń jergilikti ónimderimizge tolyp tur. Osy kúni baıanaýyldyqtarmen birge jármeńkege Pavlodar aýdany da jarysa jetipti. О́z ónimderin ákelgen Lebıaji jáne Aqtoǵaı aýdandarynyń sharýashylyqtary jármeńke qyzyǵyn odan ári qyzdyrdy. Aıazdy kún de synyp, jurtshylyq «Kvazardan» sómkelerin toltyryp, qýanyshty kúıde qaıtyp jatty. Aıtsa aıtqandaı-aq, kelisi 900 teńgeden  sıyr eti, 1000 teńgeden jylqy eti, qazy – 1200 teńge,  qoı eti 800 teńgeden satyldy. Al, Pavlodar aýdanynyń «Kırov», «Lýgansk», «Pısegov» sharýashylyqtary lıtri 90 teńgeden 5000 lıtr  sút ákelipti. Kelesi jármeńkelerge 2 tonna kartop pen oramjapyraq, 0,5 tonna sábiz,  qyzylsha men túıindi pııaz, «Sharbaqty-Qus» seriktestiginiń 36 myń dana jumyrtqasy ákelinip satylmaqshy. Sonymen qatar, sút ónimderi, bal, un, makaron ónimderi jetkiziledi. «Egemen-aqparat». PAVLODAR.